Jer. 8 - BUKO SIPUNENAN

¹ Kateteret nenda, kisene le' ngangan Tuhan, sangamberi tolatda tai rimata Jududa, sangamberi tolatda sikebbukat kaggai, sangamberi tolatda tai imam, sangamberi tolatda tai nabi samba sangamberi tolatda sipulalaggai ka Jerusalem tubelaake le' geti kabagat rateira

² samba tusaragaiake le' ka ipot matat sulu, ka ipot laggo samba ka ipot sangamberi saladdut manua pununtukiet bagatda siburu, pagugulenienda, tunenda, rereketda' samba panindougietda. Sangamberinia nenda geti ta'turururuake samba ta'turarateiake; ibailiu le sia pasiramo mone.

³ Tapoi sangamberi sirimanua sipulelegei ka muntogat sikatai nene raoba le' matei bele pei murimanua ka senen kudduat kaipa Kupasabu sia, kisene te' ngangan Tuhan Sebaot.

Jo samba ukumannia

⁴ Bui' ta'nukua katubutda: Kasene le' ngangan Tuhan: Ke'bai bele sirimanua, ta' pa' tususurunia minca? Ke'bai tuitui sirimanua, ta' pa totoilinia minca?

⁵ Angoian le' rapaitsa bangsa nene, mupitsa le' simariuriu? Tuaddai le' ka patajuat, rakeraake le' toili minca.

⁶ Akulelekakean samba Akuarepingan: ta'arakua simaroipo! Ta'anai siolei baga kalulut pukakatainia pasamba masikua: Aponia pa' akugalai nene! Sialei babalau le' papitsarangan sangamberitda, kele kuro' ituguru' kabagat pasaggangan.

⁷ Beri uma' kailea katei manua iagai teteret gogoinia, limendeu, laggi-laggi samba seggu iagai teteret itoiliat, tapoi paamianKu, ta'raagai surukat Tuhan.

⁸ Kipa numaeme kam masikua: simasiku paatuat le kai, samba kakai ai Surukat Tuhan? Bulatnia te' susurat simataju sipasisurat aibailiuakeannia paboko.

⁹ Sangamberi sirimanua siagai paatuat ibailiu geti maaila, tuge'ge' samba tulaba' le geti. Bulatnia te', arakeraakean tiboiet Tuhan, oto pusikuat paatuat kele kipa pa' ai katubutda?

¹⁰ Kalulut nenda Kukakau le' geti sangamberi sinanalepda ka sirimanua sabagei, sangamberi monenda katubut sipaorei. Bulatnia te' barania ka sigoiso pat aili ka sabau, sangamberitda masikukru uktu; nabi samba imam leu, sangamberitda masigalaiake patajuat.

¹¹ Ralaggek le' maujut okko paamianKu raitconia malabbei le', kuanangan: Aban! Aban! tapoi ta'anai aban.

¹² Siripokatnia maaila le' sia, aipoi aragalaian paloloiat; tapoi ta'raagai aila samba tatuagai lolitda. Kalulut nenda mabukkat le geti sia, katalagat sangamberi sirimanua simabubukkat, tusoksok bele le' sia kateteret tuukum sia, ngangan Tuhan.

¹³ Kuoba le' masiruruake buat monenda, kisene te' ngangan Tuhan, tapoi taanai buat anggur ka loinat anggur, taanai buat sileu ka loinat sileu, samba pabulu buluk simalaju; kalulut nenda Kuteteuake le ka sia sangamberi sirimanua siorei sia.”

¹⁴ Angoi sarat mukuddu le sita? Paruru samba kauan taeikam ka laggai sibara irip, samba masubu sedda! Aipoi Tuhan, Taikamanuanta masisubuake sita, iake lo'ta tuba, aipoi amajongan sita kai Tuhan.

¹⁵ Takaroni le' paabanan, tapoi beri sara amoi simaeru, masikaroni teteret katualeat, tapoi abara sarat pukaranan baga le'!

¹⁶ “Nau ngangan kurora tai saggak maarep barania Dan; kalulut katcit kurora simanteu, loto' le' sangamberi laggai. Raoi samba masipakomi laggai pasamba ka bagania, laggai samba sikudduijinia.

¹⁷ Itco le', Kubelaake katalagamui sangamberi ulou sipepekdak, sitaioi tumantra, sipasitautau geti kam, kise te' ngangan Tuhan.”

Sou geri katubut Jehuda samba Jerusalem

¹⁸ Pureugat baga siorak aku ta'moi tuale paatuatku mabesi maraka.

¹⁹ Arep! soga okkot bangsaku masitiddou paroman barania ka laggai simareunan: “Ta'anai pa' si Tuhan ka Sion” Ta'anai pa' Rimatania ka bagania?” – Angoi pa' rabaraake le' besit paatuatKu pasamba sangamberi tularat buluijietda pasamba sangamberi taikamanua bagei sita'katukolobat?” –

²⁰ Atusabauan tetere pasimoneiat, atukapplungan teteret legeu, tapoi ta'pei leuet tupaarau kai.”

²¹ Kalulu maujut okkot bangsaku paatuatku mumauju; mureureu baga le' aku, polotokat ai labaan aku.

²² Ta'anai balsem ka Gilead, Ta'anai sikerei sedda? Angoi ta' pei amoi katualeat maujut okkot bangsaku?