Jes. 3 - BUKO SIPUNENAN

Ukuman Tuhan ka sia sipepeake sirimanua nenda

¹ Bulatnia te, Tuhan, Tuhan Sebaot, iareuake te ka Jerusalem samba ka Jehuda senen sirimanua karoakenenda, sangamberi komen samba lo sinarekanenen:

² saladdu simagege samba saladdu sabagei, sipasiukum, nabi, taikerei samba leu sikebbukat laggai,

³ sautet saladdu, siabeu tiboi tubu, sipangangantru samba simatawa, samba siagai manae.

⁴ Kuuddetake te sibau tubu sibailiu sipaneinei sia, samba tatoga muute katubutda.

⁵ Iageti paoreirangan, pasasambatda; sibau tubu rogulu le geti saukkui samba sirimanua sitaiddeakenen masiputata siabeu tiboi tubu.

⁶ Bailiu ke sara sirimanua masiukkaake sarainania ka lalep ukkuinia samba masikua: “Ai leppeinu sabeu, kauan ibailiu ekeu utemai, samba karagatat nene ai kabagat kupkumennu”,

⁷ oto kateteret nenda aleginangan sarainania: “Ta koba ibailiu aku sikerei; ka lalepku taanai komen samba leppei sabeu; bui' nuuddetake kam aku sibailiu utet laggai.”

⁸ Bulatnia, amakataian Jerusalem! samba Jehuda leu amaragatan; kalulut tiboiet samba sigalaira masisaggangi si Tuhan samba masiputata geget Tuhan.

⁹ Pumataatda masipatoila pukakataira, samba kele tai Sodom rapoiliat jotda taan rapakekele. Matei le sangamberi sirimanua nenda! Kalulut rabaraake le kamateiatda.

¹⁰ Segeake le, mauktuk te sirimanua simatopit! Kalulut rakokom te buat sigalaira.

¹¹ Matei le sirimanua sikatai! Iorak le sia gejat baga, kalulut tugalaiake le katubutda siripot sigalaiakenenda.

¹² Kisedda leu et paamianKu, utera iate tatoga, samba tainanalep muute katubutda. Ale paamianKu, sautemui iate sipepeake kam, samba enungan enungienmui arapakataian!

¹³ Aiuddeningan si Tuhan uddenan pasiukuman samba amurioanNia masiukum siberikabaga.

¹⁴ Si Tuhan le mugalai sibailiu sipasiukum ka sikebbukat laggai samba ka sangamberi sipaneinei paamianNia: “Kam te aisubuake monen anggur nenda, bibilet siraurau sibara ka sirimanua situoorei masun kabagat lalepmui.

¹⁵ Angoi nupaoreiji kam paamianKu samba nuparauraugi kam sirimanua situoorei?” Kise te tiboiet Tuhan Taikamanua sibakkat manua samba polak.

Ukuman Tuhan ka tainanalep simabuak patuat ka Sion

¹⁶ Kuanangan si Tuhan: “Kalulut amabuakngan patuatda tainanalep ka Sion samba muenung sia kabagat buak patutat, samba kabagat umun tubu, muenung sipakau bakkoura samba leu simajeneng letsut reretda,

¹⁷ oto igalai le geti si Tuhan utera tainanalep ka Sion sun le lubbe samba sapunangan geti alaira si Tuhan ka bara utera.

¹⁸ Kateteret nenda iala le geti si Tuhan sangamberi pulaingeanda: letcut rere, apprat ute samba inu;

¹⁹ pulaingean talinga, tabbot mata,

²⁰ pulaingean ute, letcu rere sitikai, akkik tenga, kudduat pusinginan samba jimat;

²¹ sipsip samba subang asak,

²² leppei pupunen simalainge, leppei sabeu, salendang samba, sumpit,

²³ puailoggoubat, leppei simanimpi, leppei juto, apprat ute samba leppei simananta.

²⁴ Oto sibailiu silit pusinginanda iate simabutek, sibailiu silit sara akkik tenga iate sara appra, sibailiu silit sangasolabbit alai simalainge iate ute siguluk, sibailiu silit leppei pupunen iate leppei goni; samba leu laingen tubu tusili le ibailiu katai tubu.

²⁵ Sangamberi sirimanua sikuddu katubum matei le geti ka lanjau, samba simagege sikuddu katubum matei le geti ka pasaggangan.

²⁶ Sangamberi matatbaliu Sion mukatci le geti samba mureureu baga, samba laggai nenda ibailiu le geti kele sinanalep sibulutut sipukukuddu ka polak.