Jes. 36 - BUKO SIPUNENAN

TIPPU 36–39 SI JESAYA KATETERET RIMATA HIZKIA Sanherib masialou Jerusalem

¹ Iageti kabagat rura sikaepat kateteret Rimata Hizkia, Sanherib, rimata Asyur masisaggangi sangamberi laggai simaron ka laggai Jehuda, samba leu kalaakenangannia.

² Lepa nenda rimata Asyur masikoiniake utet saladdu sibara ka Lakhis mei ka Jerusalem pasamba saladdu simigi masikua bule ipusum Rimata Hizkia. Iageti sege sia ka laggai nenda samba kuddu sia ka mone oniakenen Mone Penatu, ka bebet sopak sipuguruk oinan sibara ka pao' rubeiat kapata.

³ Iageti bela telu sipugagalai ka uma purimataat Hizkia masiailiake utet saladdu nenda. Si telu sipugagalai ka uma purimataat Hizkia nenda iate: Elyakim togat Hilkia, ute uma purimataat, Sebna, sipanunurat ka purimataat samba Joah togat Asaf, sipuuku pubulaganan purimataat.

⁴ Lepa kuanangan utet saladdu nenda katubutda, “Segeake kam kai Hizkia tiboiet rimata Asyur nene,” angoi nukau tubum simagege?

⁵ Nukua pa sarat tiboiet le momoi masisailiake enungan pasaggak samba geget ka pasaggangan? Kasei karoakenennu bailiu magege ekeu nusaggangi Asyur?

⁶ Kirenangan nukaroake le paroman Misir, tapoi nenda makere le kele loinat popoupou sibailiu tutura samba lepa geti tutura nenda mabakbaknangan samba pununangan kabeinu. Kisedda rimata Misir, ka sangamberi sirimanua sipukaronan katubunia.

⁷ Kuanangan minca utet saladdut Asyur, “Ele nukua, kai Tuhan Taikamanuamai le kupukaronan kai? Kateteret Hizkia masikoiniake, bule tai Jehuda samba tai Jerusalem sarat kamatat kudduat pasibuluat ka Jerusalem le rapanindou, ta pa sipakatainia nenda iate kudduat pasibuluat samba kudduat panindogat kai Tuhan?

⁸ Oto kineneiget, kauan nupauktuk kam tuanku, Rimata Asyur: Kuake te katubum rua ngaribu ngamuneng kuro, ke moi nuake sirimanua sibara kekeu sikuroake kuro nenda.

⁹ Kipa ioi nukalaake sara utet saladdut tuanku bulat sigoiso nene? Beringan ekeu aile mukakaronan ka Misir ka pagalaiat kereta samba saladdu sipukukuro!

¹⁰ Nupaatu pa kusaggangi samba kukalaake kai ekeu ta kabagat paroman Tuhan? Tuhan le amasikoiniake kai masisaggangi samba masisubuake kam.”

¹¹ Lepa kuanangan si Elyakim, Sebna samba Joah katubut utet saladdut Asyur nenda, “Panibo le ka ngangan Aram, kuagai le kai. Bui' nupanibo ka ngangan Jehuda, babara raagai siberikabaga sikuddu ka kauddut irip laggai nenda.”

¹² Tapoi aleginangan utet sipasikeli lo nenda, “Sarat kakam samba ka rimatamui pa aikoiniake aku Rimata Asyur masisegeake sangamberi nene” Aku leu et manibo ka siberikabaga sikuddu ka irip nenda, pasambamui geti masikom simalolitmui samba oinanmui.”

¹³ Iageti purionangan utet sipasikeli lo nenda samba pugereinangan ka ngangan Jehuda, “Kuanangan: Arepake kam sikuat rimata sabeu, Rimata Asyur!

¹⁴ Kise te tiboiet ngangan, “Bui ipataju kam si Hizkia! Tamomoi iarauake kam!

¹⁵ Bui' nuarepi kam pananakatnia nupukaronan kam katubut Tuhan, ikua bulat ibebelaake le sita si Tuhan, laggai nene ta isesegeake ka kabei rimata Asyu:

¹⁶ Bui' nuarepi kam si Hizkia, kalulut kise te aikua Rimata Asyur: Baraake kam palelengan paabanan katubukku samba konan kam katubukku, oto senen sirimanua sibara katalagamui ikom le geti anggurnia samba sileunia samba leu mulo ka uggungannia,

¹⁷ teret kuoi samba kuabbit kam ka sara laggai kele laggaimui, sara laggai sibara gandum samba anggur simasua, sara laggai simigi roti samba sibara monen anggur.

¹⁸ Bui' nuarepi kam pananakat si Hizkia, ikua, “Ibebelaake le sita si Tuhan! Amuailingan leu pa taikamanuanda tai bangsa masibelaake laggainia senesenenda ka kabei rmata Asyur”

¹⁹ Kaipa sia sabulungan laggai Hamat samba Arpad? Kaipa sia sabulungan laggai Sefarwaim? Amoi leu pa sia masiarauake Samaria ka kabeiku?

²⁰ Kasei katalagat sangamberi taikamanua laggai nene sioi masibelaake laggaira ka kabeiku, bailiu Tuhan momoi ibelaake Jerusalem ka kabeiku?”

²¹ Tapoi amumengmeng le sia samba ta araalegi beri goiso, kalulut aikuangan rimata, kise, “Bui' nualegi kamnia!”

²² Iageti ei si Elyakim togat Hilkia, utet uma purimataat, Sebna, sipanunurat ka uma purimtaat, samba Joah, togat Asaf, sipuuku pubulaganan ka uma purimataat, masiailiake si Hizkia, sipuleppei sibiritakenen, lepa paagairangan katubut rimata sikuat utet sipasikeli lo nenda.