Jes. 37 - BUKO SIPUNENAN

Jerusalem tuarau ka kabei Sanherib

¹ Kateteret aiarepnia si Hizkia sisegeakenenda nenda, biritakenangan leppeinia samba kaunangan komaknia goni toggaiat sou baga, lepa einia ka Uman Tuhan.

² Iageti koiniakenangan si Elyakim, ute ka uma purimataat, Sebna, sipanunurat ka purimataat samba simabajak katalagatda tai imam, raei masiailiake Nabi Jesaya togat Amos. Sia leu et masipakei komak goni.

³ Kuarangan katubunia “Kise aikua si Hizkia, gogoi nene iate gogoi reureu baga, ukuman samba paloloiat. Sita nene makere le kele sinanalep situtuake matat togania, tapoi ta anai ron tubunia itu'tuake matat togania.

⁴ Buleu aiarepman si Tuhan, Taikamanuam, sikuat utet sipasikeli lo sikoiniakenen rimata Asyur, tuannia, bule ipaloloi Taikamanua sipuririmanua, bailiu obanangan si tuhan, Taikamanuam, masikau ukuman kalulut sangamberi tiboiet siarepNia nenda. Oto kauan segeake panindogatnu addeatda sipulelegei sikukuddu sene.”

⁵ Kele arasege katubut Jesaya sipugagalai ka uma purimataat Hizkia,

⁶ kuanangan si Jesaya katubutda: Kise te nukua kam katubut tuannu: Kise te tiboiet Tuhan, “Bui numaloto ka tiboiet siarepnu sikuat sapagugulet rimata Asyur ipaloloi Aku.

⁷ Bulatnia te, Kukokoiniake te' sara ketsat ituguru kabagania, bailiu arepnangan sara katuareman samba toilinia ka laggainia; aile Kugalainia imatei ka lanjau ka laggainia.

⁸ Kateteret aitoili utet sipasikeli lo, sesenangan rimata Asyur ainia masisaggangi Libna; kalulut aiarepman, amutuituian rimata barania ka Lakhis.

⁹ Kateteret nenda aiarepman rimata pagalaiat Tirhaka, rimata Etiopia, kise katuaremannia, “Abelangannia ioi masisaggangi ekeu,” samba kele aiarep nenda, koiniakenangan sapakoiniennia kai Hizkia masisegeake patonekat:

¹⁰ “Kise le nusegeake kai Hizkia, rimata Jehuda: Buian ipajo ekeu Taikamanua katonemiennu nenda siake palelengan: Jerusalem ta tusesegeake ka kabei rimata Asyur.

¹¹ Bulatnia te, anuarepman pagalaiat sigalaira tai rimata Asyur ka sangamberi laggai, iate arasubuakean; ekeuan le pa momoi tubelaake?

¹² Aibelaakean pa sia taikamanuan bangsa-bangsa simateiakenen taikebbukatku, iate Gozan, Haran, Rezef samba muntogat Eden ka Telasar?

¹³ Kaipangan sia rimata laggai Hamat samba Arpad rimata laggai Sefarwaim, rimata laggai Hena samba Iwa?”

¹⁴ Silonangan surat nenda si Hizkia sibara ka kabeira sapakoinien, lepa basanangannia; iageti ei nia ka uman Tuhan samba nga'nga'akenangan surat nenda ka matat Tuhan.

¹⁵ Panindounangan si Hizkia ka matat Tuhan, kuanangan,

¹⁶ “Ale, Tuhan Sebaot, Taikamanuan Israel, sipuririmata ka uddut kerubim! Sarat Ekeu le Taikamanua sangaliot purimatat ka polak; Ekeu le sigalai manua samba polak.

¹⁷ Tongiake piuNu, ale Tuhan, samba arepmake; bukaake matam, ale Tuhan, samba itco; arepi le sangamberi tiboiet Sanherib siakenia bule ipaloloi Taikamanua sipuririmanua.

¹⁸ Ale Tuhan, kirenangan tai rimata Asyur arapakataian sangamberi banga samba laggira

¹⁹ samba kaurangan taikamanuanda kabagat obengan, kalulut sia ta Taikamanua, sigalai kabei sirimanua le, loina samba bukku, oto momoi rapakatainia sirimanua.

²⁰ Oto Kineneiget, ale Tuhan, Taikamnauamai, arauake le kai ka kabeinia, bule raagainia sangamberi purimataat ka polak, sarat ekeu le Tuhan.

