Jer. 38 - BUKO SIPUNENAN

Si Jeremia tuguruake ka bagat uggungan; iropmake le'nia si Ebet-Melekh

¹ Tapoi si Sefaca togat Matan, Gedalya togat Pasyhur, Jukhal togat Selemya samba Pasyhur togat Malkia masiarep tiboiet sitaipuaari itiboake si Jeremia ka sangamberi sirimanua simigi nenda:

² “Kanene le' ngangan Tuhan: Kasei sikuddu ka laggai nene matei geti kalulut lanjau, kalulut pulajeat samba besi' sipamamatei; tapoi kasei sibebela samba masikautubunia ka tai Kasdim, mariuriu le geti ipurimanua; engania geti raurauget samba mariuriu ipurimanua.

³ “Kasene le' ngangan Tuhan: Laggai nene geti bulatnia tukakau le' kakabai saladdut rimata Babel sikalaakenia geti.”

⁴ Iageti kuarangan sikebbukat laggai katubut rimata: “Maeru le' ituukum matei sirimanua nene! Aipoi siripokatnia pasikukua pagalaiat kele nenda isasapruake le' rontubuda sangamberi saladdu sipulelegai ka laggai nene samba osat tubut sangamberi taikauma. Bulatnia, sirimanua nene ta'ibesiake imaeru puririrmanuan bangsa nene, tapoi ibebesiki pugejaatbaga.”

⁵ Aleginangannia rimata Zedekia, “Maeruan le' ainia, kabagat gegem! Aipoi rimata ta'momoi igalaiaake apa pa' masisaggangi ekeu!”

⁶ Iageti alarangan si Jeremia samba guruakerangania ka bagat uggungan bakkat Milkia togat rimata, ka laibokat uma pujagoat nenda; gorosatnakerenga si Jeremia pasamba pangabe'. Kabagat uggungan nenda ta'anai oinan, sarat loti le' lepa tuusepnangan si Jeremia ka loti' nenda.

⁷ Tapoi kateteret aiarepnia si Ebed-Melekh, tai Etiopia nenda – sara sirimanua sipugagalai sikukuddu ka uma purimataat rimata – si Jeremia atuguruakeannia kabagat uggungan – kateteret nenda rimata ainia mukukuddu ka Matat baliu Gugurukat Benjamin –

⁸ iageti bela si Ebed-Melekh barania ka uma purimataat rimata, lepa kuanangan katubut rimata:

⁹ “Ale tuanku rimata, sigalaira sangamberi sirimanua nene makatai kasangamberi aponia sigalaiakenenda katubut nabi Jeremia, iate masuguruakenia kabagat uggungan; matei le' geti nia pulalaje ka kudduat nenda! Aipoi ka laggai nene ta'ananai roti.”

¹⁰ Lepa kaunangan rimata parenta kai Ebed-Melekh, tai Etiopia nenda, kuanangan: “Ambit le' telu sirimanua sibara sene' samba tiktikkam si Jeremia ka uggungan nenda kepei mateinia!”

¹¹ Ambitnangan si Ebed-Melekh sangamberi sirimanua nenda samba guru' sia ka uma purimataat rimata, ka bilit bibilet ka kudduat pebulaganan; barania sedda alanangan bibilet pakataikatai samba bibilet pabiritbirit, lepa gorosotnakenangannia pasamba tali kai Jeremia ka uggungan nenda.

¹² Pusoganangan si Ebed-Melekh, tai Etiopia nenda, kai Jeremia: “Kaule' bibilet pakataikatai samba pabiritbirit nenda ka katei keppam sibailiu kalak tali!” Galaiakenangan leu kele nenda si Jeremia.

¹³ Lepa tiktikrangan samba akkatnakerangan si Jeremia pasamba tali nenda. Kisedda te' aikuddu si Jeremia ka laibokat pujagoat nenda.

