Jes. 14 - BUKO SIPUNENAN

Pageigeiat pagalaiat rimata Babel

¹ Ipununtuki le baga si Tuhan Jakob samba Israel paamianNia, samba ipili sia minca sibailiu bakkatNia samba obaakenangan rakuddu ka laggaira. Oto sirimanua siooiake oirangan leu paruru katubutda samba musara ka muntogat jakob.

² Maigi te bangsa siropake tai Israel bule ratoili ka laggaira, lepa tai Israel bakkatirangan bangsa nenda sibailiu paguguletda taimanteu samba paguguletda tainanalep. Kisedda rapatpatake geti sangamberi sirimanua sipatpatake sia samba masikupkupake sangamberi sirimanua sipaoreiji sia.

³ Oto ka gogoi ikappluake si Tuhan besi samba pangoringamui samba pugagalai siubbuakenen siakera katubumui,

⁴ oto paagaimuian pageigeiat nene pagalaiat rimata Babel, samba masikua: “Ah, atukapplungan ka sipaoorei atukapplungan ka sirmanua sikatai!

⁵ Aibakbakakean tutura'ra sirimanua sikatai, samba lilieira sirimanua sipupaneinei,

⁶ sibobo sangamberi bangsa kabagat ngoingoi baga, pasibobobo sitaipuari; sipaperaki sangamberi bangsa kabagat golu sitaanai arinia.

⁷ Sangaliot polak amaabanan samba masanang; muangka baga le sangamberi sirimanua kabagat angkat baga.

⁸ Kisedda leu et loina sanobar samba pinilok Libanon muangka baga kalulut ekeu, kuanangan: “Barania peile anupurappo, taananai sirimanua siooi sipasitatadde kai!”

⁹ Laggaira taikabaga sikuddu ka tei mugora baga raroroi kaooinu, suruakenangan kekeu sangamberi ketsat, iate ketsatda sipuute siburu; samba ketsatda tai rimatatda simamatei sangamberi bangsa isuruake sia ka kudduat purimataatda.

¹⁰ Paniborangan sangamberitda samba kuarangan katubum: “Beringan kekeu leu taan maron tubum kele kai, aibailiuan kele kai!”

¹¹ Puaabeunu tugorosotake ka laggaira taikabaga kisedda leu nau sangamberi gambusnu sangamberi pasoro tunga'ngaake sibailiu peremannu, samba paleiti-leiti sibailiu sobbem.”

¹² Ah, abelean ekeu baram ka manua, ale Panyanyat Sikalaut, togat Sulu, aturagatakean ekeu samba tubeleake ka polak, ale ekeu sikalaake sangamberi laggai!

¹³ Ekeu sipasikukua siboiki kapatuatnu: tusakai le aku ka manua, kurioake le kudduat purimataatku sisabau sangamberi panyanyat Taikamanua, samba kuoba mukuddu ka uddut leleu parurukat, ka reunan ka isit bare.

¹⁴ Kuoba tusakai sisabau buak tanai rusa, masipakereake Sipulugege!

¹⁵ Tapoi bailoknia le, tugorosotake le ekeu ka laggaira taikabaga, ka kudduat bulat kabaga ka bagat ratei.

¹⁶ Sangamberi sirimanua sipasiitco ekeu ralelekake le ekeu, kuarangan: Nia pa nene amasigalai ipugeret polak, samba amasigalai pulamaugat ka sangamberi purimataat,

¹⁷ sipasigalai polak kele kudduat simatangeu, samba masipakatai sangamberi laggainia, sitaibelaake sangamberi sirimanua situpapatpat bule ratoili ka lalepda?

¹⁸ Sangamberi tai rimatat bangsa simamatei bangsa sipuririmata siboiki merep kabagat puaabeu, senesenenda kabagat rateira.

¹⁹ Tapoi ekeu nene aturibbaiakean, tuareu ka rateinu, kele silibetat kasitsitakenen, itabbonia tubut sirimanua simamatei kalulut lanjau samba bele ka bukkut ratei kele tolat sirimanua simamatei sipaperaki.

²⁰ Ta te turarateiake ekeu kele tai rimata sabagei, kalulut anupakataian laggainu samba anumateiake taikaumam. Sapunuteteunu sigalaiake sikatai ta tukukua teret buruburu.

²¹ Rioake kudduat pasijajakat tatogania, kalulut puseleatda taikebbukatda, bule bui' ratusuru samba ralaggaiji polak samba rasunake polak palaggai-laggai.”

²² Kuanangan Tuhan Sebaot, “Kusasaggangi samba kutatataake te Babel samba sapunuteteinia sipulelegei,” kise te tiboiet Tuhan.

²³ “Kubabailiuake te Babel ibailiunia landak samba ibailiunia onaja, samba laggai nenda Kusabui le imalina samba subuakekungannia,” kise te tiboiet Tuhan Sebaot.

Ukuman Tuhan ka Asyur

²⁴ Amusuppangan Tuhan Sebaot, kise tiboietnia: “Bulatnia te, kele sipaatukKu, kisedda te muaaili, samba kele siisiakenenKu, kisedda te tugagalaiake:

²⁵ Kususubuake te tai Asyur ka laggaiKu samba masipaperaki sia ka uddut leleuKu; ribbaiakekungan leu bairanen sigalakakenenda ka paamianKu kisedda leu et bairanen siorakakenenda ka tatara.”

²⁶ Nenda te isiat atugalai pagalaiat sangaliot polak, samba nenda te kabei situtototoi ka sangamberi laggai.

²⁷ Aiisiakean Tuhan Sebaot, kasei sioi sisakklaakenia? Aitotoiakean kabeiNia, kasei sioi masitiktiknia minca?

Tiboiet Tuhan ka Filistea

²⁸ Ka rura katatakat Rimata Ahas, oi tiboiet Taikamanua nene:

²⁹ Bui' nupuangka kam baga, ale sangamberi tai Filistea, kenanen amabakbakngan liliei pakeiet masibo'bo ekeu, tapoi sibara ka muntogat ulou bela geti ulou simalaga son, samba togania ibailiu le geti ulou sibara kappo.

³⁰ Bulat loloiet togakku sikebbukat isilo le geti komen katalagat paamianKu, rasilo le geti komen samba sangamberi simageba murimanua le sia kabagat arau, tapoi Kumateiake le muntogatnu kabagat pulajeat, samba sirimanua sipulelegei mateiakekungan sia.

³¹ Pusou kam, ale matatbaliu sabeu! Pugerei kam, ale laggai! Puloto kam, ale sangamberi Filistea! Kalulut sibara ka isit bare atukaraian kujuk pasaggangan, samba moi mungkuat saladdu samba taanai sisoksok teiteinia.

³² Aponia kaunen alegiat ka sapakoiniet laggai nenda? “Tuhan le amasigalakake bongen Sion, samba sedda te sangamberi sirimanua sipangongorik sibara ka paamianNia rasilo pukuneman.”