Jes. 18 - BUKO SIPUNENAN

Tiboiet Tuhan ka tai Etiopia

¹ Ale! Laggai abak sibara kappo ka sanganantat bagat sangamberi oinan Etiopia,

² sipasiake punutubu sienungi koat kabagat abak pandan masiabangi uddut oinan! Kenan kam, ale sapakoiniet simaagai, ka sirimanua simananta tubu samba sipukulit simakirisau, ka muntogat kalotoakenen ka legre samba ka sareunan, ka bangsa simaron tubu samba sikatai, ka laggai sasabaugat sangamberi oinan.

³ Ale sangamberi sipulaggai ka polak, ale sangamberi sikudduiji polak! Ke aturioakean toggaiat ka sangamberi leleu, itco kam; ke atunauakean pipiau, arepake kam!

⁴ Aipoi kise te tiboiet Tuhan katubukku: “Ai Aku ka kudduatKu, Kulelelekake te sipulelelek, kele tinobut simaoloi sipugogokgok kateteret oloi sulu, kele tibobut oloinia pasimoneiat.”

⁵ Kalulut kepei iali pasimoneiat, kateteret itukapplu tetere pubotcokatnia, samba tapei amara buat anggur ka buttetnia, oto isaggri le si Tuhan sangamberi rannia pasamba balatu, samba karitakenangan sangamberi rannia bule itutippu.

⁶ Sangamberi nenda tukaddiuake le geti kabagat sangarurukat ibailiu komen paumauma' simasabbak ka leleu, samba komen tarimeu ka bakkat loina. Kateteret gogoi simalegeu pukuddunangan uma' simasabbak sedda samba sanengamata uma' ka gogoi simaleppet.

⁷ Kateteret nenda leu et tupanguruatake le katubut Tuhan Sebaot sibara ka muntogat simananta tubu samba sipukulit simakirisau, samba sibara ka muntogat kalotoakenen ka legre samba ka sareunan, iate sirimanua simaron tubu samba sirimanua sikatai sipulaggai sisabau sangamberi bagat oinan, ka kudduat onin Tuhan Sebaot, iate leleu Sion.