Jer. 51 - BUKO SIPUNENAN

Ukuman bagei ka Babel

¹ Kuanangan si Tuhan, “Bulania te, Kukakau le angkat baga pasikakatai ka Babel, samba ka silaggaijinia.

² Kukakau le geti sia sioiake rapakatai ka Babel kele rusa iburutake kulit gandum. Aipoi ka gogi pugejaatbaga saggangirangan laggai nenda sibara ka senenda.

³ Kau le si pupapana nenda masiaraiake papanania ka sirimanua ka sipasirarai samba katubut sirimanua sipuleppei pasaggak! Bui ibara nuntut baga ka tailaingenia, sapruake sangamberi saladdunia.

⁴ Sangamberi sirimanua simateiakenen parapponangan sia geti ka laggaira tai Babel samba sirimanua sibara mauju' simakope ka sangamberi enungannia.

⁵ Aku, Tuhan, Taikamanua sebaot, Taikamanua sipunenen Israe, Israel samba Jehuda ta'tukaddiuakenia, kenanen amajongan sia katubukKu.

⁶ Tuituiake kam ka talagatda tai Babel, bule bui numatei kam kelulut puseleatnia!. Aipoi nene te gogoi isiliakenia si Tuhan; siripot puselat sigalainia.

⁷ Siboiki Babel kele pulokat mas ka kabei Tuhan sikau iroro' sangalio polak. Sangamberi siberikanaga mulo ka anggurnia, nenda te lulunia sangamberi siberikabaga ibailiu siroro'

⁸ Tapoi sinulut bele' samba maragatnangan Babel. Soibi kam nia, samba gaba kan laggek siorangannia, baleu male le nia!

⁹ Siboikinangan kuoba kai masialeake Babel, tapoi ta'momoi tualeakenia; kaddiake le kam nia, konan tatuitui kam senenta ka laggaita! Bulatnia, pasiukuman Babel asegean ka manua, ai ailingan ka tanai rusa!

¹⁰ Aigalaian si Tuhan senengamata puroipoatta ibailiu matoila; konan tatiboikannia ka Sion sigalaiakenen Tuhan, Taikamanuanta!

¹¹ Palauru kam silogui, tarekngake kam sangamberi korabbi! Aisuruakean te si Tuhan puroron tubutda tai rimata Media, aipoi pinaatuNia ka Babel iate masipakatai Babel: nenda te pasisisiliakena si Tuhan, pasisisiliakena kalulut uma sipunenanNia!

¹² Kau toggaiat addeat masisaggangi sangamberi irip laggai Babel. Paron kam pasijajago. Pakudduake kam sipujajago. Patarek kam kekre! Aipoi si Tuhan aipaatungan samba aigalaiakean leu et aponia sipinaatuNia ka sipulalaggai ka Babel.

¹³ Ale ekeu sipukukuddu ka bebet bagat oinan sabeu, sibara pukayoat sabu, kalepakat purimanuaiatnu amoai, teteret purimanuaiatnua ai ailingan!

¹⁴ Tuhan Sebaot musuppa ka tubuNia sarania, Iaake te geti sirimanua igit sit addeat masisaggangi Babel, samba gereiakerangan geti gerei kamamanang.

¹⁵ Tuhan le masibailiuake polak pasamba gegeNia, masigalai polak pasamba puaagaiNia, samba masinganangake manua pasamba agai paatuatNia.

¹⁶ Ke'bai Ipaarep ngangaNia, pugoknangan leu oinan ka manua silakkup polak, karaiakenangan tanai rusa barania ka tutut polak, samba galainangan si Tuhan bila' sialei urat, belaakenanga rusa sibara kakudduat pasikoirikatnia.

¹⁷ Senen sirimanua sitaiagai paatuat, sitaanai puaagai, samba senen siagaimugalai mas ibailiu le geti maaila kalulut tularat bukku sigalaira. Aipoi tularat bukku sigalainia nenda iate taju, samba taanai engania,

¹⁸ sangamberinia iate siboboi, mateu le tugegei samba tuloloi. Ke'bai ai ailingan teterenia tususubuaake geti sia.

¹⁹ Taikamanuan Jakob ta' kele tularat bukku nenda; Nia sipasigagalai sangamberinia. OniNia iate Tuhan Sebaot; Ai bakkatingan Israel ibailiu paamianNia.

²⁰ Kuanangan si Tuhan, “Babel, ekeu kelean le panoko, palitteiKu pasaggak. Ekeu le Kupakei masipakatai sangamberi siberikabaga samba sangaberi purimataat.

²¹ Ekeu Kupakei masipakatai kuro samba sipasiambitnia, kereta samba sipasimuriakenia.

