Jes. 24 - BUKO SIPUNENAN

TIPPU 24–27 PAMOILIANAN PAGALAIAT KALEPAKAT POLAK Polak tusubuake

¹ Bulatnia te, isasabuite le geti polak si Tuhan samba jajakakenangan leu et nia, beliuakenangan geti uddunia, samba pasaragainangan geti sikudduijia.

² Oto kele sipuaaili ka purimanuaiat siberikabaga kisedda te purimanuan imam, kele purimanuant pagugulet simanteu, kisedda te purimanuaiat tuannia, kele purimanuan pagugulet sinanalep, kisedda te purimanuaiat tuannia sinanalep, kele purimanuan sipananaki kisedda te purimanuan sipasisasakiake, kele purimanuaiat sipasibabale, kisedda te purimanuan sipasibabaleake, kele purimanuan sipuutak kisedda te purimanuan sirimanua puutangan.

³ Tusabui le geti polak, samba turarau le geti pat sappru, kalulut Tuhan le amasikua tiboiet nene.

⁴ Polak makurut samba malaju, bulatnia, polak mangelei samba malaju, manua samba polak mangelei simakere.

⁵ Polak malolit kalulut sikudduijinia, kalulut arapasabau sangamberi surukat, rasili siteuakenen samba ta arareddet palelengan sitaitatata.

⁶ Kalulut nenda tusupaake le geti polak, samba sikudduijinia silorangan geti ukuman; kalulut nenda belekinangan geti sikudduiji polak, samba sirimanua mulegei goiso.

⁷ Suat anggur magarak, loinat anggur mungelei, samba sangamberi sipasinanam mubele baga.

⁸ Angkat baga ngangan rebana amuaringan, gaugaura sirimanua sipuangka baga atukapplungan, samba gorat baga ngangan kecapi amuaringan.

⁹ Taan anai sirimanua sipulolo anggur sialei urai, arak ibailiu mapongit ka sirimanua silonia.

¹⁰ Amakataian laggai simalamau, senen lalep atupatpatnan, taan momoi tuguruki.

¹¹ Maarep katci ka enungan kalulut taanai angggur, senengamata puangkakat baga apean, angkat bagat polak atataan.

¹² Sipulelegei kabagat laggai sarat simakakatai, matatbaliu atupakataian.

¹³ Kalulut kise te muaaili ka polak, katalagat sangamberi bangsa, kele kateteret sirimanua masinyoknyok buat zaitun, kele kateteret pasiappengan sikarua, ke atukapplungan pasimoneiat buat anggur.

¹⁴ Kabagat nganga sabeu rapuangka baga, kalulut puaabeu Tuhan, mugerei sia ka isit ka kabelekat sulu:

¹⁵ “Kalulut nenda abeuake kam si Tuhan ka laggai ka isit kabelaiat sulu, onin Tuhan, Taikamauan Israel, ka laggai ka bebet koat!”

¹⁶ Barania ka tutut polak arepmaian urai pasiumun: “Pulatsanan ka Sipuluroipo!” Tapoi pusogakungan: “Mangorik le aku, mangorik le aku. Matei le aku! Sipatataju mupatajuat, sipatataju riuriu le ragalaiake patajuat!”

¹⁷ Ale sikudduiji polak, tugegeake le geti kam, tujunung samba tusere!

¹⁸ Oto sipubabalau kalulut nau katugegekat tujunung le sia geti ka lobok, samba situsasakai sibara kabagat lobok alanangan sia geti sesere. Kalulut sangamberi lakket manua tunganga geti samba saisai polak mungeungeu.

¹⁹ Polak subu, polak anau, polak mungeungeu.

²⁰ Pare'renangan polak kele sirimanua silo simapuinengen samba muuilak kele sapou iboroinia rusa; jo taimareddetnia ioraknia simakope, tubailunangan samba taan tususurunia minca.

²¹ Oto ka gogoi nenda si Tuhan masiukum geti saladdut manua ka manua samba tai rimatat polak ka polak.

²² Tururuake le sia geti simakere, kele sipatpatakenen ituguruake kabagat ngaliu; tuguruake le sia kabagat tangsi samba tuukum le sia geti pasat tetere simaburu.

²³ Laggo pagogoi mataggop geti, samba oloi sulu isilo kaailaat, kalulut Tuhan Sebaot muparenta le geti ka leleu Sion samba ka Jerusalem, samba patoilanangan geti pulatsananNia ka sikebbukat laggai ka paamianNia.