Jer. 48 - BUKO SIPUNENAN

Pagalaiat laggai Moab

¹ Nene le sikuat Tuhan Sebaot, Taikamanaun israel pagalaiat Moab, “Paantekam sipulalaggai ka Nobo, aipoi laggai nenda amasubungan! Kiryataim araalauan, samba irip laggai simaron amakataian tenan le silaggaijinia aila lepa;

² umun tubut Moab sapru. Tai saggak aralauan Hesybon samba sedda paaturangan rasapruake sangamberi tai Moab. Sangamberi nganga ka laggai Madmen muaari le kalulut laggai nenda rasasaggangi geti tai saggak.

³ Aperep! Rapugerei silalaggai ka Horonaim, ‘Kaloseat! Kaanau!’

⁴ Moab aianauan! Gereira tatogania maarep teret ka Zoar.

⁵ Arepake kam ngangan sou ka enungan tusakai ka Luhit, samba ngangan geri kaenungantugorosot ka Horonaim.

⁶ Kuarangan, ‘Olaake! Arauake engam! Putuitui kela kaliddei simalia ka simatangeu!’

⁷ Moab! Nukaroake le rontubu samba pukayoatnu. Tapoi kiniget tukalaake le ekeu. Kamos, sabulungannu, pasamba tai imam samba sipugagalainia tuaambi le ka pasiribbaiat.

⁸ Sangamberi laggai tipakakatai le, berisara siooi bela. Su'su samba polak simagaktuk sangamberinia tatata' le. Aku, Tuhan sipaninibo.

⁹ Kaukam bukku sitususurat oni addeat ka Moab, aipoi ta'an mauuju itupakakatai laggai nenda. Sangamberi laggai mararagat le samba berisara sirimanua sipukukuddu sedda.”

¹⁰ Tutelei le' sirimanua sipuarak galaiakenen sibara kai Tuhan. Tutelei le nia sitaioba masipupunuake lanjau samba masimatei.

Sangamberi laggai Moab tupakatai

¹¹ Kuanangan si Tuhan, Siboikinangan Moab makolou le ipurimanua. Ta'pei atuambitnia ka pasiribbaiat. Kele suat anggur sigogoiakenen le nia samba ta'tupauru ka kudduat anggur bagei. Anggur simasingin peile samba mananam.

¹² Tapoi, babara geti teterenia Kukoiniake bule Moab tubaliu kele anggur, samba sangamberi kudduatnia tupiliake samba tuparagat.

¹³ Mubesi patuat geti Moab ka Kamos, sabulunganra, makere kela tai Israel rapubesi paatuat ka Betel karoakenenda nenda.

¹⁴ Kipa iooi ramaeme taimanteu ka Moab masikua, “Kai saladdu, simaron silepa sibo' ka pasaggangan”

¹⁵ Moab samba sangamberi laggainia atupakataian, samba tailainge sipili simakoloumatumateiakean. Amanobongan Aku. Aku rimata, Tuhan Sipulugege.

¹⁶ Paoreat ka Moab melegrengan le ioi, ta'an mauju imabubu'.

¹⁷ Ale kam sangamberi laggai pabebeakenen Moab siagai puaabeunia, pureureugikamnia! Kua, ‘Moab ta'ananai gege, puaabeu samba puroronnia asaprungan!’

¹⁸ Ale sipulalaggai ka Dibon, gorosotnake ekeu ka kudduat puaabeunu; kudduake ekeu ka polak ka kudduat siribbaiat. Kalulut siapakai laggainu Moab amoian, samba ipakakatai te sangamberi kudduatnu siirip.

¹⁹ Kam sikukuddu ka Aroër, puriokam kabebet enungan samba lelekngakekam! Panounouakekam katubutra sipututuitui, samba siooi bela, ‘Apa sipuaaili?’

²⁰ Alegirangannia geti, ‘Moab abelean samba ibailiu tuloli, lulut nenda soibi le nia. Paagaikam kasanganantat Bat ionan Arnon, Moab ambubungan.’ ”

²¹ “Pasiukuman aikauan ka gaktul leleu ka laggai Holon, Jahas, Mefaat,

²² Dibon, Nebo, Bet-Diblatim,

²³ Kiryataim, Bet-Gamul, Bet-Meon,

²⁴ Keriot, samba Bozra. Sangamberi laggai Moab, kareunan samba ka legre, atuukuman.

²⁵ Puroron Moab atutakkiakean, samba pugegegenia atupakataian. Aku, Tuhan, sipaninibo.”