²¹ Lepa si Jesaya masikoiniake sirimnaua katubut Hizkia masikua: “Kise te tiboiet Tuhan, Taikamanan Israel: Pagalaiat sinindounu katubukKu pagalaiat Sanherib, rimata Asyur,

²² nene te tlboiet sikuat Tuhan pagalaiat nia: siokko, iate okko Sion aipaloloian ekeu, aigeigeian ekeu; samba okko Jerusalem aigilikakean utenia ka teiteinu.

²³ Kasei anupaloloi samba anupateleiji? kasei katubu nuabeake ngangam, samba nupasikinere kabagat buak patuat? Ka Sipululatsat, Taikamanuan Israel!

²⁴ Ka paneiteiat sapaguguetnu anupaloloian si Tuhan samba anukuangan: kabagat iginia keretakku sakai aku ka sangamberi kudduat simabuak ka leleu, ka udduat simakope reunan ka leleu Libanon; akutaddengan sangamberi loina piniloknia sabeu simabuak, sangamberi loina sanobar simaeru; asegean aku ka kudduat smabuak bulat ka tu'tut, ka leleu simaigi loina.

²⁵ Akugalaian uggungan oinan samba akuloan oinan; garakakekungannia pasamba taddaKu sangamberi bagat oinan ka Misir!

²⁶ Ta pei pa anuarepman, sangamberinia nenda akuteuakean ka gogoi situsasabau samba akupaatungan barania katetere siburu peile? Kineneiget Kupatoilania, nugalai sangamberi laggai simaron bailiu matangeu ibailiu karagatat bukku,

²⁷ sirimanua sikuddu sedda sitaioi tubu bailiu tuge'ge samba maila; bailiunangan sia kele turuturu siputu'tu ka polak simalio samba kele turuturu simalibbut, kele turuturu ka uddut lalep, ele gandum simamantei kepei marak.

²⁸ Tapoi Kuagai, ke tusuru ekeu samba mukuddu, ke bela ele tuguru' ele ke mugege ekeu katubukKu.

²⁹ Kalulut amugegengan poi ekeu katubukKu, samba akuarepman tiboiet pubuangan patuatnu, oto Kuake le geti susuilakKu ka asaknu samba pasimurikKu ka bibom, samba Kutoiliake le geti ekeu geti ka enungan, kaipa kabaraiatnu.

³⁰ Nene te sibailiu toggaiat kekeu, ale Hizkia: Ka rura nene rakokom te gandum siputututu sarania, samba ka rura sikarua, aponia siputu'tu ka siureman siboiki, tapoi ka rura sikatelu, pasikarap kam, masigetai, masigalai monen anggur samba masikom buania.

³¹ Samba sangamberi sirimanua katalagat muntogat Jehuda, iate sangamberi sirimanua sipulelegei peile, muungat te sia minca samba masibaraake bua ka pata.

³² Kalulut bebela te sibara ka Jerusalem sangamberi sirimanua sipulelegei, samba sirmanua situaarau sibara ka leleu Sion; tu'tut baga Tuhan Sebaot masigalaiake pagalaiat nene.

³³ Kalulut kise te tiboiet Tuhan pagalaiat Rimata Asyur: Ta iguguruki laggai nene samba ta ipapanaake silogui sedda; samba leu tamomoinia pasamba korabbi, samba ta itatabbui polak ibailiunia irip pasialougatnia.

³⁴ Ka enungan, kaipa aibara, toili le nia geti, tapoi ka laggai nene ta tugugurunia, kise te tiboiet Tuhan.”

³⁵ Samba Kukekre le geti laggai nene Kuarauakenia, kalulut Aku samba kalulut paguguletKu si David.”

³⁶ Bela Malaikat Tuhan, lepa mateiakenangan sangotu balu pulu lima ribu sia ka pusapougatda tai Asyur. Pato simansep makoinongnangan, sangamberinia tubut sirimanua simamatei!

³⁷ Kalulut nenda, tuitui si Sanherib, Rimata Asyur, samba toilinia samba kuddunia ka Niniwe.

³⁸ Ka sara gogoi, ainia maninindou kabagat uman sabulungan Nisrokh, taikamanuania, mateiakerangannia tatogania iate si Adramelekh samba si Sarezer, pasamba lanjau, Lepa nenda putuituirangan ka laggai Ararat. Iageti si Esarhadon, togania, ibailiu rimata masisaliakenia.