Jer. 4 - BUKO SIPUNENAN

¹ “Ke' nuoba taoili, ale Israel, kise te ngangan Tuhan, toiliake' le' ekeu katubukKu; samba ke' nuoba nuareuake sabulungannu ka sitsitnakenen, ta'an leu mututitui ekeu kamataKu!

² Samna ke'bai musuppakam ka bagat topit, kabagat puroipoat samba kabagat pubulanan: Kise Tuhan sipuririrmanu!, iageti sangamberi bangsa pasukat le' geti sia katubuNia samba masiumun tubu katubuNia.”

³ Aipoi kise le' tiboiet Tuhan ka tai Jehuda samba ka sipulaggai Jerusalem: “Galai polaknu sibau, samba bui nupangarap kakudduat pututukat rui.

⁴ Sunat tubum addeat kai Tuhan samba areuake le' kulit keikeiet paatuatnu, ale tai Jehuda samba sipulaggai ka Jerusalem, bule bui ipugege goluKu kele obengan, samba ipujulu taanai simateiakenia, kelulut galai tubumui sikatai!”

Jehuda masisilo palotokat sibara ka bare'

⁵ Paagai le' ka Jehuda samba paagai le' ka Jerusalem: Ulup le' pipiau ka bagat laggai, pugerei le simakope ron: Paruru kam samba konan taei kam ka sangamberi laggai sibara irip!”

⁶ Akkatnake toggaiat ka ipo Sion! Olaake mujaujau, bui nupumengmeng kam! Aipoi Kubarake le' paoret sibara ka bare' samba kakakatai sabeu.

⁷ Atusurungan singa sibara ka bakkat se'se', sipakatai sangamberi bangsa amutuituian, abelangan sia ka kudduatda addeat masibailiuake imagarak laggaimui; sangamberi laggaimui tubailiuake le' geti siragatat, taanai sikudduijinia.

⁸ Lulut nenda, bolitnake le' komak goni, pusou samba pugeri le'; Kalulut golut Tuhan sipujujulu ta'pei amaleppet ka tubutta.

⁹ “Kateteret nenda, kise te ngangan Tuhan, rimata samba sikebbukat laggai geti sapru puroron; tai imam geti mugeret tubu le' samba tai nabi mukisei kabaga le',

¹⁰ sialei masikua: Oh, Tuhan Taikamanua, bulatnia, Anupajongan bangsa nene samba sipulaggai ka Jerusalem, pasamba masikua: Aban bule ai katubumui, beringan lanjau ailotoan engamai!”

¹¹ Kateteret nenda tukua le' geti katubut bangsa nene samba ka sipulalaggai ka Jerusalem: “Rusa simaoloi sibara ka tobbou leleu sitaanai paloinaloina ka simatangeu muborai le' ka isit toga sinanalep paamianKu; ta' addeat masiso'so' samba masipalina,

¹² tapoi rusa simaron sibara kaparentaKu Kineneiget sarakKu le' sipasibebeleake ukum ka sia.”

¹³ Itco, itusakai kele tanairusa, nangkat keretania kele rusa talabari, jakjak tubu kuronia bele pei le' manyang. Paan te' ka sita, aipoi tususubu le' sita!

¹⁴ Palina le' paatuatnu ka pukakatai, ale Jerusalem, bule tupaarau ekeu! Pigangan le' ujunia ikuddu ka paatuatnu sangamberi isiat sikatai ka bagat paatuatnu?

¹⁵ Arep! Rapaagainia sirimanua sibara ka Dan, katuareman paoreat sibara ka paleleleu Efraim.

¹⁶ Parepdep le' ka tai bangsa: Bulat momoinia! Paarep le' ka Jerusalem: “Sipasigoilik amoian sibara ka laggai ka sareunan, masipaarep ngangania ka sangamberi laggai Jehuda.

¹⁷ Kele sangamberi sirimanua sipasijago moneda masigoilik ka sangamberinia, aipoi apaagrangan Jehuda katubukKu, kise le ngangan Tuhan.

¹⁸ Paraboatnu samba galai tubum aibaraakean sengamberinia nene katubum. Nenda te' nungan puririmanuam sikatai, bulat mapongit le, pat pununangan paatuatnu.”

¹⁹ Ero, kaddukatku, kaddukatku! Mukatsi le' aku kalulut besi! Ero, teinungku! Murukduk le' teinungku, ta' momoi kupumengmeng, aipoi kuarep le' ipunau pipiau, pasogaiat pasaggak.

²⁰ Tupaagai le' katukakatai, samba katukataikat sangamberi laggai tipakatai; sinulut tupakatai le' sapouku, tabbo'ku ka sangapeipeikat mata.

²¹ Piga moian le' ujunia kuiitco sangamberi toggaiat nenda, samba masiarep ipunau pipiau nenda?

²² “Bulatnia, Sitaimaagai paatuat le paamianKu nenda, Taan raagai Aku! Tatoga sitaiagai paatuat le sia, samba taanai puaagai kolou! Masoppit le' sia mugalai sikatai, tapoi mugalai simaeru ta' raagai.”

²³ Kuitco le' ka polak, tapoi apagaluan samba taanai berisara sibabara, samba kuitco ka manua, tanai toronia.

²⁴ Kuitco le', ka paleleuleleu, tapoi mauilak; samba sangamberi leleu leu mangeungeu.

²⁵ Kuitco le', tapoi taanai sirimanua, samba sangamberi uma' ka tei manua atuburutan.

²⁶ Kuitco le', tapoi polak simagabru aibailiu le' simatangeu, samba senen laggainia amabukkatnan ka matat Tuhan, ka goluNia sipujujulu!

²⁷ Aipoi kise le' ngangan Tuhan: “Sangalio laggai nene ibailiu geti simatangeu, tapoi ta'Kubabailiuakenia isapru.

²⁸ Kalulut pagalaiat nene polak geti mureubaga le', samba manua ka pata ibailiu le geti magepgep, aipoi Akukuangan, Akuisiakean, Taan iolei bagaKu samba taan kutitiktik tubuKu ka pagalaiat nenda.”

²⁹ Kalulut lamaura saladru sipukukuro samba sipupapana sangamberi laggai tuitui. Tuguru le' sia bakkat loina samba sakai ka leleu simabukku; senen laggai arakaddiuakean samba beringan sara sia sikukuddu ka bagania.

³⁰ Samba ekeu, sisubuakenen, aponia le' nugagalai, angoi nuleleppeiake leppei simabonan, masipalainge tubu pasamba pulaingean mas, masilokot calak ka matam? Siboboi le nupalainge tubum, aipoi sangamberi umunnakenennu ta'raoba ekeu, samba raoba peile ramataiake ekeu.

³¹ Aipoi kuarep le' nganga kele ngangan sinanalep sipususule', ngangan sirimanua situokip kele ngangan ina sipasitu'tu'ake matat toga siboiki, ngangan okko Sion simaengai, sipasirerepaake kabainia: “Paan te' kaku, aipoi matei le' aku kamatatda sipamamatei!”