Moab tupaepe'

²⁶ Kuanangan si Tuhan, “Bailiuake le iroro' Moab, kalulut pubuangan patuatnia kai Tuhan. Ipaguguilu le tubunia ka gelaknia, samba ga'gatirangania sirimanua.

²⁷ Ta' pa tai Israel araga'gatingan sia tai Moab samba ratiboi sia kelean le arasese sia pasamba sipananangkou?

²⁸ Kam sipulaggai ka Moab, pulaggai le kam ka laggaimui samba kudduake kam ka leleu bukku kele uma' ngorut igalairumunnia ka ngaliu tainit leleu bukku.

²⁹ Bulat mangkuh le ekeu! Akuarepman kopet buak patuat, kelat paatuatmui.

³⁰ Aku, Tuhan, Kuagai buakpaatuatnu. Tiboietnu sita'paluluat, samba galaitubum sita'katukolobat.

³¹ Lulut nenda musosou le Aku simaron addeat sangamberimui samba sangamberi sirimanua ka Kir-Heres, inan laggaimui.

³² Makope le kusoibi sipulalaggai ka Sibma bele pei sipulalaggai ka Jaezer. Laggai Sibma kele ran anggur ipulalak teret ka silat Koat Simamatei, ipulio teret ka Jaezer. Tapoi kineiget sangamberi bua kateteret simaoloi samba buat anggurnia aipakataian.

³³ Gerei angkatbaga asaprungan ka laggai Moan simagabru. Kugalai le bule ipuari ipuguruk suat anggur ka pasipionan anggur; beringan sara sirimanua sipasigagalai anggur samba sipusosoga angkatbaga.

³⁴ Sirimanua ka Hesybon samba Eleale musou samba sounia maaret teret ka Jehas, samba raarep leu sangamberi sirimanua barania ka Zoar teret ka Horonaim samba Eglat-Selisia. Rapusou kalulut bagat oinan Nimrim leu ibailiu magarak.

³⁵ Kuaariake le tai Moab masilabo buluakenen ka sangamberi kudduat panindogatra samba muari le rapanguruatnake buluakenen katubut taikamanuanra. Aku, Tuhan, amanibongan.

³⁶ Sangamberi pukayoat Kir-Heres samba Moab atataan. Marereu le bagaKu masiitco sia nenda; Aku kelean le sirimanua sipasiuuraiake urai ka sulin.

³⁷ Sangamberitra arasapungan alai ka ute' samba bulut bakla, kaparatdra ai sinajakat, samba pakeirangan komak goni toggaiat reureubaga.

³⁸ Ka sangamberi batbalai lalep samba ka polak simalio sarat maarep le sou. Aipoi Moab Akuparagatnan kele tempaian taiobaket.

³⁹ Moab amagatcaan! Bulat maailangannia Moab! Musou le nia kalulut aitugegeinia samba aibailiuan gagatiet sangamberi bangsa sigoiliknia. Aku, Tuhan, amanibongan.”

Ta'anai engan ka belaiat karubeiat Moab

⁴⁰ Kuangan si Tuhan, “Kela manyang ipasilalau pasamba kappo sipukekebbak, kise te iooi geti sara bangsa samba masilalau Moab.

⁴¹ Sangamberi laggai samba iripnia tuaaleu geti samba saladdunia muloloto le kele sinanalep sepususule.

⁴² Moab geti mamakakai le samba taan ibabailiu sara bangsa, kalulut ibuakngake patuatnia katubukKu.

⁴³ Tupatabra le sia pasamba katugegekat, lobok samba sesere.

⁴⁴ Sirimanua situituiake tubuna ka tugegekat bebele le ia kabagat lobok, samba sibebela ka lobok nenda geti isesere le nia. Sangamberinia nenda muaaili kateteret siteuakenenKu addeat masipakatai Moab.

⁴⁵ Situtuitui sitaioi tubu mei masigaba sakkerat ka Hesybon, tapoi laggai nenda aimalalabo samba purimataan Rimata Sihon leu ai lalabo obengan. Obengan ailaboan puteterat samba paleleuleu Moab, laggaira sioba pasaggak.

⁴⁶ Paante kekeu Moab! Sikudduijinia sipaninindogi sabulungan Kamos ai subuakean, samba sangamberi tatogatra tuambit sibailiu kabeket.

⁴⁷ Tapoi kasara tetere, Kutotoiliake le minca pagalaiat laggai Moab. Aku, Tuhan, amanibongan!” Nenda te igagalai si Tuhan katai Moab.