Jes. 13 - BUKO SIPUNENAN

TIPPU 13–23 UKUMAN KA SANGAMBERI BANGSA Tiboiet Tuhan katubut Babel

¹ Tiboiet Tuhan katubutda tai Babel sipoiliat kai Jesaya togat Amos.

² Akkatake toggaiat ka uddut leleu sitaanai loina, sogaake ka sia ka nganga sabeu, gilokake kabei bule ratuguru' ka sangamberi matatbaliu gugurukatda siabeu tiboi tubu.

³ Akukoiniakean sirimanua sipunenanKu, atusogaian simagege bule ragalaiake ukuman oloi golukKu, sapamianKu sipuaangka baga samba sipugora baga.

⁴ Ai sipugagaugau ka uddut paleleuleleu, kele lamaura sirimanua bulat simigi! Nganga pulamaugat sibara ka sangamberi purimataat, sibara ka sangamberi bangsa siparururu! Tuhan Sebaot masilelekake saladdu sipasasagak.

⁵ Moi sia sibara ka laggai ka sareunan, sibara ka tu'tut manua, iate Tuhan samba leu sipasigagalaiake goluNia bule rapakatai polak.

⁶ Pugeri le, aipoi gogoi Tuhan amalegrengan, kaooiNia sibailiu sipakatai sibara ka Sipulubeunan.

⁷ Kalulut nenda masaggonangan geti sangamberi kabei, senen patuat sirimanua maloto le geti,

⁸ samba leu tugegerangan. Iorak sia geti imun baga samba besit pususule, mukatci le sia geti kele sinanalep sipususule. Paitcorangan geti mata kabagat karat baga, pumataatda kele sirimanua simaroket.

⁹ Bulatnia, gogoi Tuhan moi kabagat golu sabeu, kabagat ngoingoi baga samba golu simakope, igalai polak ibailiu masaingere samba masisubuake sangamberi sirimanua sijo.

¹⁰ Kalulut sangamberi panyanyat samba mungkuatnia ka manua taan itotoroake patonia; matat sulu ibailiu magepgep kateteret ibela, samba laggo taan itotoroake toronia.

¹¹ Katubut polak Kusisiliake le geti katainia, samba leu ka sirimanua sikatai kalulut jotda; pubuangan patuat sirimanua simagege Kuariake le geti, samba puukkanan sirimanua simaron tubu Kutatakkiake le.

¹² Kugalai le geti ta ramaonggak sirimanua bele peile ka mas siburu, samba sirimanua peile maonggak ka mas Ofir.

¹³ Kalulut nenda Kugagalai le geti ipuloto manua samba ipungeugeu leu et polak ka kudduatnia, ka teteret pugolukat Tuhan Sebaot, ka gogoi pugolukatNia sipujujulu.

¹⁴ Kele simatsura situkukukru samba kele biribiri sitaijajagoet, kisedda te geti sia rasoksoknia, ka senen bangsania samba mutuitui, ka laggaira senesenenda.

¹⁵ Senen sirimanua raaili punurangan sia, samba senen sirimanua silaba matei tagguilu kalulut lanjau.

¹⁶ Tatogatda sigoiso tumomo kamatatda, sangamberi lalepda tuparauraugi, samba tainanalepda tupaperemi.

¹⁷ Itco, Kukokoiniake te tai Madai masisaggangi sia, sirimanua sitaipuletsei perak samba sitaimaala baga ka mas.

¹⁸ Sangamberi siloguira iorak le sangamberi sibau tubu; ta manununtu bagatda ka suruket, samba ta makakate bagatda ka tatoga.

¹⁹ Babel simakope lainge ka sangamberi purimataat, pulaingeanda tai Kasdim simakope lainge, makere le geti kele Sodom samba Gomora kateteret ailukkeakenia Taikamanua:

²⁰ taan babara sirimanua sikudduijinia, samba taan babara silaggaijinia teret mupaninikat tai Arab taan musasapou sedda, samba sipasijago tarimeu taan raobaake iperep biribiritda sedda,

²¹ tapoi sipeperep geti sedda iate tarimeu simaliak, samba sangamberi lalepda masun le geti uma' popo; uma seggu mukuddu le sedda, samba sangamberi sikameinan muantat;

²² murou le jojo simaliak ka purimataatia, samba tarimeu simasabbak kabagat uma purimataat pusanangan. Iailingan le teterenia, samba rurania taan tututuppai.