Jes. 25 - BUKO SIPUNENAN

Pusurakat kalulut katusubuat saggak

¹ Oi Tuhan, Ekeu le Taikamanuangku; kuoba masiabeuake Ekeu, kuoba masiumun onim; kalulut anugalaiakean sangamberi sipinatum simakerek barania peile ka siburu atukatonemingan samba maron.

² Kalulut anugalaian laggai nenda ibailiunia parurukat bukku; samba laggai sipukekere baga nenda bailiu karagatat; bailiu iripra siooiake taan amurio sibailiu sara laggai, samba taan tugagalai minca teret buruburu.

³ Kalulut nenda sara bangsa simaron masiabeuke geti Ekeu; laggaira tai bangsa sikatai muloto le geti katubum.

⁴ Kalulut Ekeu ibailiu kudduat pujaujaugatda sitaoi tubu, kudduat pujaujaugatda simageba kabagat puokkimanda, pulippunan ka urat samba rusa talabari, pukuneman ka oloi sulu, bulatnia te, golura sirimanua sikatai kele rusa talabari katetere gogoi simaleppet,

⁵ kele oloi sulu ka kudduat simagarak. Tapoi pulamaugatda sioiake nuariake le geti: kele oloi sulu isaggeminia tanai rusa, kisedda te tuariake uraira sirimanua sikatai.

Punen pukokom bangsa-bangsa ka Sion

⁶ Tuhan Sebaot masitarekake geti ka leleu Sion nene, tutarekake sara punen pukoman pasamba komen simatabe, sara punen pasamba anggur bulat simaeru, komen simatabe samba sibara unou tolat, anggur simaeru silinaakenen.

⁷ Ka uddut leleu nene Tuhan masibiritake geti komak goni sitabboakenen ka senen bangsa samba tutu tututuake ka senen bangsa.

⁸ Itataake le kamateiat ka sanganantania; samba Tuhan Taikamanua masiposa geti elu ka sangamberi mata; samba puailaat paamianNia areuakenangannia ka sangaliot polak, aipoi aikuangan si Tuhan.

⁹ Kateteret nenda kuarangan geti sirimanua: Bulatnia, nene te Taikamanuanta, ngenaakenenta samba aiarauakean sita. Nene te Tuhan ngenaenta; kau tapugora baga samba muangka baga kalulut paromanNia sibaraakenenNia!”

¹⁰ Kalulut kabei Tuhan le geti masisakkeri leleu nene, tapoi Moab tupaperaki le geti ka kudduatnia, kele siperakat tupaperaki kabagat lobok simalolit.

¹¹ Kenanen irepaake kabeinia Moab kabagania kele sipulalalak irepaake kabeinia ipulalak, Ibakbakake le geti si Tuhan pubuangan patuatda kenanen aponia pa ragalaiake.

¹² Oto sangamberi iripnu simabuak bukatakenangannia samba ibuakenangannia, samba ribbaiakenanganNia ka polak samba ka abu.