Jes. 17 - BUKO SIPUNENAN

Ukuman Tuhan ka tai Aram samba Efraim

¹ Tiboiet Tuhan pagalaiat Damsyik. Bulatnia te, Damsyik ta maririuriu ibailiunia sara laggai, tapoi ibailiu le nia sara rurukat simararagat.

² Sangamberi laggai sigoiso rakaddiuake le teret buruburu samba bailiunangannia kudduat mungkuat tarimeu, sipeperep samba berisara sirimanua sipasigegeugeu.

³ Tata le geti pujagoat simaron ka Efraim samba geget purimataat tata le geti ka Damsyik, kisedda leu et tai Aram sipulelegei, tata le sangamberitda makere kele pulatsananda tai Israel. Kisedda te tiboiet Tuhan Sebaot.

⁴ Oto kateteret nenda magulainangan leu pulatsanan Jakob, samba erut puririmanuania leu magulainangan;

⁵ purimanuaiatda kele gandum sirakkutakenen sirimanua bule itugetai samba kabeinia masiappek ottinia; ele kele luiku siabbutda sirimanua ka su'sura tai Refaim.

⁶ Tapoi mulelegei te katubunia appengen ka gogoi sibabara kele kateteret ragetai buat zaitun, mulegei sara ele rua ka tu'tut buttetnia samba piga pa ka rannia, kisedda te tiboiet Tuhan, Taikamanuan Israel.

⁷ Kateteret nenda sirimanua masimattai katubuNia sibaraakenia, samba matatda masiitco Sipunenan, Taikamanuan Israel;

⁸ taan imamatai ka sangamberi kudduat pasibuluat sigalai kabeira, samba taan raitco ka sigalai kabeira, iate sangamberi arigit bulungan samba pasilabokat kumanyang.

⁹ Kateteret nenda tukaddiuake le geti sangamberi laggainu ibailiu masaingere, kele siburu laggaira tai Hewi samba tai Amori sikadiuakenenda kalulut tai Israel.

¹⁰ Kalulut anukalipogingan Taikamanua siarauake ekeu, samba ta anurepdep leleu bukku sibailiu ronnu. Kalulut nenda kenanen nugalai, mone simalainge samba nupangureminia uremen bulat simaeru,

¹¹ kenanen nukekre simakolou kateteret nupaureminia samba ka mansepnia pusibotconangan, kenanen kisedda, sappru le pasimoneiat ka gogoi pangoringan, kateteret taioi tualeake pangoringannu.

Ukuman Taikamanua ka tai Asyur

¹² Ale! Kopet lamaunia sangamberi bangsa, goknia kele ipugok onun koat ukkut bangsa-bangsa ipuukku kele ipuja oinan sabeu.

¹³ Sangamberi sirimanua mulamau kele muja oinan sabeu; tapoi aseakenangan sia geti bailiu putuituirangan ka sareunan tukukru kele kulit berak ka leleu iboroinia rusa, samba kele pokkai simaalit iboroinia kasoubaliok.

¹⁴ Kateteret kepei iali kasoibokat, baranangan leu katugegekat! Kepei iaili simansep, taan anai sia! Nenda te rubeitda sirimanua sinangkou sita, samba nenda te siteuakenen ka sangamberi sirimanua sipasiraurau sita.