Jer. 44 - BUKO SIPUNENAN

Sibalat pasilepa sibara kai Jeremia ka Misir

¹ Ia geti kuananga si Tuhan ka tubukku pagalaiat sangamberi tai Israel sikukuddu ka Misir, ka laggai Migdol, Tahpanhenes, Memfir, samba Patros:

² Kise le' ngangan Tuhan Sebaot, Taikamanuan Israel: Anuorikngan kam sangamberi paoreat sibaraakenenKu ka Jerusalem samba ka sangamberi laggai Jehuda; bulatnia, sangamberinia nenda aibailiuan siragatat samba beri sara sia sikukuddu sedda.

³ Aipuaili nenda kalulut jotra silaggaijinia, pat bara goluKu. Rapangurutnake le buluakenen samba manindou le sia ka sabulungan taiaagaietra, kam ele taikebbukatmui.

⁴ Mariuriu le Kuake ka kam sapaguguletKu, tai nabi sipasikekera sia masigalaiake pukakatai simalagabagaKu nenda.

⁵ Tapoi ta'raoba masiarepi samba masilelekngake bule rakaddiuake pukakataira iate masilabo buluakenen minca ka taikamanua bagei.

⁶ Ia te lulunia Aku belaake oloi goluKu samba goluKu ka laggai Jehuda samba ka enungan ka Jerusalem. Sangamberinia Kulabo pat bailiu siragatat samba simagarak kele simakokoinong kineneiget.

⁷ Oto kineiget, kise le ngangan Tuhan, Taikamanua Sebaot, Taikamanuan Israel: Angoi anubaraake kam pangoringan sabeu katubumui? Nuobakam sasisubuake tai manteu, tai nanalep, tatoga samba sibau mutu'tu mata sibara ka Jehuda, berisara sirimanua sipulelegei?

⁸ Angoi nuobakam masibaraake besit paatuatKu, kasigalai kabeimui, iate masilabo buluakenen ka taikamanua begei ka laggai Misir sigurukimui sibailiu kam siooiake sedda? Angoi nuoba ibailiu kam teleiet ka talagat siberikabaga ka polak?

⁹ Anukalipogingan pa' kam pukakataira taikebbukatmui, tai rimata Jehuda, sikebbukat laggai, pukakataimui samba sinanalepmui sigalaira ka laggai Jehuda samba kasangamberi enungan ka Jerusalem?.

¹⁰ Paatuatra Ta'amabubu' teret kineneiget, ta' maloto sia samba ta'aratut surukatKu samba ukumKu siakeKu katubumui samba ka taikebbukatmui.

¹¹ Kalulut nenda kise le ngangan Tuhan Sebaot, Taikamanuan Israel: Bulatnia te', Kupatotoila le mataKu katubumui addeat masibesikikam, iate Kupasasapru le sangamberi tai Jehuda.

¹² Oto ke' tai Jahudi sipulelegei raoba mei ka Misir mukuddu sedda, mamatei le sia sangamberitra. Sangamberi sabeu samba tai goiso mamatei le sia ka Misir kabagat pasaggangan ele kalulut pulajeat. Maloto le sirimanua masiitco sia samba rapaloloi le sia. Oninra rabailiake pateleiat.

¹³ Kele Kuukum Jerusalem, kasedda leu et Kuukum sia sikukuddu ka Misir. Mamatei le sia kapasaggangan, kalulut pulajeat samba oringen besi.

¹⁴ Tai Jahudi sipulelegei, sieei mukuddu ka Misir, beri te' sarasia sibebela samba sipuririmanua. Beri leu sia sara sitotoili ka Jehuda, kenanen bulat rabesiaake. Bulatnia, ta'anai sitotoili, tapoi piga pa' sipujajaujau le.”

