Jer. 52 - BUKO SIPUNENAN

Kabelekat Jerusalem

¹ Kateteret si Zedekia ibailiunia rimata ainia rua pulu saranga rura samba pulu sarangarura ujunia ai puparenta ka Jerusalem. Onin inania iate si Hamutal togat Jeremia, sibara ka Libna.

² Igalaiake le sikatai ka matat Tuhan makere kele sigalaiakenen Joyakim.

³ Aipoi kalulut golut Tuhan le aipuaili nenda ka Jerusalem samba Jehuda, iate pat ribbaiakenangan sia ka mataNia. Si Zedekia mugege katubut rimata Babel.

⁴ Iageti ka rura sika siba puparentaatnia, ka laggo sikapulu, kagogoi pulu, laggo nenda oi si Nebukadnezar, rimata Babel, pasamba sangamberi saladdunia masisaggangi Jerusalem. Pusapourangan ragoiliknia samba rioakerangan irip sigoilik sangamberinia.

⁵ Kisedda te aragoilik laggai nenda pat aili ka rura sikapulu sara puparentaat rimata Zedekia.

⁶ Ka gogoi siba laggo sikaepat, kateteret aitusalu pulajeat kasangaliot laggai nenda pat taibaranangan komenda taikauma kabaga ka laggai nenda,

⁷ iageti pakatairangan sirimanua irip laggai nenda. Masiitco sipuaaili nenda kateteret sinoibo tuitui rimata pasamba sangamberi saladdu, masikaddiuake laggai nenda masienungi matat baliu gugurukat ka oggak ka rua irip kabebet monen rimata, kenanen aragoilikngan tai Kasdim laggai nenda. Mutuitui le sia masiailiake Araba-Jordan.

⁸ Tapoi salddut Kasdim nenda rakukru le rimata Zedekia samba labarangannia ka susut Jerikho. Sangamberi saladdunia musabu masikaddiuakenia.

⁹ Labarangan rimata Zedekia samba ambitrangannia kai rimata Babel ka laggai Ribla kakupkumen Hamat, lepa kaunangan ukuman katubunia.

¹⁰ Rimata Babel masikoiniake ramateiake sangamberi tatogania kamatania; samba leu sangamberi sikebbukat ka Jehuda imateiake ka Ribla.

¹¹ Lepa geti kioknangan matat Zedekia, lepa kabenangannia samba ambitnangannia ka Babel kaunangannia ka tangsi pat aili kamateiatnia.

Lalep Tuhan Tupakatai

¹² Ka gogoi sikapulu laggo lima ka rura sikapulu siba puparentaat Nebukadnezar, rimata Babel oi te sara ka Jerusalem sipuoni si Nebuzaradan. Si Nebuzaradan iate sipangantru samba siuteake saladdu sipasijago rimata Babel.

¹³ Si Nebuzaradan masilabo uman Tuhan, purimataat rimata samba sangamberi lalep siabeu tiboi tubu ka Jerusalem pasamba obengan.

¹⁴ Sangamberi irip laggai Jerusalem bukkatnakerangannia saladdu Kasdim sikukuddu pasamba utet saladdu sipasijajago nenda.

¹⁵ Sangarubeiat sirimanua sitaiooi tubu samba sipulelegei sikuddu ka laggai nenda samba sirimanua sieei karubeiat rimata Babel samba sirimanua siagai mugalai sipulelei ambitnangan sia si Nebuzaradan, utet saladd sipujajago nenda ka pasiribbaiat.

¹⁶ Tapoi aipigapa sirimanua simageba ka laggai nenda ilegeiake si Nebuzaradan, utet saladdu sipasijajag nenda, addeat ibailiu sipugagalai ka monen anggur samba kapumonean.

¹⁷ Sangamberi arigi tembaga samba kereta ka uman Tuhan pasamba pulokat pembaga raragatnake tai Kasdim samba sangamberi tembagania raambit ka Babel.

¹⁸ Sialeu masiambit sangamberi bibilet nene: susukkai polak, balugui, kudduat oinan panubui samba pulokat samba sangamberi pugalai sibara ka tembaga pakeiet kapasigagalaiake punen panindogat alarangannia.

¹⁹ Sangamberi bibilet mas samba perak, guru' leu mangko sigoiso samba kudduat bot abengan, mangko kudduat logau tarimeu sija'ja addeat panguruat, kudduat abu, reret alito, mangko kudduat buluakenen, samba mangko kudduat pasiuruat panguruat suat anggur, sangamberinia alanangannia si Nebuzaradan.

²⁰ Sangamberi perunggu sigalai rimata Salomo addeat ka Uman Tuhan, iate karua arigi, sangamberi kereta, bejana samba kapulurua jaui sipasisopo bejana nenda, sangamberinia bulat masane, pat taioinangan tukilo.

²¹ Karua arigi perunggu nenda makere nantania: senenia balu meter nantania samba munenia lima koma telu meter. Keppunia perunggu 75 milimeter.

²² Senen arigi nenda ai utetnia nantania rua koma rua meter. Sangaliot utet arigi nenda ai pulaingean buat Delima sitikai, sangamberinia sibara ka perunggu.

²³ Buat delima sitikai kasenen arigi nenda ai sangotu, tapoi sibapulu enem le simakokoinong ka repe.

Tai Jehuda tuambit ka Babel

²⁴ Iageti si Nebuzaradan nenda masilaba Imam Sabeu Seraya, si Zepanya paguguletnia, samba telu sirimanua sipasijajago matat baliu Uman Tuhan,

²⁵ pitu pagugulet rimata ka laggai nenda, panglima, pagugulet panglima sipasikeli pubukoatda saladdu, samba enem pulu siabeu tiboi tubu bagei.

²⁶ Si Nebuzaradan, ute sipasijajago, labanangan sia samba ambitnangan sia ka rimata Babel ka Ribla.

²⁷ Lepa pakoininangan Rimata Babel ramateiake sia ka Ribla, ka polak Hamat. Kise araambit tai Jehuda ka pasiribbaiat baradda ka polakra.

²⁸ Nene te igitra siambit Nebuzaradan ka pasiribbaiat: karura sikapitu, telu ribu rua pulu telu stai Jehuda;

²⁹ karuara sikapulu balu kateteret Nebukadnezar, balungotu telu pulu rua sia sibara ka Jerusalem;

³⁰ karuara sikarua pulu telu kateret Nebukadnezar, siambit Nebuzaradan, siuteake saladdu kapasiribbaiat, pitungotu epat pulu lima sia tai Jehuda; igitra sangamberitra epat ribu enemngotu sia

³¹ Kagogoi rua pulu lima laggo pulu rua karura sikatelu pulu pitu lepat aituambit si Joyakhin ka pasiribbaiat, iageti Ewil-Merodakh bailiu rimata Babel. Karura nenda leu et pakoinongnangan katetbagania kai Joyakhin, samba belaakenangannia ka tangsi.

³² Ewil-Merodakh manibo simakolou pasamba si Joyakhin samba kaunangan katubunia puaabeu sisaliu puaabeura tai rimata pasamba nia ka Babel.

³³ Si Joyakhin momoi isili bibilet putangsinia samba momoi ikom roti kamatat rimata kaujut puririmanuania.

³⁴ Pagalaiat komennia, rimata Babel mariuriu le ikaunia, siripokat pakeietnia sisenen gogoi, ujut purimanuaiatnia, teret gogoi kamateiatnia.