Jes. 16 - BUKO SIPUNENAN

¹ Kaurangan togat biribiri katubutda siuteake laggai, sibara ka Sela sienungi kudduat simatangeu ka leleu okko Sion.

² Kele uma' ituitui ituburut, samba situusi kabagat rumunnia, kisedda tatoga tainanalep ka Moab ka sangamberi kudduat putalipokat bagat oinan Arnon.

³ “Kau kam nganturat, samba teuake kam, kau ibailiu kam pukuneman kateteret oloi sulu; lipputake kam sangamberi sirimanua siribbaiakenen, bui' nupataju kam sangamberi sirimanua situtuitui!

⁴ Obaake sangamberi sirimanua siribbaiakenen sibara ka Moab rakuddu katubum, kau ibailiu ekeu pulippunanda katubutda sipasisubuake! Ke atukapplungan sipasitataju, samba ke atusabauan pasisubuat samba leu ke atatan sirimanua sikatai ka laggai,

⁵ oto turioake le geti sara uddenan purimataat kabagat nuntut baga samba ka uddutnia, kabagat sapou David, mukuddu le geti simariuriu sara sipasiukum sirioake katuroipoat, samba simaruei masigalaiake pubulanan.”

⁶ Akuarepman kai pagalaiat buak patuatda tai Moab, bulat maukkat sia, pagalaiat purorot baga samba ngongoi bagania, samba pagalaiat tiboiet sitaimaeru.

⁷ Kalulut nenda eddangan rapusou tai Moab, rasoibo pasasambatda, eddangan rapusou sangamberitda. Rarepdep komen simananam simareirei rakom ka Kir-Hareset Eddangan rapukatci samba ramakatai simakope!

⁸ Kalulut sangamberi mone Hesbon mureureu baga kisedda leu et mone anggur Sibma buat anggurnia simaeru aipapuinengingan sipaneinei bangsa; loinat anggur nenda siburu makakra pat aili ka Jaezer mulalak pat aili ka kudduat simatangeu sangamberi rannia munanta pat aili ka silat koat.

⁹ Kalulut nenda musou le aku pasamba Jaezer kalulut loinat anggur Sibna; kuoba kusuaiji ekeu pasamba elukku, ale Hesybon samba Eleale, kalulut atukapplungan angkat baga samba gorat baga ka pasimoneiat buat kaju samba pasimoneiat gandum.

¹⁰ Taanai angkat baga samba gorat baga sibara ka monen buat kaju; samba leu ka monen anggur amapepengan gerei gorat baga; taanai sipasipipiot anggur ka kudduat pasipionan, amuaringan gereira.

¹¹ Kalulut nenda, kele kecapi ipunau, kisedda te ipukatci patuatku masiitco purimanuaiat Moab, samba patuatku ka Kir-Heres.

¹² Kenanen mei tai Moab manindou samba kabesit tubu rapanatra ka uddut leleu pasibuluat samba tuguru ka kudduat sipunenan bule rapanindou, ta aisilo aponia pa.

¹³ Nenda te tiboiet Tuhan sikuaNia pagalaiat Moab kateteret siburu.

¹⁴ Tapoi kineneiget Tuhan masikua, “Kabagat telu ngarura, siripot tetere pugagalaira saladdu siupaiji, oto pubebeunan Moab, pasamba pusangamberi pukayoat atciakenenda, ibailiu le geti loloiet, samba sirimanua sipulelegei ta maigi sia samba ta ibabailiu sia saute.