Jer. 50 - BUKO SIPUNENAN

Kabebelenia Babel

¹ Nene te patonekat Tuhan katubukku pagalaiat laggai Babel samba silaggaijinia,

² “Kau kam toggaiat samba segeake kam ka siberikabaga, Babel abelean! Bui nupakele kam pagaiat nenda! Meradokh sabulungannia atupakai, samba sangamberi tularat sipaelet gatca saragai, samba tularat sabulungannia bulat tupaloloi le.

³ Sara taikauma sibara ka bare momoi geti masisaggang Babel samba masibailiuake laggai neda ibailiunia su'su simagarak. Sirimanua samba tarimeu mutuitui geti, samba beri sara geti sioba mikuddu sedda.”

Israel toili

⁴ Kuanangan si Tuhan, “Kateteret nenda tai Israel samba tai Jehuda momoi geti sia simakere musou, masigaba Aku, Taiakamanuanra.

⁵ Raparereake geti enungan ka Sion, iageti puenungrangan kaenungan siei sedda. Konan kam tapatabraake tubu kai Tuhan, patabra ka sara palelengan simatom sitaoitukalipogi!

⁶ PaamianKu kele sara biribiri simalilimai; siobakenanra sipasijajago terimeu imalimai. Putebarangan kasenen leleu bagei samba pat kalipogirangan lalepra.

⁷ Kasei siailiake sia, pakominangan sia. Sangamberi saggak paamianKu masikua, “Ta'masele kai! Kalulut amajonga sia kai Tuhan. Taikebbukatra matonembagatra kai Tuhan, oto siripokatnia mariuriu le sia mutopit katubuNia.”

⁸ Ale paamian Israel, tutituti ake ekeu ka katalagatda Babel, kalaggaira tai Kasdim! Belaake ekeu! Kau ibailiu ekeu kele kambing simanteu siuteake mungkuatnia!

⁹ Aipoi bulatnia te, Kukokoiniake le samba Kususuruake le sangamungkuat taukauma simigi sibara ka bare bule rasaggangi Babel. Pakudduranan pueenungra addeat masisaggani Babel, samba masikalaakenia. Sia iate simaorak mupana samba rapanaake siloguira tatusasabau.

¹⁰ Laggaira tai Babel ibailiu geti raparauraugi, sangamberi sirimanua geti masege le bagatra masiparauraugi. Aku, Tuhan, amanibongan.”

¹¹ Kenanen leu maangka baga samba magora bagamui, ale sirimanua sipasiraraurau paamianKu. Kenanen leu nupaattatkam tubumui kele togat jaui sipukokom parou, samba meringkik kele kuro simanteu.

¹² Tapoi ibailiu le geti ekeu taikauma bulat sita'paluluat ka talagat sangamberi taikauma. Laggaini ibailiu geti su'su simatangeu, bakkat loina, samba su'su simase'se.

¹³ Kalulut goluKu, Babel ibailiu geti siragatat samba ta'anai sikuddujinia. Sangamberi sirimanua situsasabau sedda tugege geti mukisei kabaga kalulut bo'bobo sioriknia.

¹⁴ Ale kam sipupapana! Pakuddukam puenungmui masialou samba masisaggangi Babel. Panaake sangamberi siloguinu kaipot Babel, kalulut amajongania katubukKu.

¹⁵ Gereiake katsit pasaggangan sigoilik laggai nenda! Kineiget Babel amakalangannia. Sangamberi iripnia amaibungan samba amaragatnan. Bulatnia, nenda sisiliakenen Tuhan! Galaiake katubunia kele sigalaiakenennia ka sabagei.

¹⁶ Sapruake sirimanua sipangungurep sabara ka Babel samba sipasimomonei kateteret pasimoneiat! Masikalaake lanjau simakope ron nenda, senen sirimanua raolei toili geti ka taikamuannia, senen sirimanua mutuitui geti ka laggainia.

Israel toili

¹⁷ Tai Israel iate kele mungkuat biribiri sisabuakenen, samba sialau singa. Siboiki rimata Asyur masisaggangi sia, lepa si nebuladnezar, rimata Babel lutcu sangamberi tolatra.

¹⁸ Kalulut nenda kise le ngangan Tuhan sebaot, Taikamanuan Israel: Bulatnia Kuukum le rimata Babel samba laggainia, kele Akuukum rimata Asyur.

¹⁹ Tapoi Kutototiliake le tai Israel ka laggiara. Mukom le sia buat siureman ka leleu Karmel samba ka basan. Maengtek le sia buat siureman ka kupkumen Efraim samba Gilead.

²⁰ Kateteret nenda, kise le ngangan Tuhan, ragabe le geti sirimanua puseleatra tai Israel, samba jotda tai Jehuda, tapoi ta'aisese, Kuappeake le geti sirimanua sipaarauKu.

Ukuman ka tai Babel

²¹ Kuanangan si Tuhan ka sara Taikauma sibara ka bare', Saggangi kam sipulalaggai ka Merataim samba Pekod. Mateiake samba subuake sia. Galaiake kam siparentaakenKu. Aku, Tuhan amanibongan.

²² Nau gong pasaggangan ka laggai, samba puailinangan kakakatai sabeu.

²³ Sangamberi polak itoddoi le Babel pata gatca, tapoi kineiget panoko nenda amatakkian! Sangamberi taikauma tugege le masiarep apa sipuaaili ka laggai nenda.

²⁴ Kuanangan si Tuhan, “Babel, ekeu masisaggangi Aku, lulut nenda tujebak le ekeu ka sesere sigalaiKu addeatnu, tapoi taanuagai.

