Jer. 7 - BUKO SIPUNENAN

Ngantoman Jeremia pagalaiat Uma Sipunenan

¹ Tiboiet siooi kai Jeremia sibara kai Tuhan, ngangania:

² Purio le' ka matat baliu gugurukat uman Tuhan, gereiake sedda tiboiet nene samba kua: Arepake tiboiet Tuhan, ale sangamberi tai Jehuda situguguru' ka sangamberi matat baliu gugurukat nene addeat murekkuk manindou kai Tuhan!

³ Kasene le' tiboiet Tuhan sebaot, Taikamanuan Israel: Paeru le' paraboatmui samba galai tubumui, oto Kuoba le' mukuddu pasamba kam ka kudduat nene.

⁴ Bui imatonem bagam ka tiboiet patajuat, sipasikukua: Nene uman Tuhan, uman Tuhan, uman Tuhan,

⁵ tapoi ke' sibulatnia bai nupaerukam puparoboatmui samba galai tubumui, kalau bulat sibulatnia nugalaiake kam puroipoat katalagamui senesemui,

⁶ ta'masiorei sirimanua siooiake, siputataina samba silumang, ta'masimateiake sirimanua sitasele ka kudduat nene samba ta'masitut taikamanua bagei, sibailiu sipakatai ekeu saram,

⁷ oto Kuoba le' mukuddu pasamba kam ka kudduat nene, ka polak siakeKu ka taikebbukatmui, barania ka siburu teret buruburu.

⁸ Tapoi sibulatnia, matonem bagamui ka titiboat patajuat sitaanai paluluatnia.

⁹ Kiangan le' manangkou ekeu, pamatei, paelet, pataju, masilabo buluakenen ka Baal samba masitut taikamanua bagei taiagaietnu,

¹⁰ Lepat oi kam murio kamataKu ka uma pasisogaiat oningKu, sialei masikua: Maarauan sita, bule ioi leuet tugalaiake sangamberi galaitubu kasitsitnakenen nene!

¹¹ Aibailiuan pa' rumun sipararaurau ka matamui lalep pasisogaiat ka oningKu nene? Ke' Aku, Aku le' masiitco sangamberinia, kisene te' ngangan Tuhan

¹² Tapoi kenen boiki ka kudduatKu ka Silo nenda, kaipa Akugalai oningKu mukuddu boiki, samba itco aponia sigalaiakenenKu katubunia kalulut pukakatai paamianKu Israel!

¹³ Oto kineiget, kalulut kam leu anugalaiankam sangamberinia galaitubu nenda, kisene te' ngangan Tuhan, samba kalulut ta'nuoba kam masiarepi, kenenen bai manibo Aku simariuriu katubumui, samba ta'nuobakam masialegi, kenanen bai mugerei Aku katubumui,

¹⁴ kalulut nenda te' ka lalep, ka uddutnia tusogaake oningKu samba atciakenenmui nenda, samba ka kudduat, siakeKu katubumui samba ka taikebbukatmui nenda, Kugalai te' geti kele sigalaiaKu ka Silo;

¹⁵ Kuriribbaiake le' geti kam ka matakKu kele sangamberi sasarainamui, iate sangamberi muntogat Efraim, Akuribbaiakean sia.

Masisaggangi sipanindougi rimata sinanalep oniakene rimatat manua

¹⁶ Tapoi ekeu, ba' paninindou addeat bangsa nene, ba' sesegeake pasogaiat samba panindougat ka sia, aipoi ta' Kuarepi ekeu.

¹⁷ Ta' pa' anuintco aponia sigalaiakenenda ka sangamberi laggai Jehuda samba ka sangamberi enungan Jerusalem!

¹⁸ Sangamberi tatoga masiruruake loina paneu, sangamberi saukkui masiobekake obengan, samba tainanalep masigaluake tepung addeat masigalai komen panguruatakenen kai rimata sinanalep oniakenen rimatat manua, samba sirimanua masipanguruatake buluakenen siuruakenen ka taikamanua begei addeat masipubesiki paatuatKu.

