Jes. 10 - BUKO SIPUNENAN

¹ Matei le sia sigalai surukat sitaimaroipo; samba sibelaake katutakkikat pukakatai,

² bule itukeraake sitaioi tubu rasilo puroipoat samba masiraurau bakkatda sipangongorik katalagat paamianKu, bule ioi raraurau bakkatda tai lumang, samba raraurau sipululusai!

³ Aponia galaiakenenmui ka gogoi pasiukuman, samba kateteret katusubuat sioi sibara ka sareunan? Kasei katubu nutitiddou kam paroman? Kaipa nukokoiriake kam pukayoatmui nenda?

⁴ Tamomoi nugalaiake kam aponia pa, mukuddu le kam katalagatda sipatpatakenen, samba matei katalagatda sirimanua simateiakenen Kenanen muaili sangamberinia nene, goluNia ta leu et tatata, samba kabeiNia aipeile tutototoi.

Pagalaiat kamateiat orakakenen ka Asyur

⁵ Matei le Asyur! Sibailiu liliso kabagat golukKu samba sibailiu tutura kabagat golukKu

⁶ Kukoiniake le nia ka laggai simakela patuat, samba kukoiniake le nia isaggangi paamian goluketKu, bule ragalaiake pasirauraugat, samba rapaperaki sia kele loti ka enungan.

⁷ Tapoi Rimata Asyur ta kisedda sipinatunia samba ta kisedda isitnia, tapoi kiddiet bagania iate masisubuake samba masitataake bangsa simaigi le.

⁸ Kalulut aikua: “Ta pa sautet saladdukku nenda iate tai rimata.

⁹ Ta pa Kalno makere le nia Karkemis, ele Hamat makere le nia Arpad, samba Samaria makere le nia Damsyik?

¹⁰ Kele akukalaake sangamberi purimataatda sabulungan, siripotkatnia sabulunganda peile maron bele peile sibabara ka Jerusalem samba ka Samaria,

¹¹ kipangan le ta kugagalaiakenia katubut Jerusalem samba leu ka sabulungannia, kele sigalaiakenenku katubut Samaria samba sabulungannia?”

¹² Tapoi ke alepaan geti igalaiake galaiakenennia si Tuhan ka leleu Sion samba ka Jerusalem, oto ukumakenangan geti rimata Asyur kalulut sigalainia kabagat pubuangan patuat.

¹³ Kalulut aikuangan Rimata Asyur, “Kabagat ronku akugalaiakean samba kabagat sikut patuatku, kalulut aku nene simaagai; akutataakean pasongan katalagat bangsa-bangsa, samba akuraurauan sinarekakenenda, kabagat gegeku gorosotakekungan sangamberi sirimanua sikuddu ka uddenan purimataatnia.

¹⁴ Kele kuala rumun uma' kisedda te akuala pukayoatda sangamberi laggai, samba kele sirimanua masirakkuatake attelu sikaddiuakenen inania, kisedda te akurakkutake sangaliot polak, samba berisara sireppaake kappo, sibukaake udduknia ele sipumamaimai.”

¹⁵ Ai pa baliok siumunake tubunia ka sirimanua sipakeinia, ele iumunake tubunia gagaji ka sirimanua sipakeinia? kele liligeian le itubbui sirimanua masiakkatnia. Ta tutura masiakkatake sirimanua, tapoi sirimanua le masiakkatake tutura.

¹⁶ Kalulut nenda, Tuhan Sebaot, igalai le geti sangamberi sirimanua simagege ibailiu bulat simakainang, samba tulabo itata' sangamberi pukayoatda ka obengan sipujujuluu.

¹⁷ Oto Patot Israel ibailiu le geti obengan, samba Taikamanuania, Sipunenan, mujulu le geti samba masilabo itata se'se simarui samba turuturunia kabagat sangagogoi.

¹⁸ Pulaingean leleu Asyur samba sangamberi monen buat kajunia subuakenangannia geti barania ka loinania pat aili ka rannia, bailiu kele sirimanua simabesik sipangongorik pat mateinia,

¹⁹ samba loina sipulelegei ka leleunia momoi le geti ituadde, bailiu beringan sara toga sigoiso momoi iaddenia.

Tuarauake tai Israel sipulelegei

²⁰ Tapoi kateteret nenda tai Israel sipulelegei samba sibebela katalagat muntogat Jakob, taan mukakaron minca ka sikalaake sia, tapoi mukaronan le sia simariuriu katubut Tuhan, Sipunenan, Taikamanuan Israel simariuriu nuntut baga.

²¹ Toili le geti sia sipulelegei, rabauake le patuatda tai Jakob sipulelegei katubut Taikamanua Simagege.

²² Kenanen tai Israel kineneiget makere le igit ngai ka bebet koat, tapoi sarat legeinia le totoili. Aibulatakean si Tuhan kaooinia katusubuat samba sibara sedda puottounangan katuroipoat sipububuggra.

²³ Bulatnia te, katusubuat muaaili tugalaiake le geti ka sangaliot polak, kalulut Tuhan, Tuhan Sebaot.

²⁴ Kalulut nenda kise te tiboiet Tuhan, Tuhan Sebaot: “Ale paamianKu sikuddu ka Sion, bui' numaloto kam katubutda tai Asyur, kenanen rabobo kam pasamba liliei samba rabobo kam pasamba tuturania, kele sigalaiakenenda tai Misir siburu.

²⁵ Kalulut taan mabuburu itukapplu goluKu katubumui, samba oloi goluKu sibaraake katukataikatda.

²⁶ Ililiso te geti sia liliso si Tuhan Sebaot, kele aiukumake tai Midian ka leleu bukku Oreb, samba totoiakenangan tuturaNia ka uddut koat Tiberau lepa akkatakenangannia kele sipuaili ka tai Misir siburu.

^27a Kateteret nenda bairanen siakera ka tatatnu turibaiake le geti, samba bairanen sigalakakenenda tetekatnu tata le geti.

Tai Asyur moi pasaggak

^27b Tai Asyur amoian sia baratda ka Rimon

²⁸ samba amoian sia masisaggangi laggai Ayat; atusabauannia ka Migron, samba ka Mikhmas pasikelinangan balutda.

²⁹ Amutalipoan sia baratda ka guluggu putalipokat, sialei gerei: “Geba kudduat pugogoiatta!” Lepa malotorangan sipulaggai ka Rama, pusaburangan leu sikudduiji Gibea-Saul.

³⁰ Belaake katcim, ale okkot Galim! Lelekake, ale Laisya! Aleginia, ale Anatot!

³¹ Sikudduiji Madmena tuituiakerangannia ka sareunan, sipulaggai ka Gebim mei mujaujau.

³² Gogoi nene leu et tai Asyur muari ka Nob, patotoinangan kabeinia ka ipot leleu okko Sion, leleu Jerusalem.

³³ Itcoat, Tuhan, Tuhan Sebaot patippunangan geti paranran loina kabagat ron kalotoakenen; sipututu simabuak tutadde le geti, samba sipusumbulat ka pata tupaepe le geti.

³⁴ Paloina-loina tusaggri le geti pasamba baliok, samba Libanon samba leu paloinaloinania simaron mabukkat le geti.