²² Ekeu le Kupakei masimateiake taimanteu samba tainanalep, simabaja samba sibautubu, taiokko samba tailainge.

²³ Ekeu le Kupakei masisubuake sipasijajago tarimru samba tarimeunia, sipumomone samba jaui sipasigabru polak, sibara gege samba siabeu tiboitubunia.

²⁴ Kuanangan si Tuhan, “Itcoakeake kam kipa Kusialiake ka Babel samba ka taikaumania sangamberi pukakatai sigalaira katubut Jerusalem.

²⁵ Ale Babel, ekeu kele leleu sipakatai sangamberi polak. Tapoi Aku, Tuhan, masisaggangi geti ekeu. Kutiktik samba Kuguiluake geti ekeu samba Kuobaake malabo ibailiu abu.

²⁶ Taanai beri sara bukku taiming ele bukku bongen sibara kasiragatatnu tupapakei minca. Ekeu ibailiu geti kele su'su simatangeu teret buruburu. Aku, Tuhan, amanibongan.”

²⁷ Rioake kam toggaiat ka polak, ulup kam pipiau katalagat sangamberi bangsa, patarek kam sangamberi bangsa pasaggak masisaggangi Babel. Koiniake kam sangamberi purimataat Ararat, Mini, samba Askenan masisaggangi. Rioake sara utet saladdu masisagganginia. Patoila kam kuro kele igit mungkuat sit!

²⁸ Patarek kam siberikabaga pasaggak masisaggang Babel, tai rimata Media pasamba sibara gege samba siabeu tiboitubu, samba senen laggai ka kupkumennia!

²⁹ Polak mungeungeu samba mugeret, kalulut pinaatut Tuhan pagalaiat Babel ai gagalaiake, iate masibailiuake laggai Babel ibailiunia kudduat simagarak taikukudduijiet sirimanua.

³⁰ Saladdura tai Babel araariakean pasaggak samba mukuddu le sia ka pulekenen. Sapru le gegetra samba taan amoi tubutra. Sangamberi matat baliu gugurukat laggai araragatnan, samba sangamberi lalep tulabo.

³¹ Pabalairangan sipatutut sapakoinien raei masipaagai ka rimata Babel, laggainia araalauan barania kasenen taiming laggai.

³² Kudduat putalipokat arakukudduijingan tai saggak, samba kudduat pulekenan aralaboan. Saladdut Babel ibailiu mugaugau.

³³ Aipoi kise le ngangan Tuhan sebaot, Taikamanuan Israel, Taan mauuju tukalaake sia samba rapapereki sia tai saggak kele gandum ka kudduat pamerakat.

³⁴ Jerusalem ipakatai samba ikom sapru rimata Nebukadnezar, rimata Babel, galakngakenangannia kele mangko sitakabaga. Kele ulou sabeu, iguk Jerusalem samba isunnake balugunia senengamata simaeru sibara ka laggai nenda, lepa legeinia ribbaiakenengannia.

³⁵ Sipulalaggai ka Sion, kua kam, “Bule Babel isaksak pueementubu sigalaiakenennia katubutta!” Sipulalaggai ka Jerusalem, kua kam, “Bule babel isaksak pangoringan sisaksakngakenennia katubutta!”

³⁶ Kalulut nenda kise le tiboiet Tuhan: Bulatnia te, Aku te masiroropmake pakaromui samba masisiliake galaitubut saggaknua katubum. Kugagarakngake le geti koat samba bubuaket oinannia.

³⁷ Babel ibailiu le geti panambui siragata, kudduat pulippunan sirigala, kudduat pulotoket samba beri sara sirimanua sioba mukuddu sedda.

³⁸ Tai Babel murou kele singa, samba paemang kele togat singa.

³⁹ Ke'bai ai agaian tubutra oloi, Kutattanake le geti komenda, samba masika sia muroro' samba mupuinengpat perep sia samba taan tususuru sia minca, kise te tiboiet Tuhan.

⁴⁰ Kuibuake le geti sia bule tuja'ja kele togat kambing, biribiri simanteu samba kambing simanteu

⁴¹ Kuanangan si Tuhan, “Babel umunnakenen ka sangalio polak araalauan samba arakudduijingan! Bulat kalotoakenen le laggai nenda ka siberikabaga.

⁴² Koat aitalungan Babel, orut onunia sipugogong ailakupmannia.

⁴³ Sangamberi laggainia ibailiu le kalotoakenen kele su'su simatangeu simagarak. Taikukudduijiet berisara sirimanua samba taisasabauget berisara sirimanua.

⁴⁴ Kuukum le geti sabulungan Bel ka Babel. Kukau le geti itoliake apa sirauraunia. Sangamberi siberikabaga taan geti rapaninindoginia minca. Sangamberi irip laggai Babel amabukkatnan.

