Jes. 33 - BUKO SIPUNENAN

Panindogat masitiddou paroman

¹ Matei le ekeu, ale sioba masipakatai kenanen ta tupakatai ekeu, samba ekeu, ale sipasiraurau kenanen ta turaurau ekeu! Ke alepaan nupasikataiake, ekeuan le tupakakatai; ke alepaan nupasiraurau, ekeuan le turaraurau.

² Tuhan, kau imanuntu bagam katubumai, Ekeu le ngenaenmai! Jago le kai senen simansep, arauake le kai kateteteret puokkiman!

³ Kateteret imaarep ngangam kateteret nutusuru, putuituirangan sangamberi sirimanua samba pasaragainangan sangamberi suku bangsa.

⁴ Kele mungkuat sit rapasisaggangi samba raparauraugi bibiletda.

⁵ Tuhan bulat simalina, Nia le sikupkupake sangamberinia' masirioake surukat samba puroipoat ka Jerusalem.

⁶ Tetere simaaban moi le geti ka kam; pukayoat sipasiarauake iate sikut patuat samba puaagai; Loto kai Tuhan, iate bibilet pukayaot ka Sion.

⁷ Itco pei, tai Ariel mukatci ka enungan, sia pakoinien sipasigaba aban musou ka sou baga.

⁸ Sangamberi enungan sabeu ibailiu matangeu samba beringan sia sara situsasabau ka enungan. Palelengan atupasabauan, sipasimuneng atukeraakean, samba sirimanua ta tupuletsei.

⁹ Laggai mureureu baga samba mangorik; leleu Libanon mangorik samba matei; Su'sut Saron aibailiuan kele bakkat loina, ka Basan samba Karmel amateiat pabulubuluk loina.

¹⁰ Kuanangan si Tuhan, “Kineneiget, tusuru le aku, kineneiget, tusuru le aku Kupurio, kineneiget murio le Aku!

¹¹ Nusuruketake le turuturu simagarak, samba masitu'tuake matat legei siperakat; golunu kele obengan sipasilabo ekeu.

¹² Sangamberi laggai tulabo le geti ibailiu kapur samba tulabo le geti ka obengan kele turuturu simarui sitippu.

¹³ Ale kam sikuddu ka sareunan, arep kam aponia sigalaiakenenKu ale kam sikuddu ka simalegre, agai kam gegeKu!

¹⁴ Tugegerangan sirimanua sijo ka Sion sia sipatataju kupkupnangan sia pulotokat. Kuarangannia, “Kasei katalagatta sioi mukuddu ka obengan sipasisubuake nene? Kasei katalagatta sioi mukuddu ka obengan simatom nene?”

¹⁵ Sirimanua sipuririmanua kabagat pubulanan, sipaninibo kabagat linat patuat, sikeraake uktuk sibara ka siraurau silisoake kabeinia, bule ta isilo bulagat sibara kaenungan sikatai, sitabbo piunia, bule ta iarep isiat pamamatei, sitabbo matania, bule ta iitco pukakatai,

¹⁶ nia te kele sirimanua sikuddu simaarau ka sangamberi kudduat simabuak, iripnia iate simaron ka uddut leleu simabukku; rotinia tutarekake kisedda leu et lo nia.

¹⁷ Nuinco te geti Rimata kabagat puaabeunia, samba nuinco te geti laggai situnganganang ka sareunan.

¹⁸ Nupaatu te kabagat patuatnu pulotokat sabeu ka silelepa: “Asapprungan pa sipangangande, asapprungan pa sipasikikilo, samba asapprungan pa sirimanua sipangangande kudduat pujagoat?”

¹⁹ Taan te nuinco kam sirimanua siooiake sikatai nenda, sirimanua sipunganga sitaigaietmui

²⁰ Mattai kam laggai Sion, kudduat tugalaiake punen puaarat! Matam masiitco geti Jerusalem, kisdda leu et kudduat simaaban, sapou sitaiotcaakenen, turinia sitaibuburauget teret buruburu, samba sangamberi apprania sitaitatakki.

²¹ Sedda te taitco kopet latsatnia Tuhanta; kele kudduat simaigi bagat oinan sabeu; ta ienungi abak silugai, samba ta ienungi kinapat sabeu.

²² Kalulut si Tuhan iate Rimatatta. Tuhan iate sipasiake surukat ka sita; Tuhan iate Rimatatta, Nia te masiarauake sita.

²³ Sangamberi appramui amaguraan, taan mooi ipasiappra simaron arigit kinapat ka kudduatnia, taan momoi inga'ngaake lajo. Kateteret nenda rarurubeiake te siraurau simigi, samba sangamberi simasakit rauraurangan leu silepa raurau.

²⁴ Taan babara sikuddu sedda sipasikukua: “Mabesi' aku,” samba sangamberi silaggaijinia tuappeake le geti seletda.