Jes. 34 - BUKO SIPUNENAN

Ukuman ka sangamberi bangsa samba leu Edom

¹ Konan legreake tubum, ale sangamberi sirimanua, arep kam, samba lelekake kam, ale sangamberi suku! Eddangannia polak samba sangamberi sibabara kabagania masiarep, polak samba sangamberi simatotoila katubunia.

² Kalulut magolu le si Tuhan ka sangamberi sirimanua, samba patuatNia maoloi ka sangamberi saladdutdra. Aikokoiakean sia sibailiu subuakenen samba tusegeake sia sibailiu mateiakenen.

³ Sangamberi simamatei turibbaiake le geti, samba sangamberi tubutda simamatei tuobaake imabutek; sangamberi leleu ipatalauiji le geti logaura.

⁴ Sangamberi saladdut manua masubu le geti, samba manua tupurut le geti kele tupurut buko, sangamberi saladdu matei le geti kele buluk anggur imantei, samba kele imantei buluk sileu.

⁵ Aipoi lanjauKu ka manua amugegengan, itco, lanjau tugorosot masiukum tai Edom samba, bangsa sikokoiakenenKu subuakenen.

⁶ Si Tuhan ai sara lanjauNia sipulologau samba simasun tabe, iate logau sangamberi togat biribiri samba kambing simanteu samba tabet gaglat biribiri simanteu. Kalulut si Tuhan masibaraake pasijajakat buluakenen ka Bozra samba pasimateiat sabeu ka laggai Edom.

⁷ Matei le geti sangamberi banteng pasamba biribiri samba kambing nenda, samba sangamberi jaui simanteu sibau tubu pasamba jaui simanteu simagege, sangamberi laggainia inemnemi le logau, samba polakda sun le tabe.

⁸ Aipoi si Tuhan masibaraake gogoi pasilumunan samba rura pasiukuman kalulut paukelat pagalaiat Sion.

⁹ Sangamberi bagat oinan Edom isili geti bailiu ter, samba polaknia bailiu muno; laggainia bailiu le geti ter sipujujulu.

¹⁰ Sinago samba sinoibo laggai nenda mariuriu mapato, kujuknia tusakai teret buruburu. Laggai nenda ibailiu le geti karagatat teret buruburu, taanai sirimanua sisabauginia teret buruburu.

¹¹ Ilaggaiji le nia geti uma undan samba landak, uma popo samba uma seggu mukuddu le geti kabagania. Ibailiuake le geti si Tuhan polak nenda ta makolou samba sitaanai kabaga siripot siisiakenenNia.

¹² Mukuddu le geti sikameinan kabagania, samba taan geti babara sikebbukat laggainia; taan babara sedda rioakenen sibailiu rimata, samba sibailiu saut sappru.

¹³ Mututu' le geti rui ka kudduat purimataat, turuturu samba bekbek kurut ka sangamberi kudduat pujagoat simaron, pat bailiunangannia kudduat jojot leleu, samba pumonean uma unta.

¹⁴ Sedda paaili tarimeu susu samba jojot leleu, samba sikameinan paaili pasamba aleinia, beringan sanitu sinoibo ai leuet sedda samba ai kudduat puariatnia.

¹⁵ Sedda leu ulou sioba ka loina murumun samba muattelu, mengengkep pat titinangan attelunia; sangamberi uma pisaksak paruru sedda, senesenen uma sara sinanalep samba sara simanteu.

¹⁶ Gaba le kabagat bukot Tuhan samba basa: Beri sara ka sangamberi sipuririmanua taanai sipulelegei samba berisara simalilimai; aipoi kisedda te tiboiet Tuhan sibebela ka ngunguNia, samba Ketsat Tuhan le amasiruruake sia.

¹⁷ Si Tuhan le amasigalaiake pautuk, samba masiparubei laggai nenda katalagatda pasamba tali pasikire; kudduijirangannia geti teret buruburu samba kudduijirangannia geti teret mupaninikat.