Jes. 29 - BUKO SIPUNENAN

Jerusalem tualou tapoi tuarauake

¹ Matei le ekeu Ariel, Ariel laggai kudduat pusapougat David! Eddangan senen rura ipasaili sangamberi punen!

² Kugejaake le geti bagat Ariel, bailiu sirimanua mukatci samba muhoihoi, samba laggai nenda bailiu obengan.

³ Musapou le geti Aku ka senen matat rusa masialou ekeu, samba galaikungan geti kuddduat panaikoat masiokkip ekeu, samba rioakekungan geti kekre pasialougat masialou ekeu.

⁴ Iageti epeakenungan geti patuatnu samba paarepnungan ngangam sibara kabagat polak, taimakolounangan ngangam sibara ka abu; punaunangan geti ngangam kele ngangan ketsatda simamatei sibara kabagat polak, samba maarepnangan geti ngangam kele nganga simamoile sibara ka abu,

⁵ Tapoi mapepe le geti mungkuat saggaknu kele abu simakujuk, samba sangamberi sirimanua simabuak patuat simagege ibailiu le geti kele kujuk sitububurut situsasabau. Kalulut sige'ge, kabagat sangapeipeikat mata,

⁶ itconungan geti kaoijanan Tuhan Sipulugege kabagat leleggu, ngeungeu polak samba nganga sabeu, kabagat kasoubaliok samba rusa talabari samba kabagat juluu obengan sabeu.

⁷ Iageti sangamberi saladdut laggai sipasisaggangi Ariel, samba sangamberi sirimanua sisagganginia samba kudduat pulippunannia samba sirimanua sipasiokkipnia ibailiu le geti kele pangamutet samba itcot mata ka sinoibo:

⁸ kele sara sirimanua simalaje ainia mukokom kabagat pangamutet, kateteret itusuru, taanai kabagat balugunia, ele kele sara sirimanua simaonggou ainia mulolo kabagat pangamutet, kateteret itusuru, bulat masaggo peile nia samba maonggou peile nia, kisedda te ka sangamberi saladdut sangamberi laggai sipasisaggangi leleu Sion.

Bangsa simapeset

⁹ Mage'genangan kabagatda eddangan ta itubuka matam kele simapaset! Eddangan irorok ekeu, tapoi ta kalulut anggur, eddangan ipuineng ekeu, tapoi ta kalulut arak!

¹⁰ Kalulut aigalaian si Tuhan imalelek peperepnu; matam – iate tai nabi – aiunengakean sia samba pumataatnu – iate sipasiitco – aitabboan.

¹¹ Oto kekeu ka sangamberi itcot mata nenda kele bagat sara buko simatereiakenen, ke tukau nenda ka sirimanua siagai masibasa samba masikua: “Basa buko nene,” oto aleginangan geti nia: “Ta kuagai, kalulut buko nenda aitumemeterai”;

¹² samba ke tukau buko nenda ka sirimanua sitaiagai masibasa samba masikua: “Oto basa nene,” oto aleginangan geti nia: “Ta kuagai masibasa.”

¹³ Aikuangan si Tuhan: “Kalulut raoi ramalegre sirimanua nene sarat ka ngungunia le samba sarat ka bibonia le raabeuake Aku, tapoi patuatda areu katubukKu, samba panindogatda katubukKu sarat tiboiet sirimanua sigelai le,

¹⁴ oto kalulut nenda, bulatnia te, Kugagalai leu et kerek ka sirimanua nene, pukerengan kiseiet sabeu; pusisikut patuatda sirimanua simasiku patuat mapepenangan, samba puaagaira sirimanua simaagai malipputnangan.”

¹⁵ Matei le sirimanua silipputnake siisiakenennia katubut Tuhan sigalaiake sangamberi galaiakenennia kabagat gepgep samba sikua ka patuatnia: “Kasei siitco sita samba kasei siagai sita?”

¹⁶ Bulatnia sangamberinia anupabailokngan kam! Momoi pa tupakereake polak ottot ka sigalai pario', bailiu apa le igalai momoi ikua ka sipasigagalainia: “Ta nia amasigalai aku”; samba apa le sigalainia momoi ikua ka sipasigagalainia: “Taanai siagainia?”

Puaraugat ka lepat paoreiat

¹⁷ Ta pa goisoan le tetere, isili Libanon ibailiunia monen buat kaju, samba monen buat kaju nenda ibailiunia bakkat loina?

¹⁸ Kateteret nenda maarepnangan piura simatakkep ka sangamberi tiboiet ka sara buko, samba bela ka pugepgeman imaitco matatda simapeset.

¹⁹ Sangamberi sirimanua sipangongorik ituppai le geti angkat bagatda katubut Tuhan, samba sangamberi sirimanua simageba katalagat sirimanua mugora baga katubut Sipulugege, Taikamanuan Isarel!

²⁰ Kalulut sappru le geti sirimanua simagege simabuak patuat samba sipalololoi, samba tusubuake le geti sangamberi sirimanua siisiake sikatai,

²¹ sirimanua sijoake sirimanua sabagei, sirimanua sikeraake tuukumake sirimanua sikatai, sirimanua sipakakra tiboiet pabokoat bule ta rasilo katuroipoat sirimanua simatopit.

²² Kalulut nenda kuanangan si Tuhan, Taikamanuan muntogat Jakob, Nia sibelaake si Abraham: “Barania kineneiget taan isisilo puailaat si Jakob, samba taan mamumusi matania.

²³ Kalulut kateteret muntogat Jakob, masiitco sigalai kabeiKu katubutda, punenakerangan oningKu; punenakerangan Sipunenan, Taikamanuan Jakob, samba malotorangan katubut Taikamanuan Israel;

²⁴ sangamberi sirimanua sitaiagai patuat seserangan geti puaagai, samba sangamberi sipungungunyuk silorangan geti nganturat kabagat angkat baga.