Jer. 49 - BUKO SIPUNENAN

Ukuman ka tai Amon

¹ Nene te' sikuat Tuhan pagalaiat tai Amon, “Angoi polak suku Gad tulalau samba rakuddiji sia sipanindogi Sabulungan Milkom” Taan anai pa' tai Israel sipasirorop laggai nenda?

² Tapoi ai te geti teterenia, Kubaliuake sipulalaggai ka Rama, inan laggai Amon nenda, masipaarep pipiau katuaggaiat pasaggangan. Laggai nenda ibabailiu te siragatat samba sangamberi laggai malabo' sapru. Iageti alarangan minca tai Israel polakra ka sirimanua sipasialau siboiki.

³ Ale tai Hesybon, pusou kam aipoi laggai Ai amakataian! Ale tainanalep ka laggai Rama, pusoukam! Leppeiake kam komak goni taggaiat reureubaga. Purio kam sedda kele sitaiagai kolou. Milkom sabulunganmui tuambit geti ka pasiribbaiat pasamba tai imam samba sipugagalai ka pamarentania!

⁴ Ale kam sitaimatopit! Angoi nuabeuake kam su'su'mui simagabru? Apa lulunia nukakaroakekam pukakayomui? Kipa iooi nukuakam, berisara sirimanua simaeme masisaggangikam?

⁵ Iorak geti kam gege sibaraakenKu kasen kudduat. Mututuitui le kam, senemui masibesiake masibelaake tubunia, samba ta'anai minca sipasiruruake kam.

⁶ Tapoi kasara tetere, tai Amon Kutotiliake le sia. Aku, Tuhan amanibongan.”

Ukuman ka Edom

⁷ Nene le sikuat Tuhan Sebaot pagalaiat Edom, “Ta'pa' momoi rapuaatuat simasiku tai Edom” Taan pa' arakau minca panganturat sipangangantru katubutra? Asaprungan pa' pusikuatra!

⁸ Ale sipulalaggai ka Dedan, toiliake kam samba putuitui kam! Kenan kam mulipput. Aipoi Kubabaraakean le paoreat ka muntogat Esau, kalulut teterangan Kuukum sia.

⁹ Ke'raappek sirimanua buat anggur, ai le ralalageiake, samba ke' moi sinoibo sipananangkou, iaala sarat apa obaketnia le.

¹⁰ Tapoi, Kusabuiake le sangamberi bakkat muntogat Esau, samba masibuka pakelaat kudduat pulippunanra; taioinangan ralipputnake minca tubutra. Muntogatra tai Edom amasubungan samba sasarainania samba bangsa pabebeakenennia, berisara sia abela.

¹¹ Ale Edom! Galakngake kam sangamberi totagamui sita'ama ka tubu'Ku, Aku le masipasikeli sia. Eddangania tai lumangmui masikatonemi Aku.

¹² Sirimanua sitaimateu tuukum leu, iorak leu ukum, angoi ekeu taa? Ekeu bulatnia bui tatuukum le!

¹³ Musuppa le Aku kaoningKu, laggai Bozra ibabailiu le kudduat kalotoakenen sikaddiuakenen sirimanua. Ragagagati le nia sirimana samba oninia rapakei le sibailiu telei. Sangamberi laggai sigoiso kabebenia ibabailiu le siragatat teret buruburu. Aku, Tuhan amanibongan.”

¹⁴ Aku, Jeremia, masikua, “Ale Edom, akusiloaan sara katuaggaiat sibara kai Tuhan. Aikoniakeaan pakoinien ka sangamberi bangsa masikoiniake sia masiruruake saladdu samba masipatarek tubu masisaggangi ekeu.

¹⁵ Ibabailiuake le ekeu si Tuhan masaggo samba loloiet sirimanua.

¹⁶ Ipataju le ekeu buakpaatuatnu. Taanai simaloto katubum kele sipaatum. Mukuddu le ekeu ka ngaliu bukku, ka tutut leleu. Tapoi, kenanen nugalai lalepnu ka kudduat simakope buak, kelebuak rumun manyang, igogorosotnake le ekeu sedda si Tuhan sedda. Si Tuhan le sipasikukua sangamberinia nenda.”

¹⁷ Kuanangan si Tuhan, “Paoreat siorak Edom makope le besi' pat senen sirimanua situsasabau sedda tugege samba maloloto le.

¹⁸ Kele atupakatai Sodom samba Gomora pasamba laggai sigoiso pabebeakenennia, kisedda leu Edom. Baringan le sara sirimanua sikukuddu sedda. Aku, Tuhan, amanibongan.

