Jer. 9 - BUKO SIPUNENAN

¹ Ke'bai masun oinan ka ute'ku, samba mataku ibaili gugurunga elu, Iageti sinago samba sinoibo kusoibi le' saokkot bangsaku simateiakenen!

² Ke'bai kasimatangeu ai kudduat pugogoiat addeat sangamberi sirimanua kabagat puenungan, Iageti kaddiuakekungan leu bangsaku, samba tuareu katubutda! Aipoi sia sangamberitda iate sirimanua sipaelet le', sara parurukatda sangamberi sirimanua sitaimatopit,

³ Rapabetek le' jalaira kele rourou; boko samba ta'pubulanan masaibat bagat laggai; bulatnia, muenung le sia baratda ka pukakatai ei kapukakatai, tapoi si Tuhan ta'raagai.

⁴ Kau le' senen sirimanua ijago tubutnia ka saaleinia, samba bui imatonem bagam ka sasasaraina kaipa pa', aipoi senen sasaraina iate bulat simagai sipatataju le', samba sene saalei muenung kasen kudduat sibailiu sipaloloi.

⁵ Sisara masipataju sabagei, samba beri sara sitiboake simaeru; Aratukleakean jalaira masitiboake boko; ragalai le' puseleat samba magela sia masibauake paatuat.

⁶ Paoreat ituppai paoreat, patataju ituppai patataju! Ta'raoba, masiagai si Tuhan.

⁷ Lulut nenda kasene le' ngangan Tuhan sebaot: Bulatnia te', Kuoba le' masianaake samba masisibo sia, aipoi aponiangan le' momoi Kugalai ka okkot paamianKu?

⁸ Jalaira iate silogui sipamamatei, titiboat sibara ka ngungunia iate patajuat; ratiboi le' aban pasamba saaleinia, tapoi kabagat paatuatda raisiake le' sesere katubunia.

⁹ Ta'pa Kuuukum sia kelulut sangamberinai nenda?, kesene le' ngangan Tuhan Ta'pa' Kusisiliake besit paatuatKu katubut bangsa kele nenda?

¹⁰ Pusou samba pusiku le' kalulut sangamberi leleu, samba pusou geri kalulut su'su simaturuturu ka simatangu, aipoi sangamberinia amagarakngan samba ta'an beri sara sirimanua sisabauginia, samba sirimanua ta'an araarep ngangan tarimeu; sangamberi uma' katei manua samba sangamberi tarimeu, sangamberinia amutuituian samba amapepengan.

¹¹ Jerusalem Kubailiuake le geti siragarat kudduat pulippunan jojot leleu; Kugalai le' geti sangamberi laggai Jehuda ibailiu matangeu, ta'an anai sikudduijinia.”

Tuloto ka kabebele samba turibbaiake

¹² Kasei pa' sirimanua simakope' sikut paatuat, bailiu oinangan iagai kolou pagalaiat nene, sirimanua sipasisisilo tiboiet sibara ka ngungu Tuhan, bule ioi ipaagainia? Aponia lulunia imasusubu laggai nene, magarak kele su'su simangai pat taibaranangan sirimanua sisabauginia?

¹³ Kuanganag si Tuhan: Kalulut arakaddiuake surukatKu sikauKu tatubutda, samba kalulut ta'araarepi ngangangKu samba ta'aratutnia,

¹⁴ tapoi aratutake le' pukelakat paatuatda samba masitut tai Baal kele sigelaiakenen taikebbukatda katubutda.

¹⁵ Kalulut nenda, kasenen le' ngangan Tuhan sebaot, Taikamanuan Israel: Bulatnia te' Kukau le' geti ka bangsa nene rakom simapongit samba lo' tuba.

¹⁶ Kukakau le geti sia katalagat sangamberi bangsa taiaagaietda ele taiaagaiet taikebbukatda, samba Kuobaake le' geti lanjau ikukru sia teret Kusubuake sia.”

¹⁷ Lelekake le! Sogai le' tainanalep sipugegeri, bule raoi, samba koiniake le' sirimanua ka tainanalep simasiku paatuat, bule raoi!

¹⁸ Eddangannia ramaola samba mugeri kalulut sita, bule matatta ibelaake elu, samba kulit matatta masibaibaiake oinan!

¹⁹ Aipoi maarep le geri barania Sion: O, masusubungan te' sita. Aipoi bui ta'kukakaddiuake le' kai laggai nene, kalulut sangamberi lalep kudduatmai raragat le' sirimanua.”

²⁰ Oto arep le' nganang Tuhan, ale tainanalep, eddangan isilo talingamui tiboiet sibara ka ngungunNia; gelaiake le' geri ka tatogamui sinanalep, samba ka senen tainanalep urai geri ka saaleinia:

²¹ “Kamateiat atuguruan ka sangamberi jandelata, tuguru' ka sangamberi uma purimataatta; itataake le tatoga sibara ka enungan, sangamberi sibautubu sibara ka polak simabaoi;

²² sangamberi tubut sirimanua simamatei tenan le' murappi kele pasiramo polak ka mone, kele legei sigetaiat gandum ka teiteira sangamberi sirimanua sipasimomonei ta'an sipasiruruake.”

Masiagai Taikamanua iate puangkakat baga sirimanua

²³ Kasenen le' ngangan Tuhan: “Bui' iumunake tubunia sirimanua simasiku paatuat kelulut sikut paatuatnia, bui iumunake tubunia sirimanua simagege ka lulut gegenia, bui iumunake tubunia sirimanua simakayo kalulut pukayoatnia,

²⁴ tapoi kasei sioba katuumunan tubu, kauan iumunake tubunia kalulut nene: kalulut againa kolou samba iagai Aku, Aku te' Tuhan sipakoinong putotopit, puroipo samba pubulanan ka polak; bulatnia, sangamberinia nenda Kuoba, kise te' ngangan Tuhan.”

²⁵ “Itco, babara te' geti teterenia, kise te ngangan Tuhan, Kuukum le' sangamberi sirimanua sipususunat:

²⁶ tai Misir, tai Jehuda, tai Edom, muntogat Amon, tai Moab samba sangamberi sirimanua sitippu buttet alainia pat bokko, sangamberi sirimanua sikuddu ka simatangeu, kalulut sangamberi bangsa sitaipususunat samba sangamberi muntogat Israel sitaipususunan paatuatnia.”