Jer. 42 - BUKO SIPUNENAN

Si Jeremia masiparepdep bule bui rapujaujau ka Misir

¹ Lepa nenda oi sangamberi sautet saladdu, katalagatra ai si Johanan togat Kareah samba si Azarya togat Hosaya, pasamba sangamberi taikauma, barania kataigoiso pat aili ka sabau,

² samba kuarangan katubut Jeremia: “Eddangannia isege panindougatmai katubum! Panindougi kai katubut Tuhan, Taikamanuam, addeat sangamberi sipulelegei nene; aipoi siburu maigi kai, kineiget legeian le goiso, kele siitcot matam.

³ Bule ipaagai si Tuhan Taikamanuam katubumai enungan enungienmai samba aponia kugagalaiake kai.”

⁴ Aleginangan sia si Jeremia: “Panindogatmui akuarepman! Itco, manindou le' geti aku kai Tuhan, Taikamanuamui, kele sinindoumui nenda, samba sangamberi tiboiet siaket Tuhan sibailiu alegiet, kupaagai le' katubumui; beri sangatako tiboiet ta'kupakele katubumui!”

⁵ Kuarangan kai Jeremia: “Eddangania si Tuhan ibailiu sipamoiliat simaroipo samba sioi kukatonemi kai, ke' takugalaiakekai siripokat sangamberi tiboiet sikoiniakenen Tuhan, Taikamanuamui, sinegeakenennu katubumai.

⁶ Simaeru samba sikatai, kuaarep le kai ngangan Tuhan, Taikamanuanta, katubuNia akukoiniake kai ekeu, bule imaeru puririmanuamai, kelulut akuarepikai ngangan Tuhan, Taikamanuanta.”

⁷ Pasat pulungagogoi, oi tiboiet Tuhan katubut Jeremia.

⁸ Iageti pusoganangan si Jeremia kai Johanan togat Kareah samba sangamberi sautet saladdunia pasambania, samba sangamberi taikauma, barania ka sigoiso pat aili ka sabeu.

⁹ Kuakungan katubutra: “Kasene le ngangan Tuhan, Taikamanuan Israel katubuNia anukoiniake kam aku addeat masisegeake panindougatmui kamataNia:

¹⁰ Ke' mukuddu kam simariuriu ka laggai nene, iageti Kupaeeru le' samba ta' Kupabubukkat kam, Kugalai le' geti kam mutu'tu samba ta' tububuraukam; aipoi aioleian bagakKu akubaraake pugejaatbaga katubumui.

¹¹ Ba'maloto ka rimata Babel kalotoakenenmui nenda. Ba'maloloto katubunia, kise te' ngangan Tuhan, aipoi Kupaalei le' kam addeat masipaaraukam samba addeat masibelaake kam ka kabeinia.

¹² Kugagalai le' geti kam ibara kiliu baga, bailiu kiliu bagania katubumui samba obaakenangan kam nukuddu ka polakmui.

¹³ Tapoi ke' ta' nuoba kam masiarepi ngagan Tuhan, Taikamanuamui, pasamba masikua: Ta' kuoba kai mukuddu ka laggai nene!,

¹⁴ aipoi pinaatumui: Taa! Kuoba le' kai mei ka laggai Misir kaipa ta' akuenungi kai pasaggangan, ta' kuaarep geti kai nau pipiau samba ta'an kuoorik kai pulalaje; sedda le' kukukuddukai!

¹⁵ Iageti kineneiget arepmake le' tiboiet Taikamanua, ale tai Jehuda sipulelegei: Kasene le' tiboiet Tuhan Sebaot, Taikamanuan Israel: Ke' bulatnia ai puoobamui mei ka Misir samba kerenangan memei kam samba mukuddu sibailiu sirimanua sitoi sedda,

¹⁶ iageti lanjau kalotoakenenmui nenda iorak le' geti kam ka laggai Misir, samba pulajeat sikaranibagamui ta' muaari ikukru kam ka Misir, teret numatei kam sedda.

¹⁷ Sangamberi sirimanua sioba mei ka Misir mukuddu sibailiu sitoi sedda, mamatei le sia kalulut lanjau, pulalaje samba besi sipamamatei; taanai berisara sirimanua situooba ele sibebela ka pugejaat baga sibaraakenenKu katubutda.

¹⁸ Bulatnia, kasene le' tiboiet Tuhan Sebaot, Taikamanuan Israel: Kele itubura goluKu samba imaoloi patuatKu ka sipukukuddu ka Jerusalen kise te' geti itubura oloi paatuatKu ka tubumui, ke'bai mei kam ka Misir. Ibabailu le' geti kam teleiet, bulat kalotoakenen, pateleiet samba lolit; ta'an nuitco kam minca kudduat nene.

¹⁹ Aikuangan katubumui si Tuhan, ale tai Jehuda sipulelegei: Ba'ei kam ka Misir! Bulatnia lelekngake kam simakolou, kuparepdep le' kam ka gogoi nene!

²⁰ Anupatajungan kam tubumui samba masibaraake kamateiatmui, kateteret nukoiniake kam aku kai Tuhan Taikamanuamui, samba masikua: Panindou le' addeat kakai katubut Tuhan Taikamanuanta, samba paagai le kakai simakolou aponia sitiboakenen Tuhan, Taikamanuanta, bule kugalaiakekainia.

²¹ Tapoi, kenenen bai kusegeake katubumui ka gogoi nene, ta'nuaarepikam ngangan Tuhan Taikamanuamui, iate ta'anuobakam masireddet sangamberi sikoniakenenNia kusegeake katubumui.

²² Kalulut nenda, bulatnia lelekngake kam simakolou, mamatei le' geti kam kalulut lanjau, pulajeat samba besi sipamamatei ka kudduat simagamui addeat mukuddu sibailiu sirimanua siooiake sedda.”