Jes. 38 - BUKO SIPUNENAN

Besit Hizkia samba tualeake

¹ Kabagat gogoi nenda bara besiknia si Hizkia samba malegre imatei. Lepa oi nabi Jesaya togat Amos samba kuanangan katubunia, “Kise te aikua si Tuhan: Segeake tiboiet pangampulat ka sangalalepnu, kalulut mamateian le ekeu, ta mamale ekeu.”

² Lepa pitcaakenangan matania ka ipot rupi si Hizkia, samba panindounangan katubut Tuhan.

³ Kuanangan, “Tuhan, repdep le, amurimanuangan aku kamatam kabagat riuriu topit samba linat patuat, akugalaiakean aponia simaeru kamatam.” Iageti pusounangan simakope si Hizkia.

⁴ Iageti panibonangan si Tuhan katubut Jesaya:

⁵ “Kenan samba kua kai Hizkia: Kise te tiboiet Tuhan, Taikamanuan David, taikebbukatnu: Akuarepman panindogatnu samba Akuitcoan elum. Bulatnia te kutuppai le geti minca burut puririmanuam pululima ngarura,

⁶ samba Kubebelaake te geti ekeu samba laggai nene ka kabei Rimata Asyur samba kekrekungan laggai nene.

⁷ Nene te sibailiu toggaiat kekeu sibara kai Tuhan, igagalaiake te geti si Tuhan aponia sipalelekakenenNia:

⁸ Bulatnia te, sangamberi ailiggou ka panausau matatsulu sigalai Ahas, Kugalai le geti itusoksok ka teitei pulu ngatakep sienunginia siboiki.” Oto panausau matatsulu nenda, panausau matatsulu leu tusoksok ka teitei pulu ngatakep barania ka sienunginia siboiki.

⁹ Sinuratakenen Hizkia, rimata Jehuda, lepat aimabesi samba aimale ka besinia:

¹⁰ “Kuakungannia: Kabagat paoggangan rurakku buita mutuitui aku, ka matatbaliu laggaira taikabaga tusogai aku ka legei purimanuaiatku.

¹¹ Kuakungannia: Taan kuitco si Tuhan ka laggaira sipuririmanua; taan kuitco berisara sirimanua katalagat sikuddu ka polak.

¹² Sapou kudduatKu turagat samba tuotcaake kele sapou sipasijago tarimeu Nupurut purimanuaiatku kele siputre nutakkiakenia kele banang ka apparatnia sinago samba sinoibo nuobaake aku kele kase.

¹³ Mugerei le akumasitiddou paroman pat aili simanseman; kele singa, kise te ibubuake tolatku si Tuhan; sinago samba sinoibo nuobaake aku kele kase.

¹⁴ Kele uma laggi-laggi kise te kupunyaunyau ngangangku maangep kele ngangan ngorut. Matakku taan maron maneila kapata, ale Tuhan, iorak le' aku katuraraurau, ropmake aku.

¹⁵ Aponia kukua geti samba kutitiboake katubut Tuhan; ta pa Nia amasigalaiake? bulat tamomoi kuperep kalulut pongitnia purimanuaiatku.

¹⁶ Ale Tuhan, kalulut nene te ikakaroni Ekeu patuatku; arauake patuatku galai kumaron, galai kumale!

¹⁷ Sibulatnia, pongitnia sisiloku aibailiuan puaraugatku; Anusakkeringan purimanuaiatku ka ngaliu kamataeiat, aipoi anukalipogingan sangamberi jokku.

¹⁸ Aipoi laggaira simamatei tamomoi masikua sura katubum, samba kamateiat tamomoi masiumunake ekeu; sangamberi sirimanua situgogorosot ka ngaliu ratei taan rangengena topitNu.

¹⁹ Tapoi sirimanua sipuririmanua, bulatnia sarat sirimanua sipuririmanua momoi masikukua sura katubum, kele aku ka gogoi nene; pagalaiat putopinanNu; nenda ipaagaiake ukkui ka tatogania.

²⁰ Aiobaan si Tuhan masiarauake aku! Kalulut nenda, konan tanauake kecapi, burut purimanuaiatta ka Uman Tuhan.

²¹ Iageti kuanangan si Jesaya: “Maeruan tuala sangambua roti sileu samba tulokotake ka appu, bule imale!”

²² Kepei nenda aikuangan si Hizkia: “Aponia ibailiu toggaiat, kaeeiku geti ka Uman Tuhan?”