⁴⁵ Belaake kam ka kabeinia, ale paamian-ku! Kau le senen sirimanua masipaarau engania ka golot Tuhan sipujujulu nenda!

⁴⁶ Bui nukarat bagam samba numaloto kalulut katuarenan siarepnu. Senen rura maarep katuarenan sitaimakere – katuareman pagalaiat pututugrut tubu ka bagat laggai samba pagalaiat tai rimata sipasasaggak pasamba rimata bagei.

⁴⁷ Aipoi bulatnia te, babara geti teterenia, Kuukum geti sangamberi tularat bukku ka Babel; sangamberi laggainia ibailiu geti maaila samba sangamberi silaggaijinia tumateiake.

⁴⁸ Iageti manua, polak samba sangamberi sibabara kabagania mugora baga, ke'bai Babel bele kakabeira sibara bare siooi masipakatainia.

⁴⁹ Maigi sirimanua ka sangalio polak atumateiake kalulut Babel, tapoi kineiget Babel bele le geti kaoninra tai Israel simamatei.

⁵⁰ Kam sirimanua sibebela ka lanjau, kenan kam, bui nupuari kam! Repdep kam kai Tuhan kenanen ai kam kasareunan samba eddangannia Jerusalem mututu minca ka paatuatmui.

⁵¹ Maaila le kai, kalulut akurapman kai pagalaiat paloloiat samba pakailaat silakup sangamberi putubuatmai, aipoi sirimanua siooiake aragurukingan kudduat sipunenan ka uman Tuhan.

⁵² Kalulut nenda bulatnia te, babara te geti teterenia, ngangan Tuhan, Kuukum te geti sangamberi tularat bukku ka Babel, samba sangamberi laggainia maarep geti katsit sirimanua kalulut kopet besit siorangan.

⁵³ Kenanen bai Babel maoi itusakei ka manua samba galainangan kudduat pulekenan sitaoi tuaili, mariuriu le Kukau sirimanua masipakatainia, kise te tiboiet Tuhan.

⁵⁴ Kuanangan si Tuhan, “Arepmake kam! Sou geri sibara ka Babel samba kakakatai sabeu sipuaaili ka lagga nenda.

⁵⁵ Ai Kupakakatai Babel samba masiariake nganga sabeu. Kenanen arunia mugong kele oinan sabeu samba ngangania memei mabebeu,

⁵⁶ tapoi ka Babel momoi geti sipasikakatai, saladdunia tulaba geti samba rouroura tupakatai geti, aipoi si Tuhan iate Taikamanua sipasisisiliake, samba isisisiliake geti galaitubutra.

⁵⁷ Kugagalai le geti ipuineng sikabbukat laggaira, sirimanua simasoppit, sautenia, samba siabeu tiboi tubunia, samba salddunia, pat laulaunangan sia teret buruburu, taan tususuru sia minca, kise te ngangan Rimata Sabau, Aku, Tuhan Sebaot

⁵⁸ Irip laggai Babel simaron Kupakakai le geti pat bailiu gaktuk polak. Matat baliu gugurukatnia simabuak Kulabo le geti isapru. Siboboi le basit tubu sangamberi siberikabaga, aipoi sangamberi buat sigalaiakenenra ilalabo le geti obengan. Aku, Tuhan Sebaot, amanibongan.

Patonekat Jeremia tusegeake ka Babel

⁵⁹ Patonekat sikau nabi Jeremia kai Seraya togat Neria punuteteu Mahseya, kateteret ai ei si Seraya pasamba si Zedekia, rimata Jehuda, ka Babel ka rura sikaepat puparentaat rimata Zedekia – Teteret nenda si Seraya iate ute sipasikeli rimata Zedekia.

⁶⁰ Sangamberi pugejaat baga siorak Babel samba titiboat pagalaiat laggai nene ai suratnakean si Jeremia ka bagat buku.

⁶¹ Lepa kuanangan si Jeremia kai Seraya, “Ke' asegaean ekeu ka Babel, besiake le' bule sangamberi sitususurat ka buko nene moi nubasaakenia,

⁶² samba kua le, ‘Tuhan, Anukuangan, laggai nene Nupararagat geti, pat sapru sikukuddu ka bagania, sirimanua samba leu tarimeu. Laggai nene ibailiu le geti kudduat simatangeu teret buruburu.’

⁶³ Ke'bai alepaan nubasaake bagat buko nene, iageti aparaakenungan sara bukku ka buko nenda, lepa ribbaiakenungannia ka talagat bagat oinan Efrat

⁶⁴ pasamba kuanungan, ‘Kise te imalelep geti Babel, samba taan tuootou minca, kalulut pugejaat baga sikauKu katubunia.’ ” Teret sene sangamberi tiboiet Jeremia.