¹⁵ Ia geti oi sirimanua simigi katubuku, iete sangamberi taimanteu sipasiaagai, sinanalepnia aipanguruatnakean buluakenen ka sabulungan, samba sangamberi tainanalep sipuririo sedda, guru' tai Israel sikukuddu ka Patros, kaisit kaiaman Misir. Kuarangan katubuku,

¹⁶ “Ta'kuoba kai masiarepi apa sikuam katubumai kaonin Tuhan.

¹⁷ Sangamberi sipalelekmai, kugagalai leu et kai.

¹⁸ Tapoi baranangan akuariakekai masipanguruatnake buluakenen ka sabulungan sinanalep ka manua, samba taan akuuruakekai minca anggur sibailiu panguruat katubunia, beringan sibabara katubumai; matei kai kabagat pasaggangan ele kalulut pulajeat.”

¹⁹ Lepa geti kuarangan tainanalep nenda, “Raoba le taimanteumai kugalaikai roti kele tubut sabulunagan sinanalep ka manua samba masilabo buluakenen samba masipanguruatnake anggur ka sabulunganmai nenda.

²⁰ Kasangamberi taimanteu samba tainanalep sipasialegi kasedda, kuakungannia,

²¹ Ai pa' nususuksukkam taiaagaina si Tuhan ele kakalipogina sangamberi buluakenen sipanguruatnakenen ka laggai Jehuda samba ka enungan ka Jerusalem segalaiakenan ra, taikebbukatmui, tai rimata samba sipugagalai ka purimataat, saipulalaggai ka laggai nene samba kam leu det?

²² Ta'an aiopmake si Tuhan masiitco puparaboananmui sikatai samba kasitsinakenen sigalaiakenenmui; kalulut nenda laggaimui leu ibailiu le karagatat, kalotoakenen samba telei ta'anai sikudduijinia, kele simatotoila kineneiget.

²³ Anulaboaan kam buluakenen samba amajongan kam kai Tuhan. Ta'nuoba kam masiarepi ngangan Tuhan samba masitut surukatNia, SiteuakenenNia samba Enungan sigalaiNia, nenda te' lulunia iorak kam paoreat, kele simakokoinong kineneiget.”

²⁴ Lepa geti kuanangan si Jeremia katubut sangamberi sibari kabaga samba kasangamberi tainanalep nenda: “Arepmake kam tiboiet Tuhan, ale sangamberi tai Jehuda sikukuddu ka laggai Misir.

²⁵ Kise le tiboiet Tuhan Sebaot, Taikamanuan Israel: Kam, taimanteu samba tainanalepmui! Anusunnakean kam apa sitiboakenenmui, iate: Kurereddet la kai simakolou palelengan sitiboakenenmai masilabo buluakenen samba masipanguruatnake buluakenen siuruakenen ka sabulungan sinanalep ka manua. Meruan! Galaiake le' kam apa sialelekmui nenda!

²⁶ Iageti arepmake kam sikuaKu, ale kam sangamberi tai Jehuda sikukuddu ka laggai Misir. Aku, Tuhan, mupalelengan ka oningKu sabeu, ta'an Kuoobaake nukuakam oningKu addeat masigalai sara palelengan. Tamomoi nukuakam, musuppa aku ka onin Taikamanua sipuririmanua!

²⁷ Kubebesiake le' bule nupangorik kam samba ta' masipuangkaki baga kam, teret numatei kam sangamberimui, kapasaggangan ele kalulut pulajeat.

²⁸ Sarat piga le' pa sia simaarau samba toili sia ka Jehuda baratra ka Misir. Iageti sangamberi tai Jehuda sikukuddu ka Misir masiitco geti, kasei tiboiet makokoinong, tiboietra ele tiboietKu.

²⁹ Kubabaraake le pangoringan katubumui ka kudduat nene masipakoinong kakam, ukuman si isiakenenKu kakam, bulatnia muaaili.

³⁰ Si Hofra rimata Misir Kukakau le nia katai saggak sioba masimateiakenia, makere kele Aku kau si Zedekia rimata Jehuda kai Nebukadnezar rimata Babel, saggaknia sioba masimateiakenia nenda.