Jes. 30 - BUKO SIPUNENAN

Ta Misir tapoi Tuhan le masiake paroman

¹ Matei le tatoga simakela patuat, kise te tiboiet Tuhan, sigalaiake sara isiat ta sibara katubukKu, siguruki sara parurukat, ta kalulut panumbuiat KetsatKu, bailiu tuppainangan jotda,

² siei ka Misir sitaipasititiddou teubagakKu, rapulipput katubut Parao samba masitiddou paroman ka Misir.

³ Tapoi pukuneman kai Parao sibaraake geti puailaatmui, samba pukuneman kabagat pasijagoat Misir sibaraake geti jomui.

⁴ Kenanen poi siabeu tiboi tubu ka Jerusalem aiat sia ka Zoan, samba sangamberi punutubutda asegean sia ka Hanes,

⁵ sangamberitda rasilo le puaailaat kalulut sirimanua nenda tamomoi rakau simaeru katubutda, samba tamomoi rakau paroman ele siameru, tapoi puailaat samba paloloiat le.

⁶ Tuhan pagalaiat sangamberi tarimeu ka laggai Negeb. Ka sara laggai simasun pugejaat baga samba puokkiman, kudduat singa sinanalep samba singa simanteu sipurorou, kudduat paulouulou samba ulou naga situtuburut, kaurangan pukaiaotda kateitei kalidei raambitnia, samba sangamberi bibilet pubulagananda ka teitei unta, ka sara laggai sitaioi masigalaiake simaeru,

⁷ iate Misir sipasikakau paroman sitaanai katukolobat; kalulut nenda oniakekungannia Kise: “Rahab tugalai sarat mukuddu.”

⁸ Oto kineneiget, kenan, suratake nenda ka matatda ka sara bukku lei, samba kaunungannia ka sara buko, bule nenda ibailiunia pasimunengan teret buruburu.

⁹ Kalulut sia nenda iate sara laggai simakela patuat, tatoga sioba paboko tatoga sitaioba masiarepi nganturat Tuhan;

¹⁰ sipasikua katubutda sipasisiitco: “Buian nupasiitco,” samba ka sipasiitco: “Buian nuitco ka kai pagalaiat sangamberi katubulanan,

¹¹ areuake ekeu ka enungan samba enungi enungan bagei, bui' nupaorei kai kalulut Sipulugege, Taikamanuan Israel.”

¹² Kalulut nenda kise te tiboiet Sipulugege, Taikamanuan Israel: “Kalulut anukera poi kam tiboiet nene, samba nusegeake tubumui katubutda sipasiraurau samba sipasigagalaiake sikatai samba mukaronan katubunia,

¹³ kalulut nenda jomui nene ibailiu le geti kele karaganan irip bukku simalegre bele, bela ka ujat irip bukku simabuak, simararagat sigege' kabagat oggak sitete,

¹⁴ kele karagatat kudduat polak pasigalai pario' sigatcaakenen ka sitaanai katet baga, bailiu karagatatnia nenda taanai berisara momoi tupakei pasialat obengan ka tuggut ele pasiseilut oinan kabagat kudduat oinan.”

¹⁵ Kalulut kise te tiboiet Tuhan Taikamanua, Sipulugege, Taikamanuan Israel: “Kabagat pasibabau patuat samba mutangoan tuarauake le geti kam, kabagat patatangoan samba mutonem baga iate puroronmui.” Tapoi ta noba kam,

¹⁶ nukua peile kam: “Ta, mukoro le koba kai samba pabalau simaola,” oto pabalaumuian geti samba mapepemuian. Kuamuian minca: Koba kai masikuroake kuro simakope nangka pabalau,” oto sipasikukukru kam peile makope nangka pabalau.

¹⁷ Mutuitui le geti sangaribu sirimanua raitco palotokat sara sirimanua, putuituimuian geti ka palotokat lima sirimanua, pat kaddiuakerangan kam kele airigit toggaiat ka uddut leleu samba kele toggaiat ka uddut leleu.

