Jes. 15 - BUKO SIPUNENAN

Ukuman Tuhan ka tai Moab

¹ Tiboiet Tuhan pagalaiat Moab. Bulatnia te, kabagat sangasoibo Ar-Moab atupakataian, atusubuakean; bulatnia te, kabagat sangasoibo Kir-Moab atupakataian, atusubuakean!

² Okkot Dibon manatra ka leleu pasibuluat musou; Moab mugeri kalulut Nebo samba Medeba. Sedda te rukuilu utera sangamberitda samba rakirit bulut ngungunda sibailiu toggaiat reureu baga.

³ Sangamberi sirimanua ka enungan mukomak goni toggaiat reureu baga, ka uddut lalep samba ka sangamberi polak simalio sangamberitda mugeri, aibebela elutda.

⁴ Hesbon samba Eleale murou, nganganda maarep pat aili ka Jahas. Kalulut nenda sangamberi sirimanua sibara pamatei ka Moab musoga, mugeret le tubutda kalulut loto.

⁵ Mugeri le aku kalulut kuitco Moab, sipujajaujau aiailingan sia ka Zoar, Eglat-Selisia. Bulatnia te, manatra le sirimanua ka panatarat Luhit sialei sou; samba ka enungan siei Horonaim mugerei le sirimanua kalulut iorak sia gejat baga.

⁶ Bulatnia te, oinan ka Nimrim ibailiu magarak samba turuturu amagarakngan, turuturu sibau asapprungan, taananai sipututu'tu sibau simalibbut.

⁷ Kalulut nenda sangamberi pukayoat siruruakenenda samba sangamberi sikoiriakenenda ambitrangannia ka silat oinan Haarabim.

⁸ Bulatnia te, gerei nenda maarep le geti ka sangaliot Moab, soura maarep pat aili ka Eglaim, samba pat aili ka Beer-Elim.

⁹ Bulatnia te, bagat oinan ka Dibon asutan logau, tapoi gejat baga siorak Dibon kututuppaiake le minca, iate sibebela ka Moab itarakkup le sia geti singa samba sipulelegei ka laggai nenda.