Jer. 46 - BUKO SIPUNENAN

TIPPU 46–51 SIBALAT PAGALAIAT TAI BANGA BAGEI Tiboiet Tuhan pagalaiat siberikabaga

¹ Kuanangan si Tuhan kai Jeremia pagalaiat siberikabaga,

² barania ka Misir. Paagainanganktubuku pagalaiat Nekho rimata Misir, sikalaakenen Nebukadnezar rimata Babel ka Karkemis kababat bagat oinan Efrat karura sikaepat puparentaat Joyakim, rimata Jehuda. Nene te sikuat Tuhan pagalaiat nenda.

³ Patarek le korabbi sabeu samba sigoiso samba kenan pasaggak!

⁴ Patarek apot kuro, samba sakai kateiteinia, ale sienunginia Ala le kudduatnu samba pakei tutu' baja, Palauru simunebakkatnia, pakei leppei laba'!

⁵ Angoi kuitco ratugege', soksok ka teitei? Saladdutra tukalaake, tuitui sia sialei loto'. Beri pitsara teiteira Oloinia pasaggangan ka senen kudduat, nngangan Tuhan.

⁶ Sirimanua simaatja tubu ta' moi raputuitui, saladdu ta' mio rabelaake tubutra; ka bare, ka bebet bat oinan Efrat le' ratusoksok samba rabele'.

⁷ Kaseinia situsasakai kele bagat oinan Nil kele bagat oinan siebaiji tikrania?

⁸ Nenda te laggai Misir. Kuanangan, “Tusuru le aku samba masiikepmake polak. Masusubu geti sangamberi laggai samba sipulagaijinia.

⁹ Kenan le, ale sangamberi kuro! Gaja'an tubum, ale sangamberi kereta! Kenan pasaggak, ale sangamberi saladdu ambit le korabbi sibara ka Sudan samba Libia samba kam, ale siagai mupana sibata ka Lidia.

¹⁰ Tapoi Aku, Jeremia masikua, nene te gogoi Tuhan sipulubeunan samba sipulugege kaggoi nenda galainangan pasiliat ka sanga beri saggakNia. Pat ektek aipakomi sia lanjauNia samba pat sege ailo logaura. Gogoi nene Tuhan Sipulubeunan, masija'ja sangamberi buluakenenNia ka bare', ka bebet bagat oinan Efrat nenda.

¹¹ Ale sipulaggai ka Misir, kenan kam ka Gilead masiala laggek! Tapoi kenanen kisedda siboboi le nupakei nenda laggek katualeat tanuse'sese.

¹² Sangamberi bangsa araarepman katulololoinu, ka polak amasutnan gereinu, saladdu sara ka salddua bagei pasoksok, makere rabele ka polak.

Kaooi Nebukadnezar

¹³ Kateteret ai oi si Nebukadnezar masisaggangi Misir, panibonangan Tuhan katubukku, kuanangan,

¹⁴ “Jeremia, paagai le ka Misir, iate ka Migdol, Memfis, samba ka Tahpanhes,” Patarek le tubum masiomake, aipoi sangamberi kakkatnu tupakatai geti kabagat pasaggangan!

¹⁵ Angoi Apis, bulungannu simaron nenda mutuituti? Kalaut aikalaakeannia si Tuhan!

¹⁶ Maigi saladdum situsosoksok samba sibebele. Kuarangan ka pasasambatra, “Kauan tatoili kalaggaita, laggai pututukatnatatta, bule tabela kalanjaura tai saggak.”

¹⁷ Kau kam oni sibau ka rimata Misir. “Simalamau sitaipuletsei tetere.”

¹⁸ Aku Taikamanua sipuririmanua, Aku rimata, Tuhan Sebaot. Ioi geti kele leleu Tabor sipaaili ka sangamberi leleu bagei, kele leleu Karmel siaili ka koat.

¹⁹ Patarek tubum, sipulaggai ka Misir, tutangsiake samba tuambit ka pasiribbaiat! Memfis ibailiu le geti siragatat – kudduat simatangeu kalulut ta'anai sikudduijinia.

²⁰ Misir kele togat jaui simamomo', tapoi igeugeu le nia silimong sibara ka bare'

²¹ Beringan saladdu siupa' sikuddu katubunia iate kele tatogat jaui simakope mo'mo'. Ta'matotom sia. Sangamberitda toili samba mutuitui bule ramaarau. Gogoi pasiukuman ka sia amoian; teteranangan iorak sia pasisiboat.

²² Tuituiakenangannia Misir sialei mendesis kele ulou kalulut saladdu saggak memeimalelegre. Saggangirangannia pasamba kampa kele masitugulu loina

²³ samba patatdeijirangan loina simaigi siataioi tuguruki. Saladdu saggak tamoituadde iginia, migi le sia belepeile siboiki. Aku, Tuhan masikua.

²⁴ Sipulalaggai ka Misir geti tupakaila le sia, kalulut rakalaake sia siberikabaga sibara ka bare. Aku, Tuhan, amanibongan.”

²⁵ Kuanangan Tuhan Sebaot, Taikamanuan Israel, “Bulatnia te, Kubabara le ukum ka bulungan Amon siabara ka Tebe, kai Parao samba Misir, sangamberi sabulungania samba tai rimatania, iate si Parao pasamba sangamberi sirimanua sikatoneminia.

²⁶ Kukakau le geti sia kai Nebukadnezar rimata Babel pasamba saladdunia sioba masimateiake sia. Tapoi kapakatnia, laggai nenda tukukudduiji le geti kele siburu, kise te ngangan Tuhan.”

Ipaarau geti si Tuhan paamianNia

²⁷ “PaamianKu, Israel, bui numaloto kam! PaguguletKu Jakob, bui mageret tubum! Ekeu samba muntogatnu geti Kupaarau barania ka laggai kasareunan, ka kudduat aturibbaiake sia. Totoili le geti ekeu samba mukuddu ka laggainu simariuriu murinanua Muririmanua le geti ekeu ka erut puririmanua; ta'anai kalotoakenennu

²⁸ Bui numaloto, ale paamianKu, Momoi geti Aku masipaarau ekeu. Siberikabaga, ka kudduat Akupasabu ekeu, sangamberinia geti Kususubuake le, tapoi ekeu ta'Kukusasapruake. Kirenangan ta'bebela ekeu ka ukum tapoi ukumKu iate simaroipo siripokat siteuakenen katubum. Aku, Tuhan, amanibongan.”