Jer. 47 - BUKO SIPUNENAN

Patonekat Tuhan pagalaiat laggai Filistin

¹ Iageti kepei ikalaake si Parao laggai Gaza, oi tiboiet Tuhan kai Jeremia pagalaiatda tai Filistin.

² Kise le ngangan Tuhan: Itco, ipuguruk oinan sibara ka bare' ibailiu bagat oinan sipasiebaiji, iebaiji laggai samba bagania, laggai samba silaggaijinia. Mugegerei te' sirimanua samba mugegeri te' sangamberi silaggaiji laggai.

³ Masiarep le' ipunau bakkou kuronia, masiarep iputangan keretania, ipoguilu bannia. Saukkui ta'an rapipitsa katatogania, aipoi kabeira amasaggongan,

⁴ kalulut ai ailingan gogoinia masipamatei sangamberi tai Filistin, samba masitataake ka Tirus samba ka Sidon senen siparorop sipulelei. Bulatnia, ipamamatei le si Tuhan tai Filistin, iate sirimanua sipulelegei sibara ka nusa Kaftor.

⁵ Oraknangan tai Gaza pureureugat baga sabeu, sipulaggai ka Askelon ibailiu muatangeu; pigamoian le kam tai Filistin nuariakekam mureureu baga?

⁶ Pugereinungan, Teret pigamoi nupasaggak, ale lanjau Tuhan? Guruake ekeu ka sakbuknu, kudduake ekeu sedda samba puaringan.

⁷ Tapoi kipa ioi ipuari? Ta' pa' si Tuhan le masipaparentaakenia? Ka Askelon samba ka bebet buggei sedda te Ikoiniakenia!”