Jes. 1 - BUKO SIPUNENAN

Ute'

¹ Pamoilianan siitcot Jesaya togat Amos pagalaiat Jehuda samba Jerusalem kateteret Uzia, Jotam, Ahas samba Hizkia, tai Rimata Jehuda.

Taikamanua masigolu paamianNia

² Arepake, ale manua samba lelekake, ale polak, kalulut si Tuhan masikua, “Akuurauan samba Akupasikelingan tatoga, tapoi ta amareddet sia katubukKu.

³ Jaui iagai kasei sibakkatinia, tapoi Israel taiagai; kalidei iagai lulak sitarekakenen tuannia, tapoi paamianKu geti ta raagai kolou.”

⁴ Matei le laggai sijo, muntogat simasun puseleat, reddenen sirimanua sikatai, tatoga sikatai paraboat! Arakaddiuakean si Tuhan, masipaloloi Sipunenan, Taikamanuan Israel, samba rakateiteiakeNia.

⁵ Kaipangan le Kubobo'bo katubumui, ale kam situppai katai? sangaliot ute mabesi samba sangaliot patuat masaggo.

⁶ Barania ka tadda pat aili ka ute taanai simakula: mugo samba musurou samba siorangan sibau, ta atubutcit samba tuappra samba ta atukau tula.

⁷ Laggaimui bailiu matangeu, sangamberi laggaimui sappru imalabo; ka matamui sangamberi sirimanua siooiake masikom bua sibara ka polakmui. Bulat matangeu laggai nenda kele siluggaakenenda sirimanua siooiake.

⁸ Sioko Sion mulegei sarania kele sapou ka monen anggur, kele sapou ka monen timu samba kele laggai sialou.

⁹ Ke Tuhan Sebaot ta ilegeiake ka sita goiso sirimanua sibebela, aibailiuan sita kele Sodom, samba kele Gomora.

¹⁰ Arepake kam tiboiet Tuhan, ale saute, tai Sodom! Lelekake kam sigelaiakenen Taikamanuanta, ale siberikabaga, tai Gomora!

¹¹ Kuanangan si Tuhan, “Apangan le katukolobatnia buluakenenmui simaigi nenda? Aingauan aku sangamberi buluakenenmui silabo, biribiri simanteu samba tabet togat jaui simamokmok; logau jaui simanteu samba biribiri samba kambing simanteu ta Kuoba.

¹² Ke moi kam masiailiake Aku, kasei amasitiddou nenda katubumui, nupaperaki kam laibokat Uma SipunenanKu?

¹³ Buian nuabbit kam minca panguruatmui ta sibulatnia, kalulut singinnia iate kasitsitakenenKu. Ke nupunenake kam laggo sibau samba sabat ele nubaraake kam parurukat, ta Kuoba iitconia, kalulut punenmui nenda masun le pukakatai.

¹⁴ Punen Laggo Sibau samba parurukatmui simariuriu nugalaiake kam, malaga bagaKu iitconia; sangamberinia nenda aibailiu le bairanenKu, amasaggongan Aku ibairatnia.

¹⁵ Ke nutotoiake kam kabeimui nupanindou kam, Kupisikake le geti matakKu, kenanen piga ngaminca pa nupanindou kam, ta Kuaarepi, kalulut kabeimui amasutan logau.

¹⁶ Bui' kam, samba linaake kam tubumui, areuake kam sangamberi sigalaimui sikatai ka matakKu. Ariake kam masigalai sikatai,

¹⁷ gelai kam masigalai simaeru; besiake kam puroipoat, keraake kam sirimanua sikatai; ropake kam sitaina ka siripot siloketda, romake kam pakaroatda tai lumang!

¹⁸ Kuanangan si Tuhan, Konan kam, tapakaro! Kenanen jomui mabonan kele kirmizi, ibailiu le geti simabulau kele salju; kenanen mabonan kele komak kesumba, ibailiu le geti simabulau kele bulut biribiri.

¹⁹ Ke mareddet samba nuoba kam masiarepi, kommuian geti bua simaeru sibara ka laggai nenda.

²⁰ Tapoi ke nusaggangi samba ta mareddet kam Aku, matei le kam geti ka lanjau.” Bulatnia te, Aku, Tuhan amasikua.

Ukuman ka Jerusalem

²¹ Kipa nene, laggai siburu simatopit kineneiget aibailiuan simaolop tubu! Siboiki sun le puroipoat samba sedda mariuriu ikuddu pubulanan, tapoi kineneiget sun le sipamamatei.

²² Perakmui taan malina samba suat poulamui pagalu oinan.

²³ Sautemui iate sitaimareddet samba musara ka sipananangkou. Sangamberitda raoba masisilo bulagat ka sitaimaroipo samba masikukru bulagat ka enungan sitaimaroipo. Ta araropake sitaina ka siripot siloketda, samba ta raoba masiarepi pakaroatda tailumang.

²⁴ Kalulut nenda, kise te ngangan Tuhan, Tuhan Sebaot, Sipulugege, sipasijago Israel; “Kuala te lumun katubutda saggakKu, samba masigalaiake lumun katubutda tai saggakKu.

²⁵ Kuukum te kam: Kulilinaake te perakmui, samba tuareuake tima katubunia.

²⁶ Kutotoiliake te minca sipasiukummui kele siburu, samba sipangantoman kam kele siboiki. Ka lepat nenda tuoniake le kam geti laggai puroipoat, laggai simatopit.”

²⁷ Kubebelaake te Sion ka pasiukuman simaroipo samba sangamberi sirimanua sibauake patuatnia Kubelaake le sia geti ka enungan galaiakenen simaeru.

²⁸ Tapoi sangamberi sirimanua simakela patuat samba sijo tususubuake le sia geti simakere, samba sangamberi sirimanua sikaddiuake si Tuhan sappru leu et sia.

²⁹ Bulatnia te, nusilo te kam puailaat kalulut sangamberi loina sabeu suruketmui obaket bagamui; samba maailamuian kalulut sangamberi monen bulungan sipilimui.

³⁰ Kalulut ibailiu le kam geti kele loina sabeu suruket sipubuluk simamantei, samba kele mone simagulai oinan.

³¹ Oto simaron tubu ibailiu le geti kele kapu samba galaiakenennia ibailiu kele jalai obengan; karuania sibaraake obengan samba taanai sioi sipeakenia.