Jes. 11 - BUKO SIPUNENAN

Rimata Paabanan siooi geti

¹ Bebela te sara sinula sibara ka turot Isai, samba silibetat siputututu ka bakkatnia mubua le geti.

² Ketsat Tuhan babara geti katubunia, ketsat pusikuat patuat samba puaagai, ketsat mupanganturat samba pubebeunan, ketsat puaagai samba loto katubut Tuhan;

³ bulatnia te, obaket bagania iate muloto katubut Tuhan. Ta masiukumnia sinulut ele masiteuake ukuman siripot sikuat sirimanua.

⁴ Tapoi iukum le sitaioi tubu kabagat katuroipoat, samba masiteuake ukum ka sangamberi sirimanua pinaore ka laggai kabagat puroipoat; ukumnangan geti polak kabagat titiboat kele tutura, samba leu pasamba engan ka ngungunia imateiake le geti sirimanua sikatai.

⁵ Ta tusosoipnia ka katubulanan samba ka putotopit, kele akkik tenga simariuriu tuakkik ka tenga.

⁶ Jojot leleu simasabbak mukuddu le geti simakere pasamba biribiri samba harimau simaguti merep le geti kabebet kambing. Togat jaui samba togat singa mukom le geti parou simakere, samba leu sara toga sigoiso masigiritnia.

⁷ Jaui samba beruang mukom le geti parou simakere samba totogania merep simakere, singa ka sia geti mukom siperakat kele jaui.

⁸ Toga siputotottot paguile ka bebet ngaliu ulou sipepetdak samba toga sigalak mutotot masitotoiake kabeinia ka rumun ulou bilak.

⁹ Taan babara sigalai sikatai ele sikatai paraboat ka sangaliot leleuKu sipunenan, kalulut ka sangaliot polak asutnan puaagaira pagalaiat Tuhan, kele koat sitabbo saisai koat.

¹⁰ Oto kateteret nenda silibetat sibara ka turot Isai murio le geti sibailiu toggaiatda sangamberi bangsa; ragaba le nia geti sangamberi bangsa samba kudduatnia ibailiu malatsat.

Sitotoili geti tai Israel sipulelegei

¹¹ Kateteret nenda akkatakenangan leu kabeinia si Tuhan bule itebui paamianNia sipulelegei sipukukuddu ka Asyur samba ka Misir, ka Patros, ka Etiopia samba Elam, ka Sinear, ka Hamat samba sangamberi tobbou ka koat.

¹² Rioakenangan geti sara toggaiat si Tuhan ka sangamberi bangsa, ruruakenangan geti tai Israel situriribbai, samba taddeakenangan geti tai Jehuda simasasaragai ka epat matat rusa.

¹³ Pututuat bagat Efraim tusabau le geti samba siokkip Jehuda sappru le geti. Efraim geti taan mutututu baga minca ka tai Jehuda samba tai Jehuda geti taan raokkip minca tai Efraim.

¹⁴ Tapoi tuburut le sia geti ka kabelekat sulu, ka uddut leleu Filistin, pasambatda parauraugirangan geti muntogat ka kabelaiat sulu rauraurangan le geti Edom samba Moab, samba leu tai Amon mareddetrangan geti katubutda.

¹⁵ Garakakenangan te geti guggung Misir si Tuhan pasamba engaNia sipasilabo, samba leu masitotoiake kabeiNia ka oinan Efrat samba bobonangan oinan Efrat nenda samba maragatnangan bailiunangannia pitu bagat oinan, oto oinangan leu raenunginia sirimanua siputatarangai.

¹⁶ Oto babara te geti enunganda sapaamianNia sipulelegei sipulelegei ka Asyur, sibabara siboiki ka Israel kateteret arabela ka Misir.