¹⁹ PaatuaKu pa' sibulatnia arabesiki, kisedda te' ngangan Tuhan, ta' pa' patuatda le', bailiu maailarangan?

²⁰ Kalulut nenda kasenen le' tiboiet Tuhan Taikamanua: Bulatnia, goluKu samba oloi guluKu mapili ka kudduat nene, ka sirimanua, ka tarimeu, samba ka sangamberi loina ka su'su' samba ka buania siureman; golu' nenda mujulu le' samba ta'mamatei.”

Masisaggangi panindougat kabagat tatat nuntut baga

²¹ Kasene le' ngangan Tuhan sebaot, Taikamanuan Israel: Tuppai le' buluakenenmui silabo' katubut buluakenenmui sija'ja samba nanamkam akkulania!

²² Bulatnia, kateteret Akuambit taikebbukatmui bela ka Misir, ta' Akukua samba ta' Akuparentaake katubutda sara pagalaiat buluakenen silabo samba buluakenen sija'ja;

²³ sarat nene le' Aku parentaake katubutda: Arepake le' ngangangKu, iageti bailiunangan Aku Taikamanuamui samba kam ibailiu geti paamianKu, samba tut le' sangamberi enungan siparentaakenenKu katubumui, bule imaangka bagamui!

²⁴ Tapoi ta'raoba masiarepi samba ta'raoba masipuletsei. Raoba pei le' masitutnake isiatda samba pukelakat paatuatdra sikatai samba rapatoila le' teiteira samba ta' pumataatda.

²⁵ Barania peile kateteret arabela taikebbukatmui ka Misir pat aili gogoi nene, Kukoiniake katubutda sapakoinienKu, tai nabi, gogoi ka gogoi, simariuriu,

²⁶ tapoi ta'araoba masiarepi Aku samba ta'araoba masipuletsei, tapoi raparon le te'tekatda, masigalai katai simakope bele pei le' ka taikebbukatda.

²⁷ Kenen bai nukua katubutda sangamberi pakaro' nene, ta'raarepi tiboietnu, samba kenanen bai mugerei ekeu katubutda, ta'raalegi ekeu.

²⁸ Kalulut nenda, kua le' katubutda: Nene te' bangsa sitaioba masiarepi ngangan Tuhan, Taikamanunda, samba sitaioba masisilo panganturat! Pulilinat paatuatda atataan, atuposangan ka ngungunda.”

Sipanindougi sabulungan samba paluluatnia

²⁹ Sapu le alai ka utenu samba ribbaiake le'! “Pusoubaga ka uddut leleu sitaanai loina, aipoi aikeraakean si Tuhan samba airibbaiakean bangsa siorak goluNia!

³⁰ Bulatnia, tai Jehuda aragalaiakean sikatai ka mataKu, kisene le' ngangan Tuhan. Aiuddetakean sangamberi taikamanua kasitsitakenen ka bagat lalep pasisogaiat oningKu nene addeat masilolitake.

³¹ Ararioakean leleu pasibuluat sipuoni Tofet ka Enggleu Ben-Hinom addeat masilabo tatogania simanteu samba sinanalep, sara galaiakenen sitapei Akuparentaake samba ta'peianai tuottou ka paatuatKu.

³² Kalulut nenda, bulatnia te' babara te' geti gogoinia, kisene te' ngangan Tuhan, ta'an te' rakukua minca sirimanua “Tofet” samba “Enggleu Ben-Hinom”, tapoi “Enggleu Pasimateiat”; rarateiake le geti tubu sirimanua simamatei ka Tofet kalulut tatania kudduat,

³³ tubu siamatei bangsa nene ibailiu komen sangamberi uma katei manua samba sangamberi tarimeu ka polak samba taanai sigeugeunia.

³⁴ Ka sangamberi laggai Jehuda samba ka sangamberi enungan Jerusalem Kuaariake le' geti ngangan angkat baga samba gorat baga, ngangan simanteu samba ngangan sinanalep siputatalimou, aipoi laggai nenda ibailiu le geti simagarak.