Jes. 26 - BUKO SIPUNENAN

Tuhan irip simaron

¹ Kateteret nenda urai nene rauraiake le geti ka laggai Jehuda: “Ka sita ai laggai simaron, siake puaragatta aigalaian si Tuhan irip samba kekre.

² Bukaake kam sangamberi matatbaliu sabeu bule tuguru' bangsa simaroipo samba simariuriu topit!

³ Sipupaatuat simaron Nujagonia kabagat paabanan, kabagat paabanan kalulut katubum le iputotonem baga.

⁴ Kau matonem bagam kai Tuhan teret buruburu, kalulut Tuhan Taikamanua iate bukku bulak simatom.

⁵ Kalulut aikalaakean sipulaggai ka kudduat simabuak; laggai sipususumbulat aiepeakean, epeakenanganNia pat aili ka polak samba ribbaiakenanganNia pat aili ka abu.

⁶ Reretda sirimanua sipangongorik, taddara sirimanua sitaioi tubu masipaparekinia geti.”

⁷ Enunganda sirimanua simatopit iate simaroipo, kalulut Ekeu le amasipapa enungannia simaroipo.

⁸ Oi Tuhan, aileu kungengenaake kai ka enungan puroipoatNu teterenia Nuenungake pasiukuman; obaket bagamai iate masisogai onim samba masirepdep Ekeu.

⁹ Ketsatku kurepdep Ekeu kateteret sinoibo, kisedda leu et ka muinet patuatku kugaba Ekeu kateteret simansep; aipoi ke amoian Ekeu masiukum polak, bailiu sikudduiji polak pasigelairangan geti aponia simaeru.

¹⁰ Ke tupununtuki baga sirimanua sikatai, ta masigegelainia aponia simaeru; galaiakenangan geti patajuat ka kudduat sibara surukat, samba ta iitco geti pulatsanan Tuhan.

¹¹ Oi Tuhan, KabeiNu Nuakkatnake, tapoi ta araitco. Eddangan raitco suksuk bagam kalulut paamianNu eddangan rasilo puailaat! Eddangan obengan masisubuake saggakNu masilabo sia pat sappru!

¹² Oi Tuhan, Nutarekake le geti aban ka kai, kalulut senengamata galaiakenenmai, Ekeu le masigagalaiake ka kai.

¹³ Oi Tuhan, Taikamanuamai, tai tuan sabagei arauteakean kai, tapoi sarat onim le kuabeuake kai.

¹⁴ Atataan sia, taan muririmanua sia minca, aibailiuan sia ketsat, taan tususuru sia minca; bulatnia te, anuukuman samba anusubuakean sia, samba anutataakean senengamata pasirerepdepda.

¹⁵ Oi Tuhan, anutuppaian igitda bangsa nene, anutuppaian simakope bangsa nene; anusiloan pulatsananNu anulioakean laggaira.

¹⁶ Oi Tuhan, kabagat puokkiman ragaba Ekeu; kateteret aiorak sia ukumNu, mureureu baga kabagat panindogat.

¹⁷ Kele sinanalep sipususuruket simalegere gogoinia ipusule, ipabeliu tubunia kakulut besi', mukatci kalulut besit pususule, kisedda te siboiki purimamnuaiatmai ka matam ale Tuhan:

¹⁸ Pusuruketmaian, pabeliunangan kai kalulut besi', tapoi kelean le kutu'tuake kai rusa: tamomoi kubaraake kai paroman ka polak, samba taanai sipututu mata sikuddu ka polak.

¹⁹ Oi Tuhan, paamianNu simamatei murimanua minca, tubutda simamatei tususuru geti minca. Kam sirimanua sirateiakenen kabagat polak tusurungan kam samba mugora baga! Kalulut tinobut Tuhan iate tinobut pato, samba polak masitu'tuake geti minca ketsat.

²⁰ Konan kam bangsaku, guruake kam ka bilikmui, papatake kam matatbaliumui ka teiteimui, pulipput kam simaruei, teret itusabau golu nenda.

²¹ Kalulut bulatnia te, ioba bela si Tuhan barania ka kudduatNia ipasiukum sipulaggai ka polak kalulut puseleatda, samba polak masipakoinong logau simapipili ka uddutnia, taan itatabo sangamberi sirimanua simateiakenen sedda.