Jer. 41 - BUKO SIPUNENAN

¹ Ka laggo sikapitu oi si Ismael togat Netanya togat Elisama – nia muntogat rimata samba utet saladdu sabeu – pasamba pulu sirimanua kai Gedalya togat Ahikam ka Mizpa. Ai sia mukokom roti simakere ka Mizpa,

² iageti tusurunangan si Ismael togat Netanya pasamba pulu sirimanua pasasambania, lepa boborangan imatei si Gedalya togat Ahikam togaat Safat pasamba lanjau; kise te aimateiakenia si Ismael sirioakenen rimata Banel ka laggai nenda.

³ Samba leu sangamberi tai Jahudi pasamba si Gedalya ka Mizpa, samba sangamberi tai Kasdim, iate saladdut, sibabara sedda imateiake si Ismael.

⁴ Kale aimapato lepat aimateiake si Gedalya – kateteret nenda ta'peianai siagainia –

⁵ oi sirimanua sibara ka Sikhem, sibara ka Silo samba sibara ka Samaria, igitda ai sia balu puluh, bulut baklatra sikirit, bibiletra simabibirit samba tubutda sarat sikirinan; ambitrangan panguruat sitattatnakenen samba kemeinyan addeat tupangurutnake ka Uman Tuhan.

⁶ Lepa bela si Ismael togat Nentanya barania ka Mizpa masiailiake sia sialei musosou. Kateteret arapaaili, kuanangan katubutda: “Kenan le' kai Gedalya togat Ahikam!”

⁷ Tapoi kateteret arasege katengan laggai nenda, iageti jajanangan sia si Ismael togat Netanya samba airaroropmakenia sirimanua sipaaleinia; tubut simamateira ribbaiakerangannia ka pao.

⁸ Tapoi katalagatra ai sia pulu sirimanua sipasikukua kai Ismael: “Ba'mamateiake kai, aipoi aipeile silipputnakenenmai panarengan ka ujat laggai iate gandum, jelai, tulat samba suat mani!” Iageti obaakenangan sia, ta'aimateiakenia pasamba saaleira.

⁹ Uggungan, kaipa airibbaiake sangamberi tubut sangamberi sirimanua simamatei siruruakenennia si Ismael nenda iate uggungan sabeu sigalai rimata Asa kateteret aisaggangi si Baesa rimata Israel; iate aisunnake si Ismael togat Netanya pasamba tubut sirimanua simamatei simateiakenen nenda.

¹⁰ Lepa ambitnangan si Ismael sangamberi taikauma sipulelegei sibailiu luplupmakenen ka Mizpa nenda, tatogat rimata tainanalep samba sangamberi sirimanua sipulelegi ka Mizpa sikau Nebuzaradan, utet saladdu sipujajago nenda, ka pasikaelat Gedalya togat Ahikam. Ambitnangan sia si Ismael togat Netanya sibailiu luplupmake, lepa einia mutalipo' ka kupkumen muntogat Amon.

¹¹ Tapoi kele aiagainia si Johanan togat Kareah samba sangamberi utera saladdu pasambania, pagalaiat pukakainia sigalaiakenen Ismael togat Netanya.

¹² Iageti ruruakerangan sangamberi saladdura, lepa ei sia masisaggangi si Ismael togat Netanya. Seserangania ka pao ka Gibeon.

¹³ Kateteret sangamberi taikauma pasamba si Ismael masiitco si Johanan togat Kareah samba sautet saladdu sipaaleinia, iageti maangkanangan bagatda.

¹⁴ Sangamberi sirimanua siambit Ismael sibailiu luplupmakenen ka Mizpa nenda soksokrangannia samba ei sia masitut si Johanan togat Kareah.

¹⁵ Tapoi si Ismael togat Netanya pasamba balu saladdunia bela ka kabei Johanan samba tuitui sia ka kupkumen laggai muntogat Amon.

¹⁶ Lepa geti ruruakenangan si Johanan togat Kareah samba sangamberi sautet saladdunia pasambania masiruruake sangamberi taikauama sipulelegei siambit sibailiu luplupmakenen Ismael togat Netanya ka Mizpa, lepat aimateake si Gedalya togat Ahikam: iate taimanteu, sangamberi saladdu, tainanalep, tatoga samba sipasijajago uma purimataat tuambit minca ka Gibeon.

¹⁷ Lepa geti riuriuakerangan rapuenung samba aria sia ka pugogoiat bakkat Kimham ka legret Betlehen, kapinatutra riuriuakerangan muenung masiailiake Misir,

¹⁸ addeat masiareuake tubu ka tai Kasdim, kalotoakenenra, kalulut si Ismael togat Natanya aimateiakean si Gedalya togat Ahikam siriokenen rimata Babel ka laggai nenda.