Jes. 22 - BUKO SIPUNENAN

Tiboiet Tuhan ka sipulaggai ka Jerusalem

¹ Tiboiet Taikamanua ka “Su'sut Pamoilianan.” Aponia sibabara katubum bailiu sikudduiji ekeu tusakai ka uddut lalep.

² Ale laggai simalamau samba simagora baga, ale laggai sipuangka baga? Aramatei sikudduiji ekeu ta kalulut lanjau samba leu ta kalulut ratata kabagat pasaggangan.

³ Sangamberi sautet saladdumui mutuitui simakere, aralabaan sia kepei rapanaake siloguira; sangamberi silaba tupatpatake simakere, kenanen amuituian sia ka sareunan.

⁴ Kalulut nenda aku masikua: “Pisikake matam katubukku, eddangan kupusou kabagat besit patuat; bui' nupusuibi kam aku, bule imangka bagakku kalulut katusubuat okkot laggaiku.”

⁵ Tuhan, Sebaot masibaraake gogoi katugegekat, katukalaat samba pulamaugat, ka gogoi nenda ka “Susut pamoilinanan” maarep imabukkat irip samba gerei masitiddou paroman pat aili ka uddut leleu!

⁶ Tai Elam arapatarekngan salukat silogui, ka uddut kereta matarek pasamba saladdu sipukukuro, samba Kir masipatarek korabbi.

⁷ Oto sangamberi su'sunu bulat simaeru masun le Kereta samba sun le saladdu sipukukuro, muenung sia masimattai matatbaliu gugurukat,

⁸ oto sappru le pukuneman Jehuda. Kateteret nenda itcomuian pugalai pamatei ka “Lalep Leleu”.

⁹ Itcomuian kopet iginia sibaranan irip laggai David samba ruruakemuian oinan sibara ka kolam ka tei:

¹⁰ addemuian sangamberi lalep ka Jerusalem, samba bukatakemuian sangamberi lalep nenda bule nuparon kam irip;

¹¹ galaimuian kudduat paninot oinan kapaoggangan rua irip nenda bule itino oinan sibara ka kolam siburu; tapoi ta anumattai kam katubuNia sipasibabaraake, samba ta anuitco kam Nia sigalai sangamberinia nene kateteret siburu peile.

¹² Kateteret nenda Tuhan, Tuhan Sebaot masisogaake bule rapusou sirimanua samba mugeri, masiguluk ute samba masilailaiake komak goni;

¹³ tapoi itco, abara geti angka baga samba pugorakat baga, masijaja jaui samba masiteggeli biribiri, mukom akkula samba mulo anggur, sialei soga, “Kauan tapukom kam samba mulo, kalulut mansep matei sita!”

¹⁴ Tapoi Tuhan Sebaot masipatoila tubu ka piuku, “Bulatnia te, puseleatmui nene ta tuappeake, teret matei kam,” tiboiet Tuhan, Tuhan Sebaot.

Pagalaiat Sebna samba Elyakim

¹⁵ Kise te tiboiet Tuhan sipulubeunan: “Kenan ka siuteake uma purimataat nene, kai Sebna sipasikeli uma purimataat, samba kuanungan:

¹⁶ Aponia nugagalai sene, kasei taikebbukatnu sene, pat gaigainungan rateinu sene, ale sigaigai rateinia ka kudduat simabuak, sipasipapae kudduatnia ka leleu bukku?

¹⁷ Bulatnia te, ibabaijukake te ekeu si Tuhan ka sareunan, ale simaron tubu! Itarakup le geti ekeu simaron

¹⁸ samba purutakenungan simaron bailiu sara bubu; siguiluake ekeu kele bola ka polak simalio sedda te numamatei, samba sedda te ikukuddu sangamberi kereta pasaggaknu, ale ekeu sipakaila sangalalep tuannu!

¹⁹ Kuriribbaiake le ekeu geti ka galajetnu puukuketnu, samba kugorosotake pangkatnu simabuak.

²⁰ Oto kateteret nenda sogaikungan te geti paguguletKu, si Elyakim togat Hilkia:

²¹ Kulelepeiake te leppeinu katubunia akkik tengam Kuakkikake katubunia, samba gegem Kukakau ka kabeinia; bailiunangannia geti ukkui ka muntogat Jerusalem samba ka muntogat Jehuda.

²² Kugagalake te geti kuksik lalep David ka uddut ta'tania: ke inga'ngaake, taanai sioi masipatpatake; ke ipatpatake, taanai sioi masinga'ngake.

²³ Kuibbiake te nia kele turi ka irip simaron bailiunangannia geti uddenan puaabeu ka muntogatnia.

²⁴ Tutoakake le geti katubunia sangamberi bairanen ka muntogatnia, sinula samba silibetat, sangamberi pugalai sigoiso, barania pulokat pat aili koali sabeu.

²⁵ Kateteret nenda, kise te tiboiet Tuhan Sebaot, turi siibiakenen simaron ka irip simaron nenda, taan maroron, bailiu mabakbaknangan samba bele, samba sangamberi bairanennia nenda makatainangan. Bulatnia, Tuhan le amasikua.”