Jer. 5 - BUKO SIPUNENAN

Ukuman Tuhan ta'momoi tukatsiliake

¹ Riringi le' sangamberi enungan Jerusalem, Itco simakolou samba kua le'! Lelekngake le' sangamberi polaknia simalio, momoi leu pa' nusese sara sirimanua, ai leu pa' sigalaiake puroipoat samba sipasigagaba pubulanan, iageti obakungan masiappeake laggai nenda.

² Kenanen bai rakua: “Ka onin Tuhan sipuririmanua,” tapoi musuppa le sia ta'kasibulatnia.

³ Ale Tuhan, ta' pa' nuipoake mataM ka pubulanan? Nu bo'bo' le sia, tapoi ta'amabesi sia; Pabubunangan sia, tapoi ta'araoba' masisilo nganturat. Rakelaake le' patuatda, bele pei bukku, samba ta'raoba masibauake paatuat.

⁴ Lepa paatukungania: “Nenda sarat sirimanua sigoiso le'; Sia iate sirimanua sitaiagai paatuat le, aipoi ta' raagai enungan Tuhan, surukat Taikamanuanda.

⁵ Maeruan kuei ka sirimanua siabeu tiboi tubu, samba patibo katubutra, aipoi sia le siagai enungan Tuhan, surukat Taikamanuanda.” Tapoi sia sangamberitda arabakbakakean bairanen, aratakkiakean sangamberi tali pasiapra'.

⁶ Lulut nenda singa sibara ka leleu pabobokinangan sia matei, samba jojot leleu sibara kasimatangeu pakatainangan sia. Macan simagurik itaiko le' bebet laggaira, senen sirimanua sibebela itarakup le sia. Aipoi pasisasabaura bulat maigingan, samba kapepeatnia bulat mabeu.

⁷ Kipa, ke' kasedda, momoi pa' Kuappeakeu? Tatogam arakaddiuakean Aku, samba musuppa ta' ka Taikamanua. Lepat Akupaektek sia, paeletrangan, samba paaili ka lalep puoloman.

⁸ Sia iate sangamberi kuro simanteu simamo'mo' samba simaron simabotbot tubu, senenda masikiddi sikalalep aleinia.

⁹ Kipangan le' pa' ta' Kuukum sia kalulut sangamberinia nene?, kise te' ngangan Tuhan. Iangan pa' ta Kusisiliake besit paatuatKu katubut bangsa kele nene?

¹⁰ Sakai le' ka monen anggurnia si orat', pakatai le', tapoi ba' sasapruake. Ribbaiake le' sangamberi ran loina anggurnia, aipoi sangamberinia nenda ta' si Tuhan sibakkatnia!

¹¹ Aipoi muntogat Israel samba muntogat Jehuda sibulatnia taan aragalaiake topit katubukKu, kise te' ngangan Tuhan.

¹² Poboko le' sia pagalaiat si Tuhan samba masikua: “Ta' aigalai si Tuhan apa pa'! Pugejaat baga geti ta' ioorak sita, pasaggangan samba pulajeat ta' taenungi kam.

¹³ Tai nabi ibailiu le' geti rusa, tiboiet Tuhan ta'anai katubutda.”

¹⁴ Kalulut nenda kase le' ngangan Tuhan, Taikamanua sebaot: “Kalulut rapasikua kele nenda, iageti kase te' muaaili katubutda: Bulatnia te' Kugagalai le' geti sangamberi tiboietKu, ibailiu obengan ka ngungum, samba bangsa nene ibailiu le loinat paneu, iageti sapru sia ipakomi sia obengan.

¹⁵ Bulatnia te' Kubabaraake le' geti, sara bangsa sibara ka sareunan masisaggangi kam, ale muntogat Israel, kise te' ngangan Tuhan, sara bangsa simakope' ron, sara bangsa barania ka siburu', sara bangsa tai agaietnu ngangania, samba sitaiagaietnu kolou aponia kuanennia.

¹⁶ Salukat rourounia kele ratei sipungangaungau, sia sangamberitda iate saladdu.

¹⁷ Rasapruake le' geti buat siuremanmui samba komenmui, rapakomi le' geti tatogamui simanteu samba sinanalep, Rapakomi le jaui samba biribirimui sapru, rapakomi le' geti loinat anggurmui samba sangamberi loinat sileumui, rapakatai le geti pasamba lanjau sangamberi laggaimui sibara irip, acciakenenmui.”

¹⁸ “Tapoi kateteret nenda leu, kise te' ngangan Tuhan, Ta' Kusasapru kam.

¹⁹ Ke' bai panounou kam: Angoi le' pa' igagalaiake sangamberinia nene si Tuhan, Taikamanuanta ka sita, iageti aleginungan sia: Kele anukaddiuake kam Aku samba anupaguguletnakekam tubumui ka taikamanua bagei ka laggaimui, kise te' nupaguguletake kam tubumui ka sangamberi siooiake ka saralaggai ta' ka laggaimui.”

²⁰ Paagai le' nene ka talagat muntogat Jakob, paarep le' nenda ka Jehuda pasamba masikua:

²¹ “Arepmake kam nene, ale bangsa sitaiagai paatuat samba sita'anai paatuat, sibara mata, tapoi ta'masiitco, sibara talinga, tapoi ta'masiarep!

²² Mandean pa' ta' maloto kam katubukKu, kise te' ngangan Tuhan, ta' mageret tubumui katubukKu? Ta' pa Aku le' amasigalai buggei simangai sibailiu sok koat, sibailiu tuapeiat simariuriu sitaioi tusaliu? Kenanen bai ieddunia, tapoi ta'momoi, kenanen bai ipabetujinia onu, tapoi ta'momoi tusaliuakenia!

²³ Tapoi bangsa nene ai paatuat simariuriu masisaggangi samba muungkat; atusoipman samba amapepengan sia.

²⁴ Ta'arakua ka paatuatda: Kau le' geti ta'maloto kai Tuhan, Taikamanuanta, sipasiake urat ka teterenia, urat ka panandat rura samba leu urat ka buttet rura, samba sipasikeli ka sita senen menggui simariuriu pasimoneiat

²⁵ Puseleatnu masikekreake sangamberinia nene, samba jom masipetpetake simaeru ka tubum,

²⁶ Bulatnia, katalagat paamianKu, ai sirimanua sikatai, sipasigagalai jariknia kele seseret uma' rakau seserenia, rasere le' sirimanua.

²⁷ Kele rumun ibailiu sun sangamberi uma', kise te' lalepda ibailiu sun le sipatataju; Nenda te' lulunia ibailiu sia siabeu tiboi tubu samba makayo,

²⁸ sirimanua simabeu tubu samba simamo'mo. Aipei bagei raobaake le' itusabau sangamberi pukakatai, ta'rapuletsei ukum ta'aramanangake pakarora tatoga sita'eppu, samba ta'raropmake bakkatda simageba.

²⁹ Kipangan pa' ta' Kuukum sia kalulut sangamberinia nene?, kise te' ngangan Tuhan. Iangan pa' ta' Kulumunake besit paatuatKu ka bangsa kele nene?”

³⁰ Kalotoakenen samba pukaranan baga muaili laggai nene:

³¹ Tai nabi masipatuptup sipatataju samba tai imam sipasigegelaiake ka obat baga, samba sapaamianKu raoba le' kise! Tapoi aponia le' geti nugalaikam ke' bai amoian kalepakatnia?