Jes. 2 - BUKO SIPUNENAN

Sion sibailiu kudduat purimataat paabanan

¹ Tiboiet sipoiliat katubut Jesaya togat Amos pagalaiat Jehuda samba Jerusalem.

² Muaaili te ka kalepakat gogoi leleu kudduat uman Tuhan muririo te geti ka tirit paleleuleleu samba musumbulat ka patinambutinambu; senen sirimanua moi le sia geti simakere,

³ samba maigi te sirimanua siei sedda, kuarangan: “Sita, manatra ka leleu Tuhan, ka uman Taikamanuan Jakob, bule igelaiake sita pagalaiat enunganNia samba bule tapuenung taenunginia, kalulut sibara ka Sion bebela te nganturat samba tiboiet Tuhan sibara ka Jerusalem.”

⁴ Bailiunangan te getiNia sipasiukum katalagat sangamberi laggai, samba sipasiteteuake ka sirimanua simigi; paddairangan geti lanjaura ibailiu sasabik samba simuine bakkat bailiu balatu pasisapu; taan raoppat lanjau sirimanua ka sirimanua, samba taan masigegelai sia pasaggak.

⁵ Ale, muntogat Jakob, sita kam muenung kabagat patot Tuhan!

Ukuman Tuhan ka sangamberi sirimanua sibuakake patuatnia

⁶ Bulatnia, anuribbaiakean paamianNu, iate muntogat Jakob, kalulut ka senen kudduat ragalaiake kerei kele simaturere ragalaiake sia sirimanua ka isit sikalaut samba putatawa kele tai Filistin, samba sirimanua siooiake katalagatda makope igi.

⁷ Laggaira sun le mas samba perak, samba pukaioatda bulat maigi; laggainia sun le kuro samba kereta pasaggak bulat maigi.

⁸ Laggainia sun le sabulungan murekkuk le sia manindou ka sigalai kabeira samba ka sigalai kabeira.

⁹ Bailiu sirimanua tupaloloi samba sirimanua tuepeake – bui' nuaappeake sia ale Tuhan.

¹⁰ Guruake kam ka oilak leleu bukku samba pulipput kam kabagat ngaliu polak kalulut kopet golut Tuhan samba kalulut laingen pulatsananNia.

¹¹ Sirimanua simabuak patuat tuepeake, samba sirimanua simaukkat tupaloloi; samba sarat Tuhan le siabeu ka gogoi nenda.

¹² Kalulut Tuhan Sebaot masiteuake sara gogoi masiukum sangamberi simabuak patuat samba simaukkat samba leu masiukum sangamberi simaoddoi, bule ituepeake;

¹³ ituukumake sangamberi loina pinilok ka Libanon sipututu'tu simabuak samba simariuriu musumbulat, samba masiukum sangamberi loina sokut ka Basan;

¹⁴ masiukum sangamberi leleu simabuak samba sangamberi tinambu sipusumbulat ka pata;

¹⁵ masiukum sangamberi kudduat pujagoat simabuak samba sangamberi irip simaron'

¹⁶ masiukum sangamberi kapa'ra tai Tarsis samba sangamberi kapa' bulat simalainge.

¹⁷ Sirimanua simabuak patuat tuepeake le geti ka gogoi nenda.

¹⁸ Oto sabulungan geti mapepe le.

¹⁹ Guruake kam ka ngaliu leleu bukku samba pulipput kam kabagat lobok polak kalulut kopet golut Tuhan samba kalulut laingen pulatsananNia, kateteret ioi ipalotoki polak.

²⁰ Ka gogoi nenda sabulungan perak samba sabulungan mas sigalai kabei sirimanua bule rapurekkuk manindou katubunia turibbaiake le geti ka birut samba ka leituak,

²¹ samba tuguru le getinia ka polou leleu bukku samba ka paoggangan tinambu simabukku kalulut kopet golut Tuhan samba kalulut pulaingean pulatsananNia, kateteret ioi ipalotoki polak.

²² Bui' nupukaronan ka sirimanua, kalulut ta abelenia kele enga siulupakenen, samba taanai katukaunannia.