Jes. 32 - BUKO SIPUNENAN

Rimata simaroipo baga

¹ Bulatnia te, muparenta le geti sara rimata siripot katubulanan, samba saute mupaneinei le sia siripot katuroipoat,

² samba senesenenda geti kele kudduat pukuneman ka rusa samba kudduat pukuneman ka rusa talabari, kele ipuguruk oinan ka kudduat simagarak, kele bukku sabeu pukuneman, ka polak simagarak.

³ Mata sangamberi sirimanua taan mauneng, samba talinganda sirimanua sipasiarep ralelekake le geti.

⁴ Patuat sirimanua simaalau baga maagai le geti masipaatu, samba jalaira sirimanua sitaiagai manibo, makolounangan geti rapanibo.

⁵ Sirimanua simakela patuat taan tukukua sia minca simeru paraboat, samba sirimanua simapatajuat taan tukua sia abeuakenen.

⁶ Kalulut sirimanua simakela patuat masikua pukelakat patuatnia, samba patuatnia masiisiake sikatai, iate masipaloloi samba masikua sitaimaroipo pagalaiat si Tuhan, iobaake ta ibara kan kabalugut simalaje samba ta ibara lo ka simaonggou.

⁷ Ke simapatajuet, sangamberi patuatnia iate sikatai, masipaatu sangamberi galaiakenen sikatai imateiake sirimanua sipangongorik itiboake tiboiet patajuat, kenanen simageba nenda ibesiake isilo simateu siloketnia.

⁸ Tapoi sirimanua simaeru paraboat masipaatu simaeru, samba sarat igalaiake le kele kisedda.

Parepdeman ka tainanalep Jerusalem

⁹ Ale kam tainanalep simaeru purimanuaiat, suruake kam, arepake kam ngangangku ale tatoga tainanalep simaeru purimanuaiat, lelekake kam tiboietku!

¹⁰ Kabagat sangarura legei mugeret le geti tubumui, ale sangamberi sirimanua simaeru purimanuiat,

¹¹ Kau numaloto kam, ale sangamberi tainanalep simaeru puririmanua, kau numaloto kam, ale sangamberi tainanalep simarokdak puririmanua golok samba sili kam leppeimui pakei kam komak goni ka tengamui!

¹² Soibi kam monemui simalainge samba loinat anggurmui simariuriu mubua simigi,

¹³ soibi kam polak bangsaku situtuki parou samba rui bulatnia, senen lalepnu kudduat puangkakat baga ka laggai sisun sipugogora baga.

¹⁴ Aipoi uma purimataatnu atukaddiuakean samba laggainu simagaugau ibailiu le geti simatangeu. Tinambu samba pujagoat simaron ibailiu le geti polak simagaktuk teret buruburu, ibailiu kudduat pusanangan ka kalidei leleu samba kudduat turuturu pukoman mungkuat tarimeu.

¹⁵ Teret ituuru katubutta Ketsat sibara kapata: iageti kudduat simatangeu ibailu le geti monen buat kaju samba monen buat kaju tuaddeake le geti bakkat loina.

¹⁶ Puroipoat mukuddu le ka simatangeu katubulanan mukuddu geti ka monen buat kaju.

¹⁷ Kaipa turioake pubulanan, sedda ai paabanan, samba buat pubulanan iate pusanangan samba puaroiat teret buruburu.

¹⁸ Mukuddu le geti paamian ka kudduat simaaban ka kudduat simaaroi ka kudduat puariat simasanang.

¹⁹ Maibu le' sangamberinia bakkat loina samba laggai turepeake le geti bulat simarepe.

²⁰ Mauktuk te kam sipangangarap ka bebet pugurungan oinan, siobaake jaui samba kalideinia iei kaipapa'!