Patiboat sikateitei pasamba Rimata Zedekia

¹⁴ Rimata Zedekia masikoiniake sirimanua masiambit si Jeremia katubunia ka matat baliu sikatelu ka uman Tuhan. Kuanangan rimata katubut Jeremia: “Kuoba masiparereake sara katubum; ba' pa' kekele aponia pa' katubuku!”

¹⁵ Alegiat Jeremia katubut Zedekia: Ke'bai kupaagainia katubum, bulat numamateiake le' geti aku. Ke'bai kuake panganturat katubum, ta' leuet nuaarepi aku!”

¹⁶ Iageti simengmeng pusuppanangan rimata Zedekia katubut Jeremia, kuanangannia, “Ka onin Tuhan sipuriRimanua, siake enga nene katubutta, ta' kumamateiake ekeu samba ta' kukakau ekeu kakabeira sirimanua sibesiake masiala engam nenda!”

¹⁷ Lepa nenda kuanangan si Jeremia kai Rimata Zedekia: “Kise le ngangan Tuhan, Taikamanua Sebaot, Taikamanuan Israel: Ke' bela ekeu msisegetubum ka sautet saladdut rimata Babel, marau le' ekeu samba laggai nene leu ta'tulalabo. Ekeu samba saeppum geti murimanua le.

¹⁸ Tapoi ke'bai ta'nuoba tubum katubut saladdut rimatat Babel, iageti laggai nene tukau le' geti kakabira tai Kasdim sipasilalabonia pasamba obengan; samba ekeu leu ta'bebela kakabeira.”

¹⁹ Lepa geti kuanangan Rimata Zedekia katubut Jeremia: “Maloto le' aku ka tai Jehuda siputatalipo ka tai Kasdim nenda; babara tukakau aku kakabeira, bailiu paguileakerangan aku.”

²⁰ Aleginangannia si Jeremia, “Pagalaiat nenda ta'muaaili! Arepmake le' ngangan Tuhan kapagalaiat apa sikuakku katubum, iageti maerunangan puririmanuam samba engam leu tupasikeli.

²¹ Tapoi ke' ta'nuoba masisege'ake' tubum, iageti nene te' nganga sipatoilat Tuhan katubuku.

²² Bulatnia, sangamberi tainanalep sikukuddu pei le' ka uma purimataat rimata Jehuda tugerit sia ka uja kamatatda saladdu rimata Babel, sialei soga: Tupajo le' ekeu, rakalaake le' ekeu sangamberi saaleinu. Tapoi iapei aituusep rerem ka loti, arasoksokngan ratoili.

²³ Sangamberitda tainanalepmui samba tatogamui tugirit geti ka uja kamatda tai Kasdim nenda. Samba ekeu geti ta'bebela kakabeira, tapoi ilalaba le' ekeu rimata Babel. Samba laggai nene tulabo' pasamba obengan.”

²⁴ Lepa kuanangan si Zedekia kai Jeremia, “Bui ibara sirimanua siagai patiboatta nene, bule bui numatei.

²⁵ Ke'bai raarep sikebbukat laggai, amanibongan aku pasamba ekeu, lepa geti oi sia masitiddou katubum: Paagai le katubumai aponia sikuam katubut rimata samba aponia aikua rimata katubum; ba' pakele katubumai, bule bui kumateiake kai ekeu!,

²⁶ Iageti bui tanukua katubutra: Kusegeake le' panindogatku kamatat rimata, bule bui itoliake aku ka lalep Jonatan addeat matei sedda.”

²⁷ Kirenangan sangamberi sikebbukat laggai nenda moi parere kai Jeremia, tapoi kaunangan alegiat katubutda kele siripot sikuat rimata. Iageti kaddiuakerangannia, aipoi patiboat nenda beri sia sara siagainia.

²⁸ Kase'te' aikuddu si Jeremia ka laibokat pujagoat nenda teret ka atualau laggai Jerusalem.