Jer. 40 - BUKO SIPUNENAN

Jeremia mukuddu kai Gedalya

¹ Tiboiet siooi sibara kai Tuhan katubut Jeremia, lepat aibelaakenia barania ka Rama si Nebuzaradan, sautet saladdu sipujajago, sipasikokoiniake tualania aitukakabe' kabeinia katalagat sangamberi sirimanua situriribbai sibara ka Jerusalem samba Jehuda sibailiu abbinen ka kudduat katuribbaiat ka Babel.

² Sautet saladdu sipujajago nenda aialaan si Jeremia samba kuanangan katubunia: “Tuhan, Taikamanuam, aiakean palotokat pugejaat baga ka kudduat nene,

³ samba aigalaiakean. Aigalaiakeaan si Tuhan aponia palotokatNia nenda, kalulut amajongan kam katubut Tuhan samba ta'anuarepikam ngangaNia, bailiu puailinangan pagalaiat nene katubumui.

⁴ Ia geti kineneiget, itco le' kubelaake ekeu gogoi nene ka kakabe' ka kabeinu nenda. Ke'bai nuobamasitutu aku mei ka Babel, konan! Kupasisikeli le' ekeu. Tapoi ke'bai ta'nuoba, mei masitut aku ka Babel, ba'ei! Itco, sangalio laggai tubuka le' kekeu: momoi le' nuei, kaipa pa' nuitco simaeru samba simakolou.

⁵ Momoi le' nutoili kai Gedalya togat Ahikam togat Safan, sirioakenen rimata Babel ibailiunia ute sabeu kasangamberi laggai Jehuda, samba mukuddu pasambania ka talagat taikauma, ele kaipa nuitco simaeru, ei ekeu sedda!” Iageti siuteake saladdu sipujajago nenda kaunangan katubunia balut samba panguruat, lepa geti obaakenangannia iei.

⁶ Iageti ei si Jeremia kai Gedalya togat Ahikam ka Mizpat samba mukuddu pasambania ka talagat taikauma sipulelegei sikukuddu ka laggai nenda.

Kateteret Gedalya ibailiu gubernur samba aitumateiakenia

⁷ Kateteret sanagmberi utet saladdu, sikukuddu peile ka laggai bagei pasamba sangamberi sirimanuania, masiarep, rimata Babel arioakean si Gedalya togat Ahikam togat Safan ka laggai nenda samba katubunia atukauan sipasikeli taimanteu, tainanalep samba tatoga, iate sibara ka sirimanua sitaioitubu ka laggai nenda, sitaituaambit ka kudduat katuribbaiat ka Babel,

⁸ Iageti ei sia katubut Gedalya ka Mizpat; sia nenda iate Ismael togat Netanya, Johanan togat Kareah, Seraya togat Tanhumet, tatogat Efai tai Netofa nenda, samba Jezanya, togat sara sirimanua sibara ka Maakha pasamba sapakoiniennia.

⁹ Lepa pusuppanangan si Gedalya togat Ahikam togat Safan katubutda pasamba sapakoinienda: “Ba'maloto kam makala ka tai Kasdim nenda; kuddu le' kam ka laggai nene, samba mureddet ka rimata Babel, iageti maerunangan puririmanuamui.

¹⁰ Samba aku saraku, mukuddu le aku ka Mizpa sibailiu punutubu ka matat sangamberi tai Kasdim siooi geti katubutta; tapoi kam senen, ruruake le' buat anggur, sangamberi buat kaju samba tula, lepa geti koiri le' sibailiu panarengan, samba kuddu le' ka sangamberi laggai kaipa nuobakam mukuddu.”

¹¹ Samba kateteret sangamberi tai Jehuda sikukuddu ka Moab ka talagat muntogat Amon ka Edom samba kalaggai-laggai bagei, mesiarep, rimata Babel aiobaakean taikauma sipulelegei rakuddu ka Jehuda samba masiirioake si Gedalya togat Ahikam togat Safat sibailiu siuteake sia.

¹² Iageti toili le' sangamberi Jehuda baratda ka senen kudduat kaipa atupasaragai sia, samba guru' sia ka Jehuda kai Gedalya ka Mizpa; ruruakerangan buat anggur samba sangamberi buat kaju simakope igi.

¹³ Kasara tetere si Johanan, togat Kareah samba sangamberi sautet saladdu sikukuddu pei le' ka laggai bagei moi kai Gedalya ka Mizpa

¹⁴ samba kuarangan katubunia: “Nuagai leu, si Baalis rimata muntogat Amon, aikoiniakean si Ismael togat Netanya masimateiake ekeu?” Tapoi si Gedalya togat Ahikam ta'matonem bagania katubutda.

¹⁵ Lepa geti simengmeng kuanangan si Johanan togat Kareah kai Gedalya ka Mizpa: “Maeruan kuei masimateiake si Ismael togat Netanya nenda ta'anai berisara sirimanua siagainia. Angoi iobaake imateiake ekeu, bailiunangan sangamberi tai Jehuda siparuru' kabe'be'mui musabu minca samba Jehuda sipulelegei nenda masubu?”

¹⁶ Tapoi si Gedalya togat Ahikam masialegi si Johanan togat Kareah: Ba'gagalaiake nenda! Aipoi sikuam pagalaiat si Ismael nenda iate boko' le.”