¹⁹ Kele ituloddoi singa barania ka leleu ka bebet Onina Jordan samba masibelaiji su'su kuddut biribiri ipasikom parou, kisedda geti Kuoi samba Kukau ratuitui tai Edom ka laggaira sinulut. Lepa sausaukungan sara siuteake masiparenta bangsa nenda. Kasei pa' momoi tupakere pasamba Aku? Kasei pa' maeme maspagoluake Aku? Ai leu pa' saute moi masisaggangi Aku?

²⁰ Lulut nenda, arepmake kam aponia sipinaatuKu ka tai Edom, samba apa Kugagalaiake katubut sipulalaggai ka laggai T'eman. Sangamberi tatogatra leu tugirit geti samba sangamberi sirimanua maloloto le.

²¹ Ke'bai bele' Edom, maarep le gaugau simakope pat sangamberi polak ngeungeu; gereira silaggaijinia maarep le teret ka koat Tiberau.

²² Itusakai tuburut kele mayang, tuburut samba ikebbakngake kapponia ka uddut Bazra. Kateteret nenda saladdut Edom muloto kele sinanap sipususule.”

Ukuman ka Damsik

²³ Nene te sikuat Tuhan pagalaiat Damsik. “Sipulalaggai ka laggai Hamat samba Arpat mukaratbaga samba mululubaga kalulut masiaper katuareman sitaimaeru. Paatuatra murukduk samba ipagu'gu' kele lektuk koat.

²⁴ Sipulalaggai ka Damsyik ibailiu masaggo, samba tuitui kalult loto'. Mukatsi samba mangorik le sia kele sinanap sipususule.

²⁵ Laggai siabeu samba sisun angkatbaga nenda kineiget tangeu taanai sikudduijinia.

²⁶ Kateteret nenda tailaingenia matei ka enungan laggainia, samba sangamberi saladdunia tusubuake.

²⁷ Sangamberi irip laggai Damsyik Kulalabo le, samba sangamberi uma purimataat rimata Benhadad Kulabo le sapru. Aku, Tuhan Sebaot, amanibongan.”

Ukuman ka suku Kedar samba laggai Hazor

²⁸ Nene te sikuat Tuhan pagalaiat suku Kedar samba laggai kupkumen Hazor, sialau Nebukadnezar rimata Babel, “Ale Nebukadnezar, saggangi le suku Kedar samba subuake le sangamberi sirimanua ka isit kabelaiat sulu!

²⁹ Raurau le biribiri, unta, samba sangamberi sapoura pasamba sangamberi kabagania, samba pugerei katubutra, ‘Pukarananbaga masigoilik kam!’

³⁰ Ale kam tai Hazor! Aku, Tuhan, masikua: Kenan kam simaola mujaujau, samba mulipput. Si Nebukadnezar rimata Babel aiisiakean masisaggangi kam. Kuanangan,

³¹ ‘Kauan taei! Masisaggangi sangamberi sirimanua simasanang samba simaeru puririmanua nenda. Laggaira sita'sakkerat kalulut taanai matabaliunia samba taanai langrinia.’ ”

³² Kuanangan minca si Tuhan kai Nebukadnezar, “Parauraugi le sangamberi unta samba sangamberi tarimeura! Sangamberi sirimanua siririk alai sitete' nenda Kukau le sia kaipapa'. Kubabarake le paoreat katubutra sibara ka senen kudduat.

³³ Hazor geti malilimai le teret buruburu samba ibailiu le kuddut jo'jot leleu. Berisara leu sirimanua sikukuddu minca sedda. Aku, Tuhan, amanibongan.”

Ukuman ka Elam

³⁴ Ta'amauju pasat aibailiu si Zedekia rimata Jehuda, kuanangan si Tuhan Sebaot katubukku pagalaiat laggai Elam.

³⁵ Kuanangan si Tuhan, “Kumamateiake le sangamberi siagai mupana sikau imaron Elam.

³⁶ Kuulupmake le rusa ka Elam sibara kasenen matat rusa, samba masikau sia kasenen matat rusa bailiu senen laggai taanai taaraguruki tai Elam sipujajaujau nenda.

³⁷ Kugalai le ramaloto tai Elam ka saggak sioba masimateiake sia. Bulat magolu le Aku katubutra samba tusubuake le sia. Kukau le saladdu sisaggangi sia teret sapru.

³⁸ Tai rimata samba sikebbukatra Kusubuake le, samba ka laggaira Kuririoake le Uddenan PurimataatKu.

³⁹ Tapoi kasara tetere, Elam Kutotoiliake le minca. Aku, Tuhan, amanibongan.