Jes. 39 - BUKO SIPUNENAN

Hizkia samba sapakoinien sibara ka Babel

¹ Kateteret nenda Merodakh-Baladan togat Baladan, rimata Babel, masikoiniake sirimanua masiambit surat samba panguruat kai Hizkia, aipoi aiarepman, si Hizkia siboiki mabesinia tapoi amaronan tubunia minca.

² Si Hizkia bulat mangka bagania kaooira, samba pakoinongnangnan katubutda sangamberi lalep kudduat pukayoatnia, iate mas samba perak, pusinginan samba leu tula pusinginan simakeppu saki samba leu sangamberi lalep kuduat pamateinia. Taanai berisara sibabara ka uma purimataatnia ta aipakoinong si Hizkia katubutda ka uma purimataatnia samba sangaliot laggai kupkumennia.

³ Iageti nabi Jesaya mei kai Rimata Hizkia samba parerenangan katubunia, “Aponia arakua sirimanua nene” Kaipa arabara sirimanua nenda?” Aleginangannia si Hizkia, “Sia nene sibara ka laggai ka sareunan, ka Babel!”

⁴ Parerenangan minca si Jesaya, “Aponia araitco ka uma purimataatnu?” “Aleginangannia si Hizkia, “Sangamberi sibabara ka uma purimataatku araitcoan.” Ta anai berisara bibilet ka uma purimataat ta akupakoinong katubutda.”

⁵ Lepa kuanangan si Jesaya katubut Hizkia, “Arepmake tiboiet Tuhan Sebaot!

⁶ Bulatnia te, bara geti sara tetere, sangamberi sibabara uma purimataatnu samba sikoirikra taikebbukatnu aili ka gogoi nene tuambit le geti ka Babel. Taanai bibilet geti tugagalak, kise te tiboiet Tuhan.

⁷ Sibara ka muntogatnu ka sibabara geti, raala te sia sirimanua ibailiu katalagatda samuntogatnu samba bailiunangannia sipugagalai ka uma purimataat masipasikeli rimata Babel.”

⁸ Aleginangannia si Hizkia kai Jesaya, “Bulat maeru tiboiet Tuhan sisegeakenennu nenda!” Tapoi kapaatuatnia: Kau ibara aban samba pusanangan ka sanganantat rurakku!”