Jer. 39 - BUKO SIPUNENAN

Kabebelenia laggai Jerusalem

¹ Ka rura sikasiba puparentaat Zedekia rimata Jehuda, ka laggo sikapulu amoian si Nebukadnezar rimata Babel pasamba sangamberi saladdunia masigoilik Jerusalem;

² ka rura sikapulusara puparentaat Rimata Zedekia, ka laggo sikaepet, ka gogoi sikasiba laggo nenda, mabekkanangan irip laggai nenda –

³ Iageti oi sangamberi sautet saladdut rimata Babel nenda, lepa kuddu sia ka Matat baliu Gugurukat ka tenga, sia nenda iate Nergal-Sarezer, siabeu tiboi tubu sibara ka Sin-Magir, Sautet Saladdu, samba Nebusyazban, siuteake kapurimataat, samba sautet saladdu bagei sibara ka rimata Babel.

⁴ Masiitco sia sangamberitda, iageti Zedekia, rimata Jehuda, pasamba sangamberi saladdunia tuitui sia, masikaddiuake laggai nenda ka teteret soibo masienungi enungan monen purimataat, masienungi enungan ka matat baliu gugurukat ka paoggangan rua irip laggai; lepa geti puenungrangan masiailiake Araba-Jordan.

⁵ Tapoi kukrurangan sia tai saladdut Kasdim nenda samba ailiakerangan si Zedekia ka su'sut Jeriko; labarangannia samba ambitranannia kai rimata Nebukadnezar, rimata Babel ka laggai Ribla ka tobbou Hamat, lepa orakakenangan ukuman ka tubunia.

⁶ Rimata Babel masikoiniake tuja'ja' tatogat Zedekia kamatania ka Ribla; samba sangamberi siabeu tiboitubu ka Jehuda ija'ja' le' rimata Babel.

⁷ Lepa nenda kiokrangan matat Zedekia, lepa kabe'rangannia rantai tembaga samba ambitrangannia ka Babel.

⁸ Laborangan tai Kasdim uma purimataat rimata samba sangamberi lalepra taikauma pasamba obengan, lepa bukkatnakerangan sangamberi irip Jerusalem.

⁹ Lepa geti si Nebuzaradan, siuteake saladdu sipujajago, ambitnangan sia ka pasiribbaiat ka Babel, sangamberi taikauma sipulelegei ka laggai nenda, samba sirimanua situtuitui karubeiatda samba sangamberi legei sipugagalai pasamba kabei.

¹⁰ Tapoi sangarubeiat taikauma, iate simageba sitaanai aponia pa, igalakngake sia ke Jehuda, si Nebuzaradan, siuteake saladdu sipujajago. Kateteret nenda leu kuanangan katubutda sangamberi monen anggur samba pamonemone bagei.

Parentat Nebukadnezar bule tujago si Jeremia

¹¹ Pagalaiat si Jeremia, Nebukadnezar, rimata Babel aikauan parenta kai Nebuzaradan, siuteake saladdu sipujajago, ngangania:

¹² “Ambit le' samba pasikeli le' nia, ba'gagalai aponia pa katubunia, tapoi buitanugalai le katubunia siripot tiddougetnia katubum!”

¹³ Iageti si Nebuzaradan, siuteake saladdu sipujajago, si Nebusyazban siuteake uma purimataat, samba Nergal-Sarezer, sautet utet saladdu samba sangamberi sautet saladdu rimata Babel, sipasikokoini sirimanua –

¹⁴ koiniakerangan raala si Jeremia ka laibokat pujagoat, lepa kaurangannia kai Gedalya, togat Ahikam togat Safan bule tubelaakenia itoili ka lalep. Kise te' aikuddu si Jeremia ka talagatda taikauma.

Palelengan katubut Ebed-Melekh, tubebelaake le geti nia

¹⁵ Ke' aipeile si Jeremia tutatangsiaake ka laibokat uma pujagoat, oi tiboiet Tuhan katubunia, ngangania:

¹⁶ “Kenan le' kai Ebed-Melek tai Etiopia nenda kua katubunia: Kasenen le' ngangan Tuhan Sebaot, Taikamanuan Israel: Bulatnia te' tiboietKu ka laggai nene Kugagalaiake le geti addeat pugejaat baga, samba ta' addeat puerukat, samba sangamberinia nenda muaali te' geti ka matamui keteteret nenda lauet.

¹⁷ Kateteret nenda leuet, kise te' ngangan Tuhan, Kubebelaake le' geti ekeu, samba ta'an tukakau ekeu kakabei sirimanua kalotoakennu,

¹⁸ tapoi bulatnia le' Kubebelaake geti ekeu: ta'an geti mabubukat ekeu kalulut lanjau; engam geti ibailiu le' rauraugetnu, aipoi matonembagam katubukKu, kise te' ngangan Tuhan.”