Jes. 23 - BUKO SIPUNENAN

Ukuman Tuhan ka tai Tirus samba Sidon

¹ Nene te tiboiet ka tai Tirus. Pugeri kam, sangamberi kapa' Tarsis, aipoi amuailingan katukataikat, taan anai lalep. Kateteret arasege baratda ka laggaira tai Kitim pagalaiat nenda atupaagaian katubutda.

² Putangoan kam, ale sipulaggai ka bebet koat, ale sipujajaga tai Sidon, sapakoinienmui masiabangi koat, samba mulajo ka koat simalio.

³ Ka senen katujologat bibilet pajagam iate gandum ka Sihor samba buat mone sibara ka laggai Nil, bailiu laggai nenda pasakiat bangsa-bangsa.

⁴ Agai kam aila ale tai Sidon, ale irip ka bebet koat, aipoi koat manibo “Tapei akuorik besi samba ta amusule aku, ta'pei akuurau tatoga silainge samba masipasikeli tatoga siokko.”

⁵ Kateteret aimaarep pat aili ka Misir, malotorangan geti kele kateteret araarep katuagaiat pagalaiat Tirus.

⁶ Pujaujau ka Tarsis, pugeri kam, ale sipulaggai ka bebet koat!

⁷ Nene pa laggaimui simangka baga, laggai barania peile siburu? Ta pa bakkounia le aiambitnia ka kudduat ka sareunan bule ikuddu sedda?

⁸ Kasei amasiteuake nene kai Tirus, sipanguruatake kirit pubebeunan, sipujajagania iate sirimanua siabeu tiboi tubu samba sipasisasakiake iate sirimanua suruket ka polak?

⁹ Tuhan Sebaot amasiteuakenia masipaloloi pubuangan patuat, amasipaepe sirimanua suruket ka polak.

¹⁰ Galai monem kele nugalai pumoneat ka bebet bagat oinan Nil, ale tainanalep Tarsis, aipoi pasigalaiat kapa taan anai!

¹¹ Aitotoiakean kabeinia si Tuhan ka koat samba bailiunangan sangamberi purimataat muloto; Nia masikau parenta pagalaiat Kanaan bule itusubuake sangamberi kekrenia.

¹² KuananganNia: “Taan muangka ekeu baga, ale toga siokko silepa tupalolit, ale okko Sidon! Suruake kam, pujaujau kam ka tai Kitim! Sedda leu taanai geti pusananganmui.”

¹³ Itco kam laggaira tai Kasdim! Bangsa nenda amasigalaiake, ta tai Asyur. Arasegeakean Tirus ka tarimeu sikuddu ka simatangeu, ararioakean pujagoat pasialou samba arabukkatakean sangamberi uma purimataat laggai nenda samba bailiuakerangan leu laggai nenda karagatat.

¹⁴ Pugeri kam, ale sangamberi kapa Tarsis, kalulut atupakataian iripnu!

¹⁵ Kateteret nenda tukalipogi le geti Tirus pitu pulu ngarura burunia, kele igit rurat sara rimata. Ka pangampulat pitu pulu ngarura nenda, muaili te ka Tirus kele kabagat urai pagalaiat sinanalep simaolop tubu, kise:

¹⁶ “Ala kam kecapi, bokko kam laggai, ale simaolop sikalipogiet! Bobo simakolou, uraiake urai simigi, bule rarepdep ekeu.”

¹⁷ Ka pangampulat pitu pulu ngarura nenda, pasikelinangan geti Tirus si Tuhan, bailiu silonangan upa puolomannia, samba puolopnangan tubu ka sangamberi purimataat ka polak.

¹⁸ Uktuk samba upa puolomannia masipunenannangan geti kai Tuhan, ta tukekera samba ta tukokoiriake, tapoi ka uktuknia nenda tutarekake le geti komen simemetnia samba leppeira simalainge sirimanua sikuddu ka matat Tuhan.