²⁵ Akubukaan kudduat pamateiKu, samba ka golu Kubelaake le sangamberi pamatei nenda, aipoi Aku Tuhan Taikamanua sebaot bui ta' Kugalaiake sara galaiakenen ka Babel.

²⁶ Saggangi le Babel ka senen kabaraiat, samba patedda sangamberi kudduat gadumnia! Ruruake sangamberi bibilet siraurau kele nururuake gandum! Pakatai laggai nenda! Bui ibara sipulelegei!

²⁷ Mateiake sangamberi saladdunia! Tataake sia! Paan te ka kam taikauman Babel, aipoi aiailingan teterenia, ituukum sia!”

²⁸ Arepmake! Sangamberi sipututuitui samba sirimanua sibebela sibara ka laggai Babel moi masipaagai ka Sion pagalaiatan sisiliakenan si Tuhan, Taikamanuanta, kalulut galaitubutra tai Babel ka umaNia sipunenan.

²⁹ Kuanangan si Tuhan, “Koiniake le sipabebetu samba sangamberi sipupapana rasaggangi Babel. Goilik kam laggai nenda, bule bui ibara sibebela. Siliake kam sangamberi sigalainia samba galaiake katubunia kele sigalaiakenennia. Aipoi aigalaiakeaan sitaimaroipo katubukKu Sipululatsat, Taikamanuan Israel.

³⁰ Kalulut nenda sangamberi tailenge matei le geti ka senen enungan laggainia, samba sangamberi saladdunia tupakatai. Aku, Tuhan, amanibongan.

³¹ Bulatnia te, Aku le ibailiu saggaknu, ale ekeu sitaiagai arat, kise le ngangan Tuhan Taikamanau sebaot, aipoi teterenia amuailingan Kuukum ekeu.

³² Sirimanua sitaiagai arat nenda tusoksok samba bele. Ta'anai beri sara sirimanua sisuruaake ekeu. Ka sangamberi laggainu, Kulabo geti, samba senengamata kabebenia tupakatai geti.”

³³ Kuanangan Tuhan sebaot, “Tai Israel samba tai Jehuda pinaore. Sangamberi sirimanaua sitangsiake sia mariuriu le rakeraake sia, taraoba masiobaake sia.

³⁴ Tapoi Aku sipanebui sia neda maron, Tuhan sebaot oniNia. Aku saraku le siropmake pakarora samba masiambit aban ka polak. Tapoi Kubabaraake le geti pulamaugat katubutda sipulalaggai ka Babel.”

³⁵ Kuanangan si Tuhan, iorak le lanjau tai Kasdim, sipulalaggai ka Babel sikebbukat laggai samba sirimanua siamsiku paatuat!

³⁶ Iorak le lanjau siagai patuptuman gogoi, pat koinong sia sitaiagai paatuat le! Lanjau masisaksak sangamberi saladdunia, pat bailu tuge'ge le sia!

³⁷ Iorak le lanjau kuronia samba kereta pasaggaknia. Saksak le sangamberi saladdu siupa! Bulat ta'maoi tibuta! Pakatai kam pukaioat Babel! Parauraugi kam pukaiatnia!

³⁸ Iorak le lanjau senengamata oinania, pat bailiu magarak! Aipoi laggai nenda sun le sangamberi tularat, iabailiu le maroro sia kalulut masipanindoginia.

³⁹ Kalulut nenda sangamberi tarimeu ka su'su samba jojot leleu mukuddu geti sedda. Sangamberi uma unta mikuddu geti seda teret buruburu. Laggai nenda taan geti tukukuddiji minca sirimanua teret buruburu.

⁴⁰ Kele siburu, kateteret ai paragat Taikamanu Sodom samba Gomora samba laggai pababaakenennia, kise te' ngangan Tuhan. Ta'an anai sirimanua sikukuddu sedda samba togat sirimanua leu taan anai sikukuddu ka bagania.

⁴¹ Itco pei, sara bangsa moi geti sibara ka bare', sara suku bangsa sabeu, samba maigi rimata masigaja geti tubunia mei baratra ka tutut polak.

⁴² Rapakei le silogui samba simuine bakkatra ta'raagai pukakatet baga Kele nau igotco bagat koat nganganda mukuro le sia panarenganda kele sirimanua sieei pasaggak, masisaggangi ekeu ale, okkot Babel.

⁴³ Rimata Babel aiarepman katuareman pagalaiat sia, ibailiu masaggo le kabeinia pugejatbaga aitarakupannia, ipangorik kele sinanalep sipususule.

⁴⁴ Kele singa ibela barania kabakkat sese ka bebet bagat oinan Jordan samba ailiakenangan susu pukoman biribiri parou, kise te Aku, Tuhan, kuoi geti samba galaikungan ratuitui sinulut tai Babel kalaggaira. Lepa Kupili le geti sara ute masiuteake siberi kanaga neneda. Kasei moi tupakereake kele Aku? Kasei maeme masipaukleake Aku? Ai pa' ute sioi masisaggangi Aku?

⁴⁵ Kalulut nenda arepake kam siteuakenen Tuhan pagalaiat Babel samba sangamberi isiatNia ka pgalaiat laggaira tai Kasdim: Bulatnia te, beringan leu bulat sitaioitubu katalagat mungkuat biribiri tugigirit le. Bulatnia te, polak simaturuturu muloto le geti katubutda.

⁴⁶ Pungeungeunangan leu polak kalulut katuareman: Atuoppungan Babel; maarepnangan leu soura katalagat sangamberi bangsa!”