Jes. 31 - BUKO SIPUNENAN

Tuhan le sarania sipasirom

¹ Matei le sangamberi sirimanua siei masitiddou paroman ka Misir, sikaroake sangamberi kuro, sikatonemi keretania simakope igi samba saladdu sipukuro simakope igi, tapoi ta rakatonemi Sipunenan, Taikamanuan Israel, samba ta aragaba si Tuhan.

² Tapoi Nia simasiku patuat ibaraake le geti pugejaat baga, samba ta ititiktik tiboietNia; tusuru le Nia geti isaggangi muntogat sikatai, samba isaggangi sipasirorom sirimanua sikatai.

³ Kalulut tai Misir sirmanua le sia, ta taikamanua, samba sangamberi kuro'ra iate tarimeu simasaggo, ta ketsat sibara gege. Ke itotoiake kabeiNia si Tuhan, tugirisitnangan sipasirorom samba bele ropakenennia, samba sangamberitda masuburangan simakere.

⁴ Kalulut kise poi tiboiet Tuhan katubukku: Kele sangamuneng singa ele singa sibau tubu ipaemang ijago ibania, samba ta tugege'genia iarep gereira mungkuat sipasijago tarimeu sikoniakenen sipasisasagganginia, samba ta ikakalania ka lamaura, kisedda te geti itugorosot ipasaggak si Tuhan Sipulugege ijago leleu Sion.

⁵ Kele uma' ingangaake kapponia ijago rumunnia, kisedda te geti si Tuhan Sipulugege ijago Jerusalem, oo, masijago samba masiarauake, ipasikelinia samba iareuake kamateiat.

⁶ Bauake kam patuatmui katubuNia, ale tai Israel, nuareuake kam tubumui katubuNia!

⁷ Bulatnia te ka gogoi nenda senesenemui nuriribbaiake te kam sangamberi bulungan perak'ra samba sangamberi bulungan masra sigalai kabeimui simasun jo.

⁸ Tusubuake le geti Asyur pasamba lanjau, tapoi ta lanjau sirimanua, samba sappru kalulut lanjau, tapoi ta lanjau sirimanua; ratuituiake le tubutda kalulut lanjau samba sangamberi tailaingenra ibailiu le geti sipugagalai siubbuakenen.

⁹ Tata' le geti sijago sia kalulut loto', samba mutuitui le geti utet saladdunia ikaddiuake toggaiat, kisedda te tiboiet Tuhan panindogiet samba abeuakenen pasamba buluakenen rarangen ka Jerusalem.