Jes. 19 - BUKO SIPUNENAN

Ukuman Tuhan ka tai Misir

¹ Nene te tiboiet Tuhan pagalaiat Misir. Itco, mei le si Tuhan simaola kabagat tanai rusa samba meiNia ka Misir, oto sangamberi bulunganda tai Misir mugeret tubu ka mataNia, samba maneleinangan bagatda tai Misir.

² Kututubbui te tai Misir rasaggangi tai Misir, bule rapasaggak, senen sirimanua masisaggangi sarainania, samba senen sirimanua masisaggangi aleinia, laggai masisaggangi laggai, purimataat masisaggangi purimatat;

³ bailiu tata le ron patuatda tai Misir, samba siisiakenenda pakataikungannia; oto tiddourangan geti enungan ka sabulungan, ka sipananae, ka ketsat samba ka ketsatda sipatutuptup.

⁴ Kusesegeake te tai Misir ka kabei sara sipaneinei sikatai, samba ka sara rimata sikatai masipaneinei sia; kise te tiboiet Tuhan Sebaot.

⁵ Tata le geti oinan kabagat oinan Nil, samba bagat oinan nenda ibailiu magarak,

⁶ bailiu mabutenangan sangamberi sopak, samba makalenangan sangamberi sopak sigoiso ka bagat oinan Nil, popoupou samba boroboroi ibailiu malaju.

⁷ Turuturu ka bebet bagat oinan Nil samba sangaliot polak pangaraman ka bebet oinan Nil ibailiu le geti magarak iboroinia rusa samba taan babara minca.

⁸ Sangamberi sipujajalo mukatci samba mureureu baga, iate sangamberi sipasikakabli ka bagat oinan Nil; sangamberi sipangangabli sedda pangorikrangan leu et.

⁹ Sangamberi sirimanua sipasigagalai komak juto silorangan leu et puaailaat, sangamberi tainanalep sipasititikai samba sipamumutre mamusinangan matatda.

¹⁰ Sipasigagalai komak mangeleinangan bagatda, sangamberi sipugagalai siupaiji pureureurangan baga.

¹¹ Sangamberi tai rimata ka Zoan iate sitaiagai patuat; sangamberi sipangantru si Parao bulat simasiku patuat masikau nganturat sitaimaeru. Kipa ioi nukua kai Parao: “Aku nene togatda simasiku patuat, tagatda rimata siburu?”

¹² Kaipa sia sipangantru simasiku patuat nenda? Bule rasegeake samba rapaagai aponia siteuakenen Tuhan pagalaiat Misir.

¹³ Siabei tiboi tubu ka Zoan iate sirimanua sitaiagai patuat, Siabei tiboi tubu ka Memfis atupatajungan; samba sikebbukat laggaira arapapuinengan tai Misir.

¹⁴ Aiuruakean si Tuhan katalagatda sara ketsat sikatai, samba papuinengrangan Misir ka sangamberi galajetnia, kele sirimanua simapuineng kateteret ipugelek.

¹⁵ Taan anai situeddet ka galaiakenenda tai Misir sigalaiakenenra saute, samba sipasitutut sia, siabeu tiboi tubu samba siberikabaga.

¹⁶ Kateteret nenda ibailiu le geti tai Misir kele sinanalep, mugeret tubu samba tuge'ge le sia kalulut itotoiake kabeiNia si Tuhan Sebaot.

¹⁷ Oto polak Jehuda ibailiu le kalotoakenenda tai Misir senen rarepdep siteuakenen Tuhan Sipulugege pagalaiat sia.

¹⁸ Kateteret nenda ngangan Kanaan rapakei le geti ka lima laggai ka Misir. Sangamberi sirimanua sedda musuppa le sia ka onin Tuhan Sipulugege. Sara katalagat laggai nenda tuoniake le geti “Ir-Heres.”

¹⁹ Kateteret nenda babara te katalagat laggai Misir kudduat pasibuluat kai Tuhan, samba ka pasongannia sara arigi bukku sikokoiakenen kai Tuhan.

²⁰ Kudduat pasibuluat samba arigi nenda iate sibailiu toggaiat kababarania si Tuhan Sebaot ka Misir. Ke rapaoreiji sia, pusogarangan leu ratiddou paroman katubut Tuhan, samba Tuhan masikoiniake sara siarauake sia samba sibesiabesia samba sibelaake sia geti.

²¹ Pakoinongnangan te geti tubuNia si Tuhan katubutda tai Misir, samba agairangan leu si Tuhan samba panindourangan katubuNia samba ambitrangan buluakenen sijaja samba panguruat komen sitotoiakenen katubuNia. Galairangan leu palelengan katubu Tuhan samba luluirangan leu suppa.

²² Iukumake te tai Misir si Tuhan. Masiukum le Nia samba masialeake, samba toilirangan leu katubut Tuhan samba arepinangan leu panindogatda samba aleakenangan sia.

²³ Kateteret nenda babara te geti enungan sabeu barania ka Misir pat aili ka Asyur, bailiu tai Asyur oinangan ratuguru ka Misir samba tai Misir leu et oinangan raei ka Asyur, samba panindourangan leu tai Misir sambatda tai Asyur.

²⁴ Kateteret nenda Israel, sibailiu purimataat sikatelu lepat Misir samba Asyur, samba ka telu bangsa nene bailiunangannia panukanan ka sangaliot polak.

²⁵ Sukatakenangan sia Tuhan Sebaot, kuanangan: “Tusukatake le Misir paamianKu samba Asyur sigalai kabeiKu samba leu Israel bakkatKu.