Jes. 28 - BUKO SIPUNENAN

PASAL 28–35 PUOKKIMAN JERUSALEM SAMBA KABELAIATNIA Pamoilianan ka inan laggai Efraim

¹ Matei le kirit simalainge bakkatda sioba mulo simapuinengen tai Efraim, samba sangamberi pulaingeanda simalainge nenda kele ogo sitadda malaju sikuddu ka pata ka uddut susu simagabru sun le sirimanua simapuineng kalulut anggur.

² Bulatnia te, babara te sibara kai Tuhan sirimanua simaron tubu samba simagege, nia kele rusa talabari sialei urat bukku, samba rusa sabeu sipasisubuake, kele rusa talabari sialei urat simatirit sipasiloulouake; iraggaiake le geti sia ka polak kabagat golu.

³ Kirit simalainge bakkat simapuinengen tai Efraim nenda tupaperaki le geti pasamba rere.

⁴ Pulaingeannia simalainge, kele ogo sitadda malaju nenda sipukukuddu ka simabuak ka uddut susu simagabru, ibailiu le geti kele buat ara simamara siboiki kepei iali gogoi simalegeu. Kasei siitconia tenan le guknangannia kateteret iappeknia.

⁵ Ka tetere nenda Tuhan Sebaot ibailiu le geti kirit simaeru, samba pulaingean siabeu rubeiat paamianNia sipulelegei,

⁶ ibailiu le Nia geti ketsat katuroipoat ka sirimanua sipasiukum, samba bailiu puronan ka sirimanua sisakla pasaggangan ka ipot matabaliu sabeu.

Pamoilianan pagalaiat siuteake Jerusalem

⁷ Tapoi sirimanua sikuddu sene leu mapuineng kalulut anggur samba mapuineng kalulut arak. Tai imam samba leu tai nabi mapuineng kalulut arak, taan amakolou kalulut anggur; mapuineng sia kalulut arak, mapuineng kabagat pasiitco pamoilianan, maliggai kabagat masiala katakkikat.

⁸ Bulatnia te, sangamberi meja sun le gelek sangamberi kudduat taanai sitaimalolit.

⁹ Kuarangan sirimanua: “Kasei katubu ioba igelaiake puagaijatnia samba kasei katubu ioba ikolouake pamoilianannia? Ele ka tatoga simaruei mutottot, samba simaruei tugalak mutottot!

¹⁰ Kalulut buita nene buita nenda, buita kisene buita kisedda, tuppai nene, tuppai nenda!”

¹¹ Bulatnia, ka sangamberi sirimanua sipunganga ekke bagei samba ka sangamberi sirimanua sipunganga bagei manibo le geti si Tuhan ka bangsa nene.

¹² Nia sipaninibo katubutda: “Nene te kudduat puariat, kau kam puariat ka sirimanua sitaoi tubu; nene te kudduat puaroiat!” Tapoi ta raoba masirepi.

¹³ Oto raarepi le geti tiboiet Tuhan kele kisene: “Buita nene buita nenda, buita kisene buita kisedda, tuppai nene tuppai nenda!” bule katetetret rapuenung bele sia sipugagaila, mumauju, tulaba samba tutangsiake.

¹⁴ Kalulut nenda arepi kam tiboiet Tuhan, kam simaasa baga, siuteake bangsa nene sikuddu ka Jerusalem nene!

¹⁵ Kalulut anukuangan poi kam: “Akuapprangan kai palelengan pasamba kamateiat, samba kabagat laggaira taikabaga akubaraakean kai pukerekat baga; kenanen eba masitalu samba munemnem, ta ioorak kai; kalulut akubailiuakean kai paboboko sibailiu sakkeratmai, samba kabagat patajuat kulipputanake kai tubumai.”

¹⁶ Kalulut nenda kise te tiboiet Tuhan Taikamanua: “Bulatnia te, Kugalakngake le sibailiu bongen ka Sion sara bukku, silepa pili, sara bukku taiming simakeppu saki, sara bongen simaron: kasei simatonem baga, ta ipaingonia!

¹⁷ Kugalai le geti puroipoat sibailiu tali pasikire, samba pubulanan ibailiu tali pasiroipo; urat bukku masisabuiake geti pukuneman boko, samba oinan masiraggaiake geti pulippunannu.”

¹⁸ Palelengamui pasamba kamateiat nenda tutataake le geti, samba pukerekat bagamui pasamba laggaira taikabaga nenda taan tugagalaiake; ke eba masitalu samba munemnem, tata le kam iorak kam.

¹⁹ Senen ioi, giritnangan geti kam, kalulut moi le nia geti senen simansep, katetere sinago samba sinoibo; bulat kalotoakenen ke nuagai katukolobat tiboiet siarep nenda.

²⁰ Kalulut parate ta manananta geti nuperepmake kam tubumui samba sobbe ta malio nupakei kamnia masitabbo tubumui.

²¹ Kalulut si Tuhan tusuru le Nia geti kele siburu ka leleu Perasim, pugolunangan geti kele siburu ka Susut Gibeon, bule igalaiake galajetNia, siabeu samba igalaiake galajetNia, kiseiet.

²² Oto kalulut nenda, buian nupuasa kam baga, bule bui' imakope ron talit kakabemui, kalulut akuarep pagalaiat katusubuat bulat siorak kam sioi sibara kai Tuhan Taikamamnua Sebaot ka sangaliot laggai nenda.

Sikut patuat Tuhan

²³ Arepi kam tiboietku samba lelekngake kam patonekatku;

²⁴ Senen gogoi pa rapasikuiluk sirimanua, masipakkru samba rasabui polakda bule rapangurep?

²⁵ Ta pa lepat ragaktukake polak, isaragaiake simanda simapusu samba simanda simabulau, ikau gandum simareret samba jelai simapusu ka kudduatnia samba sekoi kabebenia?

²⁶ Atugelaiakeannia pagalaiat katukelatnia nenda, samba Taikamanua masikau enungan katubunia.

²⁷ Kalulut simanda simapusu ta tupakei masigulut pasikuiluk samba rodat gerobak ta tupakeinia masigulut simanda simabulau, tapoi simanda simapusu tugulut tupakei tutuddu, samba simanda simabulau tupakei tutura.

²⁸ Tugugulut pa gandum teret imaailit, ta, ta rasasagrinia sirimanua pat mabubunangan, kenanen raenungake ka uddut gandum nenda guguilut gerobak samba kuronia.

²⁹ Katukelat nene leu sibara kai Tuhan Sebaot. Nia kiseiet kabagat masiala katakkikat samba malatsat kabagat pusikuat patuat.