Palelengan katuaraugat Sion

¹⁸ Kalulut nenda Tuhan masingenaake teterenia ipatoila nuntut bagaNia katubumui; kalulut nenda matareknangan ipukateki kam baga. Kalulut Tuhan iate Taikamanua simasun katuroipoat; mauktuk te sangamberi sirimanua singenaakeNia!

¹⁹ Bulatnia te, ale sipulaggai ka Jerusalem, taan musosou kam simariuriu. Bulat ipukateki le kam baga si Tuhan, ke musoga kam; aleginanganNia.

²⁰ Kenanen goiso le iake si Tuhan komen samba oinan, topoi taan ililipputnake tubuNia, mariririuan le nuinco kam Nia,

²¹ talingamui masiarep geti tiboiet nene sibara ka teiteimui: “Nene te enungan, puenung kam nutut kamnia.”

²² Kasitsinakemuian geti sangamberi tularat bulunganmui silakkeki paerak ele mas; ribbaiakemuian geti kele komak simalolit samba kuanungan katubunia: “Belaake ekeu!”

²³ Lepa akenangan geti si Tuhan urat ke nukarapake kam uremen ka monemui, samba pusukkranangan geti buat siuremanmui. Kateteret nenda pukomnangan geti tarimeumui turuturu ka polak ka simalio;

²⁴ sangamberi jaui samba kalidei sipasikukuilu polak mukom le geti komen sigaluakenen simananam, silepa so'sok.

²⁵ Sibara ka senen leleu simabuak samba ka tinambu sipusumbulat pugoroknangan geti bagat oinan ka gogoi pasimateiat sirimanua simigi, ke mabukkat kudduat pujagoat.

²⁶ Oto torot laggo sabeu bailunangannia geti kele torot sulu simaoloi samba oloi sulu pitu ngaminca pitu ituppai oloinia, iate kele pitu ngagogoi toronia, kateteret iappra si Tuhan mauju paamianNia samba ialeake balak sibobokat.

Ukuman Taikamanua ka Asyur

²⁷ Moi le si Tuhan masipakoinong tubuNia sibara ka KudduatNia simareunan – goluNia sabeu, moi le Nia kabagat tanai rusa simagepgep simaruru', biboNia sun le golu, samba jalaiNia kele obengan sipasilalabo;

²⁸ Boroi engaNia kele bagat oinan sipasiraraggaiake, kerunia teret lolokkat – Moi le Nia masiso'sok sangamberi sirimanua ipakei soso'sok katusubuat samba masikau sara pasimuri katupepeat ka ngungunda tai bangsa.

²⁹ Nuuraiake le kam geti sara urai kele kateteret sinoibo rapalina tubu ka punen, samba pugoramuian baga kele kateteret rapuenung sirimanua sialei suling sipananatra ka leleu Tuhan, ka Leleu Bukku Israel.

³⁰ Paarepnangan geti ngangaNia sipunenan si Tuhan, ipakoinong le geti kabeiNia situgogorosot masiukum kabagat golu sabeu samba juluu obengan sipalalabo, urat simatirit, rusa talabari samba urat bukku.

³¹ Kalulut tuge'ge le geti Asyur ka ngangan Tuhan, kateteret ibobo sia pasamba liliei.

³² Kalulut senen sibobokat tutura siorakakenen Tuhan katubunia, sipaalei le geti ka rebana samba kecapi, samba pasaggak le Nia geti isaggangi Asyur pasamba kabei silisoakenen pasaggangan.

³³ Kalulut barania peile ka siburu atupulelekngan kudduat pasilabokat – ta pa nenda uktuk rimata – bongennia tugalai simakeru samba simalio, kudduatnia simasun obengan samba loina; engan Tuhan masiobekake kele bagat oinan muno.