Jer. 43 - BUKO SIPUNENAN

Si Jeremia tubesiake mujaujau ka Misir

¹ Keteteret ailepa aikua si Jeremia katubut sangamberi taikauma pagalaiat sangamberi tiboiet Tuhan, Taikamanuanda, sikoiniakenen Tuhan, Taikamanuanda segeakenennia katubutda, iate sangamberi tiboiet sinegeakenen nenda,

² Ia geti panibonangan si Azarya togat Hasaya samba Jonatan togat Kareh pasamba sangamberi sirimanua bagei simabuak paatuat katubut Jeremia: “Boko le' sikuam! Tuhan Taikamanuanta, ta' ai koiniake ekeu masikua: Ba'ei ka Misir mukuddu sibailiu sirimanua sioiake sedda,

³ tapoi si Barukh togat Neria nenda le amasitubbui ekeu katubumai, bule ioi nukau kai ka kabeira tasisagai Kasdim, bule ramateiake kai samba raambit ka kudduat pasiribbaiat ka Babel.”

⁴ Kise te si Johanan togat Kareah samba sangamberi saladdunia pasamba siberikabaga ta'araoba masiarepi ngangan Tuhan addeat rakuddu ka Jehuda.

⁵ Iageti si Johanan togat Kareah samba sangamberi sautet saladdu nenda masiruruake sangamberi tai Jehuda sipulelei, iate sangamberi sirimanua sitotoili katalagat sangamberi bangsa, kaipa' kudduat arapusabu, bule rakuddu simariuriu ka Jehuda,

⁶ Taimanteu, tainanalep, tatoga samba totogat rimata sinanalep samba senen sirimanua siobaakenen Nebuzaradan, utet saladdu sipujajago, katubut Gedalya togat Ahikam togat Safan; kasedda leuet nabi Jeremia samba si Barukh togat Neria.

⁷ Lepa ei sia ka laggai Misir, aipoi ta'raoba masiarepi ngangan Tuhan. Iageti sege sia ka Tahpanhes.

Musibalat si Jeremia, Misir ikalaake le geti si Nebukadnezar

⁸ Lepa geti oi tiboiet Tuhan katubut Jeremia ka Tahpanhes, ngangania:

⁹ “Ala le' kakabeinu sangamberi bukku sabeu, samba lipputnake nenda ka polak ottot kabebet matatbaliu gugurukat kudduat purimataat Parao ka Tahpanhes kamatatda tai Jehuda nenda,

¹⁰ lepa kuanungan katubutda: Kasene le' ngangan Tuhan Sebaot, Taimanuan Israel: Bulatnia te, Kukoiniake le sirimanua masiala si Nebukadnezar, rimata Babel, paguguletKu nenda, bule irioake uddenan purimataatnia ka uddut sangamberi bukku, sikoiniakenenKu tulipputnake nenda, samba masinganangake lape' puaabeunia ka uddutnia.

¹¹ Samba ke' bai moinia, kalaakenangan geti Misir: Siei kakamaiat, kakamaiat le! Siei kaluluplupman, kaluluplupman le! Siei kalanjau, kalanjau le!

¹² Iobekngake le' geti obengan ka sangamberi kuil taikamanuan Misir samba tulabo le' geti ele tuambit le sibailiu luplupmakenen. Samba ipalina le' geti laggai Misir kasangamberi goset kele sara sipasijajago ipalina bibiletnia kasangamberi goset, lepa geti einia barania sedda taanai sigeugeunia.

¹³ Iparagat le' bukku sabulungan Bet-Syemes ka Misir samba pakatainangan geti kudduat taikamanuanda tai Misir nenda pasamba obengan.”