Jes. 21 - BUKO SIPUNENAN

Tiboiet Tuhan ka Babel

¹ Tiboiet Tuhan ka “Kudduat simatangeu ka bebet koat”. Kele kasoubaliok iorak polak Negeb, kisedda te ioi barania ka kudduat simatangeu laggai kalotoakenen.

² Atupaagaian katubukku pamoilianan kalotoakenen: “Sipananangkou manangkou, sipasikakatai masipakatai! Konan, ale Elam, alouan, ale Madai! Kuariake le sangamberi pusaggoat sibaraakenennia.”

³ Kalulut nenda mabesinangan tengangku, imunnangan bagakku kele imun bagat sinanalep sipususule pakoukounangan aku, kalulut siarepku tuge'gekungan, kalulut aponia siitcoku.

⁴ Patuatku malalu, katuge'gekat masisaluki aku. Soibo ngenaakenenku nenda kineneiget bailiu kalotoakenenku.

⁵ Meja tutarekake kudduat uddenan tupakolou sirimanua mukom samba mulo, “Ale sautet saladdu! Patarek kam tubumui! Tulaiji kam korabbi!”

⁶ Kise te tiboiet Tuhan katubukku, “Kenan, galakake sara sipananaiko, aponia siitconia buita ipaagaiake.

⁷ Ke iitco saladdu sipukukuro sipararara, saladdu sipukakalidei samba sipuunta, buita ilelekake simakolou, samba sibulatnia.

⁸ Iageti pusoganangan sipujajago nenda: “Ka kudduat panaikoat, ale tuanku, mariuriu kupurio sanganantat gogoi samba ka kudduat pujagoat kumatarek, sinago samba sinoibo.”

⁹ Itco, amoian sangabagguak sirimanua, sirimanua sipukukuro sipararara! Lepa pusoganangan, “Amubakkatnan, amabukkatnan Babel, samba sangamberi tularat bulungannia amasaragaian ka polak.”

¹⁰ Ale bangsaku silepa tupaperaki samba silepa tulotlot Aponia siarepku sibara kai Tuhan Sebaot, Taikamanuan Israel, akupaagaian katubum.

Tiboiet Taikamanua ka Duma

¹¹ Tiboiet Taikamanua ka Duma. Ai sara sipusosoga katubukku sibara ka Seir: “Ale sipujajago, maburu peile soibo nene? Ale sipujajago, maburu peile soibo nene?”

¹² Aleginangan sipujajago nenda: “Mapapatoan le, tapoi masoibo peile. Ke noba parere, konan nurereakenia minca.”

Tiboiet Tuhan ka Arabia

¹³ Tiboiet Taikamanua ka Arabia. Ka bakkat loina ka Arabia nupugogoi kam, ale sipajajaga tai Dedan!

¹⁴ Ale kam sipulalaggai ka Tema, belaake kam, kau kam lo'ra simaonggou, kenan kam, rauma kam sirimanua sipujajaujau samba kau kam komenda.

¹⁵ Kalulut amutuitui sia baratda, ka lanjau situpupunu, ka rourou situbebetek, samba oloi pasaggangan.

¹⁶ Kalulut kise te tiboiet Tuhan katubukku, “Aile sangarura, siripot tetere pugagalaira saladdu siupaiji, oto tata le geti sangamberi puaabeura tai Kedar.

¹⁷ Sipupapana tai Kedar simagege, mulegei le sia goiso, kalulut kise te tiboiet Tuhan Taikamanuan Israel.”