Jes. 27 - BUKO SIPUNENAN

Israel tuarauake le geti

¹ Kateteret nenda galaiakenangan geti si Tuhan pasiukuman pasamba masisausauake lanjauNia simalauru, sabeu samba simaron ka Lewiatan, ulou simalutlut, ka Lewiatan, ulou sipurorokko, samba mateiakenangan geti ulou naga ka koat.

² Kateteret nenda babara te monen anggur simaeru: “Puurai kam pagalaiatnia!

³ Aku, Tuhan, sijagonia; senen gogoi Kusubuinia. Bule ta rageugeunia sirimanua, sinago sinoibo Kujagonia.

⁴ GolukKu taan babara, ke kusese se'se simarui samba turuturu, saggangikungannia geti simaruei samba labokungannia,

⁵ kebai ragaba pukuneman katubukKu samba ragaba paaban pasamba Aku, Oo masigaba paabanan pasamba Aku!”

⁶ Ka gogoi sibabara, puungatnangan geti si Jakob puuraunangan samba pusinulanangan geti Israel samba sutakerangan polak pasamba buania.

⁷ Ta leu pa isusubuake paamianNia si Tuhan kele isubuake sirimanua sisubuake sia? Ele imamateiake pa paamianNia kele imateiake sirimanua simateiake sia?

⁸ Kabagat sitalau samba sikekle anusaggangi sia. Anupakaroakean sia Tuituiakenangan sia kabagat rusaNia simaron kateteret rusa sikalaut.

⁹ Kalilut nenda kise te aitataake puseleat Jakob samba nene te buania ke iareuake jonia: galainangan geti senengamata bukku kudduat buluakenen kele bukku kapur sisilaakenen, bailiu sappru sangamberi arigit bulungan samba kumanyang.

¹⁰ Kalulut laggai sipuirip nenda ibailiu simatangeu, sara kudduat sitaanai kabaga samba sikaddiuakenen kele kudduat simatangeu; togat jaui mukom le geti turuturu samba merep sedda masitataake ran loina.

¹¹ Ke amagarakngan sangamberi ran, oto tubakbakngake le; oirangan geti tainanalep samba laborangannia sibailiu loina paneu. Kalulut nene te sara bangsa sitaanai paatuat, niate lulunia sigalainia ta atupunutukinia baga, samba sibaraakenenia ta aipukatekinia baga.

¹² Oto tetere nenda pameraknangan geti si Tuhan barania kabagat oinan Efrat pat aili bagat oinan Misir, samba kam nene tururuake geti pasasara, ale tai Israel!

¹³ Ka tetere nenda tunauake geti pipiau sabeu, samba oirangan geti simapepepe ka laggai Asyur samba leu siribbaiakenen ka laggai Misir murekkuk katubut Tuhan ka leleu sipunenan, ka Jerusalem.