Jer. 6 - BUKO SIPUNENAN

Pugejaat baga siorak geti Jerusalem samba Jehuda

¹ Tuitui le' mujaujau, ale tai Benjamin, sibara katalagat Jerusalem! Ulup le' pipiau ka Tekoa, samba sakaiake le' kujuk sibailiu toggaiat ka Bet-Kerem! Aipoi pugejaat baga amasitaikongan barania ka bare', iate sara katukataikat sabeu.

² Ai pa' okko Sion makere' kele su'su' bulat obaket,

³ bailiu sangamberi sipasijago ailiakerangannia pasamba mungkuat tarimeura? Ararioake sangamberi sapou masigoiliknia, senenda masikom isapru aponia sisesetda.

⁴ Patarek le' pasaggak masisaggangi nia; Konan taei kam masisaggangi ka sina'go!” Paan te' kasita, aipoi matat sulu atusonean, ailiggou ka soibokat amanantangan!

⁵ Konan taei kam masisaggangi kateteret sinoibo, samba masipakatai sangamberi iripnia!”

⁶ Aipoi kise te' ngangan Tuhan sebaot: “Tadde le' sangamberi loinania samba tabbui le' polak ibailiunia irip ka Jerusalem! Nenda te' laggai bui ta' tuukum! Sarat paoreat le ka bagania!

⁷ Kele bubuakat ibugaraake oinannia, kise te' laggai nenda ibugaraake pukakatainia. Pugegeat samba paoreat le' maarep ka bagania, siorangan samba sibobokat mariuriu le' ai Akuitco.

⁸ Silo le' kam liliso, ale Jerusalem, bule bui Kutiktik tubuku ka tubum, bule bui Kubailiuake ekeu simatangeu, ibailiu le' laggai sitaanai sikudduijinia!”

⁹ Kise' le' ngangan Tuhan sebaot: “Akpek le' isapru sangamberi tai Israel sipulelegei kele loinat anggur isapru ituappek. Toili le' kele sipasiappek buat anggur pasamba kabeinu masigaba bua ka sangamberi rannia.”

¹⁰ Kasei katubu pa' kupaninibo samba kupasipopoiliat, bule raoba masilelekake? Bulatnia, piura ta'amusunat, ta' momoi rapasiarep! Bulatnia, tiboiet Tuhan ibailiu le' gegeietda, ta'raobania!

¹¹ Tapoi sun le' oloi golut Tuhan katubukku, akubesiakean masiopake, bui ta'tusiliake le' katubutda tatoga ka enungan, samba ka parurukatda tailainge. Bulatnia, taimanteu samba leu tainanalep geti tulaba le, saukkui samba leu simabaja.

¹² Sangamberi lalepdra tukau le' geti kasabagei, kisedda leu sangamberi mone samba sangamberi tainanalepda. – Bulatnia, Kutotoiake le' kabeuKu masisaggangi sikudduiji laggai nene, kise te' ngangan Tuhan.

¹³ Bulatnia, barania ka sigoiso pat aili ka sabeu katalagatda, sangamberitda masikukru uktuk, tai nabi samba tai imam sangamberitda masigalai patajuat le'.

¹⁴ Ralaggek le' maujut paamianKu rapuaral le raitco, kuarangan: Aban! Aban! tapoi ta'anai aban.

¹⁵ Siripokatnia maaila le sia, kalulut aragalaiakean le' kasitsitnakenen; Tapoi ta'araagai aila samba ta'araagai lolitda. Kalulut nenda bele le' geti sia katalagatda sirimanua sibebele'; tusoksoksok le' sia kateteret Akuukum sia, ngangan Tuhan.”

¹⁶ Kasene le' ngangan Tuhan: “Ala le' kudduatnu ka sangamberi enungan, samba itco le' Pare're' le' sangamberi enungan siburu, kaipangannia enungan simaeru, enungi nenda, kise te' ibara kasasanang ketsatnu. Tapoi rakua le': Ta'kuobakai masienunginia!

¹⁷ Lepa kuuddetake le' ka sia sipasijajago, ngangangKu: Lelekake le' nau pipiau! Tapoi rakua le': Ta'kuobakai masilelekakenia!

¹⁸ Lulut nenda arepake, ale sangamberi bangsa, samba agai le', ale paamian, aponia geti sipuaali ka sia!

¹⁹ Arepake, ale polak! Bulatnia, ka bangsa nene te' Kubabaraake geti pugejaat baga, lulut sangamberi siisiakenenda, aipoi ta'arapuletsei sangamberi tiboietKu samba masikeraake panganturatKu.

²⁰ ApakauKu kumanyang siambitmui sibara kai Syeba, samba kole simaeru sibara ka laggai ka sareunan? Ta'Kuoba sangamberi buluakenenmui sirarak samba sangamberi buluakenenmui sija'ja' ta' siangkaake bagaKu.

²¹ Kalulut nenda kasene le' ngangan Tuhan: Bulatnia Kukakau le' geti bukku katusoksongan ka matat bangsa nene, bule rabele' situsosoksok kalulutnia; saukkui samba leu tatoga, pabebeakenen lalep samba saaleinia, sangamberitda masusubu le.”

²² Kasene le' ngangan Tuhan: “Bulatnia te' sara bangsa momoi sibara ka laggai isit ka bare', sara suku bangsa sabeu masigaja' tubu mei baratda ka tutut polak.

²³ Pamateira silogui samba simuine bakkat; Mugege le sia, ta'raagai mukate baga. Gong nganganda kele koat mukuro le' sia. Amatarekngan sia kele sirimanua siei pasaggak, masisaggangi ekeu, ale okkot Sion!”

²⁴ Akuarepman kai katuaremannia, kabeimai aibailiuan masaggo; pangoringan ailabaan kai, kuorik le' kai besi kele sinanalep sipususule.

²⁵ Ba' bebela ka su'su', samba ba' pugegejek, kaenunag aipoi pamateira taisaggak ai mugogolu – pugegeret tubu moi barania ka senen matat rusa!”

²⁶ Ale, okkot bangsaku, leppeiake le' komak goni, samba puguilu le' tubum ka abu! Pureureu baga le' kele masisoibi sara toga sisasara, pugeri le' ka besit tubu aipoi sinulut geti oi sipamamatei masisaggangi ekeu.

Jeremia ibailiu sipasisibo paamian

²⁷ Akuakkatakean ekeu ka talagat paamianKu sibailiu sipasisibo, bui ta'nuagai kipa masilelekakenia, samba masisibo galai tubutda.

²⁸ Sangamberidra iate simakele paatuat, muenung kasenen kudduta sibailiu sipasitelei; sangamberitda masigalaiake sikatai!

²⁹ Pasigoggongan aibutbutan, tapoi sibebela sibara ka obengan sarat ragguk simapusu', tembaga samba laba'. Siboboi le' mariuriu tulasatake sia, tapoi sangamberi sirimanua sikatai ta'ipasasara.

³⁰ Kua le' sia perak sikeraakenen, aipoi si Tuhan aikeraakean sia!